កំពង់ធំ៖ នៅព្រឹកថ្ងៃទី ៨ ខែ កញ្ញា ឆ្នាំ ២០១៤ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ ប្រតិបត្តិការសឹករងកំពង់ធំ ព្រមទាំងថ្នាក់ដឹកនាំតំបន់សឹកចំនួន ១៥នាក់ បានអញ្ជើញចុះសួរសុខទុក្ខ ដល់លោកវរៈសេនីយ៍ត្រី ហង្ស ធឿន មេបញ្ជាការ ផ្នែកសឹករងស្រុកសណ្តាន់ ដែលកំពុងតែមានជម្ងឺជាទម្ងន់ ខណៈនេះ កំពុងតែសម្រាកនៅផ្ទះ ស្ថិតនៅភូមិ កំពង់ត្របែក ឃុំ សណ្តាន់ ស្រុកសណ្តាន់ ខេត្តកំពង់ធំ ។
លោក ហង្ស ធឿន គឺជានាយទាហ៊ានមួយរូប ដែលធ្លាប់មានស្នាដៃដ៍ឆ្នើម ក្នុងការបំរើជាតិមាតុភូមិ និងជាទី ស្រឡាញ់ក្នុងជួរកងទ័ពពីសំណាក់មន្ត្រីក្រោមឳវាទ និងជាទីរាប់អានរបស់បងប្អូនប្រជាពលរដ្ឋ និងជានាយ ទាហ៊ានមួយរូបធ្លាប់បាន ឆ្លងកាត់សមរភូមិប្រយុទ្ធនាសម័យសង្គ្រាម ដោយមានស្នារដៃជាច្រើនសម្រាប់អង្គភាព ខណៈពេលនេះលោក ហង្ស ធឿន បានធ្លាក់ខ្លួនឈឺអស់រយះពេលជិតមួយឆ្នាំហើយ អង្គភាពតំបន់សឹករង កំពង់ធំ បានបញ្ជូនទៅសម្រាកព្យាបាលនៅមន្ទីរពេទ្យ កេតុមាលា ព្រមទាំងបានព្យាបាលជាច្រើនកន្លែងផង ដែរតែអាការៈលោក ហង្ស ធឿន នៅតែពុំមានអាការៈធូរស្បើយឡើយ ។ 
ក្នុងឳកាសនោះឯកឧត្តម ឧត្តមសេនីយ៍ត្រី សោម ស៊ុន បានសួរសុខទុក្ខ និងនាំយកនូវគ្រឿងឧបភោគ បរិភោគមកជូនគ្រួសារ លោកហង្ស ធឿន រួមមានថវិកា ៥០ម៉ឺនរៀល ទឹកផ្លែឈើ៣កេស ទឹកដោះគោឆៅ៤យួរ ទឹកដោះគោខាប់ ៤៨កំប៉ុង ស្ករស ចំនួន ១០កីឡូក្រាម តែ ៣កញ្ចប់ធំ ទឹកបរិសុទ្ធ ៤កេសដើម្បីជាការលើកទឹកចិត្តដល់អ្នកជម្ងឺ ព្រមទាំងផ្តាំផ្ញើរដល់គ្រួសារឲ្យយកចិត្តទុកដាក់ និងថែរក្សាសុខភាព និងសូមឲ្យជាសះស្បើយពីរោគគាឆាប់ៗ។
នៃឳកាសនោះដែរ ឯកឧត្តម សោម ស៊ុន បានអំពាវនាវឲ្យថ្នាក់ដឹកនាំ នៃកងយោធពលខេមរៈភូមិន្ទ ព្រមទាំងអភិបាលខេត្តកំពង់ធំ មេត្តាជួយផ្តល់ថវិកាឬជាឧបភោគ សម្រាប់ជួយដល់លោក ហង្ស ធឿន ដែលកំពុងធ្លាក់ខ្លួនឈឺយ៉ាងធ្ងន់ធ្ងរដោយរោគថ្លើម និងជាការលើកទឹកចិត្តដល់បុគ្គលដែលធ្នាប់មានស្នារដៃ បំរើជាតិមាតុភូមិ ។ ដោយ ប៊ុន រដ្ឋា
