កំពង់ចាម : លោក អ៊ុន ចាន់ដា អភិបាលខេត្តកំពង់ចាម នារសៀលថ្ងៃទី៩ ខែមីនា ឆ្នាំ២០២២នេះ បានចែកកុំព្យូទ័រយួរដៃចំនួន ៤០គ្រឿង និងម៉ាស៊ីនព្រីនចំនួន ៤០គ្រឿង ជូនដល់ឃុំគោលដៅទាំង ៤០ឃុំ ក្នុងចំនួន៥ស្រុក គឺមានស្រុកបាធាយ ,ជើងព្រៃ, កងមាស ,កោះសូទិន និងស្រុកស្ទឹងត្រង់ ដែលអនុវត្តគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប TSSD-AF ជំហានទី២ ។
តាមមន្ត្រីរដ្ឋបាលខេត្តបានឲ្យដឹងថា គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប ជំហាន១ បានចែកកុំព្យូទ័រយួរដៃចំនួន ៤០គ្រឿង និងម៉ាស៊ីនព្រីនចំនួន ៤០គ្រឿង ដល់ឃុំគោលដៅទាំង៤០ឃុំ ប៉ុន្តែបច្ចុប្បន្នសម្ភារៈទាំងនោះបានខូចខាតប្រើប្រាស់មិនកើត។
ដូច្នេះ ដើម្បីជាការលើកទឹកចិត្តដល់មន្ត្រីផ្សព្វផ្សាយផ្តល់ព័ត៌មានចល័តឃុំ (CMAWs) និងលោក លោកស្រីមេឃុំក្នុងការបំពេញការងារ ដែលទទួលបានជោកជ័យនាពេលកន្លងមក លើគម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចតំបន់ទន្លេសាប ជំហាន២ (TSSD-AF) ទើប លោក អភិបាលខេត្ត បានចែកកុំព្យូរទ័រយូរដៃចំនួន ៤០គ្រឿង និងម៉ាស៊ីនព្រីនចំនួន ៤០គ្រឿងបន្ថែមទៀត ដល់ស្រុកទាំង៥ ដែលមាន ៤០ឃុំ រួមមានស្រុកបាធាយមាន ៩ឃុំ, ជើងព្រៃមាន ៨ឃុំ ,កងមាសមាន ៨ឃុំ, កោះសូទិនមាន ៧ឃុំ, និងស្រុកស្ទឹងត្រង់មាន៨ឃុំ ផងដែរ ៕
