មេដឹកនាំរបស់បណ្តាប្រទេសជាសមាជិក អង្គការអូតង់បានមកជួបជុំគ្នានៅ NEWPORT ប្រទេសអង់គ្លេស ដើម្បីចូលរួមក្នុងកិច្ចប្រជុំកំពូលលើកទី២៦ របស់អង្គការយោធាដ៏មានឥទ្ធិពលនោះ ។ ប្រធានាធិបតីអាមេរិកលោកបារ៉ាក់ អូបាម៉ា នាយករដ្ឋមន្ត្រីអង់គ្លេសលោកដាវីដ កាមីរ៉ូន អធិការបតីអាល្លឺម៉ង់លោកស្រីអេនហ្សឺឡាម័រកែល និងប្រធានាធិបតីបារាំងលោកហ្វ្រង់ស្វ័រហូឡង់ ស្ថិតក្នុងចំណោមមេដឹកនាំ៦០រូបលើពិភពលោកដែលមកចូលរួមក្នុង កិច្ចប្រជុំកំពូលនេះ។
ប្រធានាធិបតីអ៊ុយក្រែនលោកប៉េត្រូ ប៉ូរូឆេនកូ ក៏ត្រូវអញ្ជើញមកចូលរួមក្នុងកិច្ចប្រជុំកំពូលនេះដែលបើកទោះអ៊ុយក្រែនមិនមែនជាសមាជីកណាតូក៏ដោយ ។ អគ្គលេខាធិការអូតង់លោក ANDERS FOGH RASMUSSEN ពេលមកដល់ក្រុង NEWPORT ថ្លែងថា យើងកំពុងតែប្រឈមមុខនឹងការផ្លាស់ប្តូរគួរឱ្យភ្ញាក់ផ្អើលមួយនៃ សភាពការណ៍សន្តិសុខ ។ ប្រទេសរុស្ស៊ីវាយប្រហារអ៊ុយក្រែន ហើយម្យ៉ាងវិញទៀត យើងឃើញការបង្កើនកម្លាំងរបស់អង្គការភេរវកម្មមួយ គឺក្រុមរដ្ឋអ៊ិស្លាមដែលបង្កនូវគ្រោះមហន្តរាយយ៉ាងសែនទារុណ ហើយនៅតំបន់ខ្លះទៀតយើងកត់សម្គាល់ឃើញអំពើហិង្សា និងអស្ថេរភាព ។
ក្នុងកិច្ចប្រជុំកំពូលនោះ យើងនឹងចាត់វិធានការសំខាន់នានាដើម្បីទប់ទល់នឹងការគំរាមកំហែង ទាំងនោះ ហើយពង្រឹងកិច្ចការពារបណ្តាសម្ព័ន្ធមិត្តយើង ។ សន្តិសុខត្រូវបានពង្រឹងយ៉ាងខ្លាំងនៅក្រុង NEWPORT ពិសេសនៅសណ្ឋាគារ CELTIC MANOR RESORT ជាកន្លែងប្រជុំដោយកងកម្លាំងប៉ូលិស ទាហាន ព្រមទាំងឆ្កែត្រូវបានដាក់ពង្រាយ ។ កិច្ចប្រជុំកំពូលនេះផ្តោតលើបញ្ហាជាអាទិភាព៥គឺ វិបត្តិនៅអ៊ុយក្រែន និងទំនាក់ទំនងរវាងអូតង់ និងរុស្ស៊ី អនាគតរបស់អាហ្វហ្គានីស្ថាន ចម្លើយតបចំពោះការគំរាមកំហែងថ្មីៗ ការពង្រឹងការគាំទ្រដល់បណ្តាកងទ័ពសម្ព័ន្ធមិត្ត និងការពង្រឹងភាពជាដៃគូ ។ ក្នុង កិច្ចប្រជុំកំពូលនេះ បណ្តាមេដឹកនាំអូតង់នឹងពង្រឹងវត្តមានយោធាអូតង់នៅអឺរុ៉បខាងកើត ហើយជួយទ្រទ្រង់ដល់រដ្ឋាភិបាលអ៊ុយក្រែន ខណៈប្រទេសនេះកំពុងមានវិបត្តិជាមួយរុស្ស៊ី ។ មែនហើយ ជម្លោះនៅអ៊ុយក្រែនជាប្រភពនៃភាពតានតឹងពុំធ្លាប់មាននៅអឺរុ៉ប ចាប់តាំងពីបញ្ចប់សង្គ្រាមត្រជាក់មក ។
ប្រការចាំបាច់ត្រូវមានការកែប្រែទាំងស្រុងនៃយុទ្ធសាស្ត្ររបស់អូតង់ ចំពោះរុស្ស៊ី ។ មេដឹកនាំរបស់ប្រទេសទាំង២៨ ជាសមាជិករបស់អូតង់នឹងសម្រេចបង្កើតកងកម្លាំងអន្តរាគមន៍រហ័សមួយមាន ទាហានជាច្រើនពាន់នាក់ ដែលអាចដាក់ពង្រាយបានយ៉ាងឆាប់ក្នុងរយៈពេលត្រឹម៤៨ម៉ោងដើម្បី ប្រឈមមុខទល់នឹងគ្រោះថ្នាក់ធំៗទាំងឡាយ ។ ដោយផន សុខជាតិ
