កំពង់ចាម: អភិបាលនៃគណៈអភិបាលខេត្តកំពង់ចាម ឯកឧត្តម អ៊ុន ចាន់ដា បានថ្លែងថា បេីសិនជាបានដឹងថា មានបុគ្គលណាមួយដែលរពឹសដៃ ស្តុកនូវឯកសារសម្រាប់បម្រើសេវា
សាធារណៈ ដើម្បីចង់បានប្រយោជន៍ដោះដូរជាថវិកាពីបងប្អូនប្រជាពលរដ្ឋនោះ លោកនឹងលែងមានការយោគយល់ទៀតហេីយ ពោលគឺលោកនឹងប្រគល់ទៅឲ្យACUចាត់ការតាមផ្លូវច្បាប់តែម្ដង បេីសិនជាបុគ្គលនោះនៅតែមិនព្រមផ្លាស់ប្រែតាមការអប់រំណែនាំ ការព្រមានបែបនេះបានធ្វេីឡេីងក្នុងកិច្ចប្រជុំសាមញ្ញលើកទី៣៤ អាណត្តិទី៣ របស់ក្រុមប្រឹក្សាខេត្តកំពង់ចាម នាព្រឹកថ្ងៃទី១០ ខែមីនា ឆ្នាំ២០២២ ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានលេីកឡេីងថា ចំពោះឯកសារសម្រាប់បំពេញជាសំបុត្រកំណើត ឬសំបុត្របញ្ជាក់កំណើត អាចមានការខ្វះខាតមួយពេលៗ វាជារឿងជៀសមិនផុតទេ ព្រោះសេចក្តីតម្រូវការវាមានច្រេីនតាមកំណើនរបស់ប្រជាពលរដ្ឋ តែទោះបីជាយ៉ាងណា អាជ្ញាធរខិតខំស្នើមកឲ្យបានគ្រប់ចំនួនតាមអ្វីដែលបងប្អូនប្រជាពលរដ្ឋចង់បាន ផ្ទុយទៅវិញបេីសិនជាមានបុគ្គលណាមួយដែលរពឹសដៃ ស្តុកនូវឯកសារ ដើម្បីចង់បានប្រយោជន៍ជាថវិកានោះ គឺត្រូវអនុវត្តតាមផ្លូវច្បាប់តែម្ដង ប្រសិនជាមានការអប់រំណែនាំមួយលេីកជាពីរលេីកហេីយ តែបុគ្គលខិលខូចនៅតែមិនព្រមផ្លាស់ប្រែនោះ ។
ឯកឧត្តមអភិបាលខេត្ត បានបញ្ជាក់ថា ដោយសារជួបប្រទះនឹងបញ្ហាខ្វះខាតមន្ត្រី បច្ចុប្បន្នរដ្ឋបាលថ្នាក់ជាតិបានប្រតិភូកម្មមុខងារមកឲ្យយើង នៅចំពោះមុខគឺយើងត្រូវធ្វើការអប់រំណែនាំកែប្រែចំពោះមន្ត្រីដែលប្រព្រឹត្តខុសឆ្គង ដើម្បីប្រេីប្រាស់បន្តទៀត យេីងមិនមែនធ្វើការរបៀបប៉ះដៃយកដៃ ប៉ះជេីងយកជេីងនោះទេ ប៉ុន្តែយើងក៏មិនត្រូវទុកឱកាសឲ្យមន្ត្រីខិលខូច ធ្វើឲ្យខូចដល់ការដឹកនាំរបស់ស្ថាប័នរដ្ឋដែរ ។
ក្នុងកិច្ចប្រជុំនេះដែរ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម បានលើកយកសេចក្តីព្រាងរបៀបវារៈសំខាន់ៗ មកពិភាក្សា រួមមាន៖ ១- ពិនិត្យ និងអនុម័តលើសេចក្ដីព្រាងកំណត់ហេតុនៃកិច្ចប្រជុំសាមញ្ញអាណត្តិទី៣៣ របស់សាលាខេត្ត។
២ -ពិនិត្យពិភាក្សា និងអនុម័តសេចក្ដីព្រាងរបាយការណ៍បូកសរុបលទ្ធផលការងារប្រចាំខែកុម្ភៈ និងលើកទិសដៅការងារប្រចាំខែមីនា ឆ្នាំ២០២២ របស់រដ្ឋបាលខេត្តកំពង់ចាម។
៣ -ពិនិត្យ និងអនុម័តលើសេចក្តីព្រាងស្តីពីការបិទបញ្ជីចំណូលចំណាយ និងការធ្វើរបាយការណ៍បូកសរុបការងារអនុវត្តចំណូល ចំណាយថវិការបស់រដ្ឋបាលខេត្តកំពង់ចាម សម្រាប់ការគ្រប់គ្រង ឆ្នាំ២០២១។
៤ -ពិនិត្យ ពិភាក្សា និងអនុម័តលើសេចក្តីព្រាងផែនការក្របខណ្ឌឆ្នាំ២០២៣ របស់សាលាខេត្ត។
៥ -ពិនិត្យ ពិភាក្សា និងអនុម័តលើសេចក្តីព្រាងផែនការក្របខណ្ឌសម្រាប់ ឆ្នាំ២០២៣ របស់មន្ទីរសុខាភិបាលនៃរដ្ឋបាលខេត្តកំពង់ចាម ៕
