សៀមរាប៖ ជនសង្ស័យចំនួន៤នាក់ដែលលួចម៉ូតូនៅកន្លែងលក់ទ្វារបង្អួចបានសម្រេចកាលពីថ្ងៃទិ២៨ខែសីហានោះអស់រយៈពេល១០ថ្ងៃ ត្រូវសមត្ថកិច្ចតាមប្រម៉ាញ់ចាប់ខ្លួនជាបន្តបន្ទាប់យកមកផ្តន្ទាទោសតាមច្បាប់។ ហេតុការបង្ក្រាបជនសង្ស័យដែលលួចម៉ូតូធ្វើឡើងនៅថ្ងៃទី៦ និង ទី៧ ខែកញ្ញា២កន្លែងខុសគ្នាក្នុងផ្សារទំនើបអង្គរទ្រេត សង្កាត់ស្វាយដង្គំ និងមួយកន្លែងទៀត មុខផ្ទះសំណាក់អាយ វិន ក្នុងសង្កាត់ស្វាយដង្គំ ក្រុងសៀមរាប។
បើតាមការឲ្យដឹងពីលោក អនុសេនីយឯក អ៊ុយ ចយ នាយការិយាល័យស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថខេត្តសៀមរាបបានប្រាប់ថា យោងតាមពាក្យបណ្តឹងជនរងគ្រោះឈ្មោះ ប៊ុត ង៉ែត ភេទប្រុសអាយុ៤៦ឆ្នាំមុខរបរ លក់ទ្វារបង្អួចរស់នៅភូមិតាវៀន សង្កាត់សាលាកំរើកបានរៀបរាប់ប្រាប់សមត្ថកិច្ចថា ខ្លួនកំពុងរវល់លក់ស្រាប់តែក្រឡេកមកក្រៅក៏បាត់ម៉ូតូសេ១២៥ព័ណក្រហមឆ្នាំ២០០៥មួយគ្រឿងពាក់ស្លាកលេខសៀមរាប1G4597តែម្តងរួចក៏មកដាក់ពាក្យបណ្តឹងនៅកន្លែងប៉េអ៊ឹមខេត្តដើម្បីឲ្យជួយអន្តរាគមន៍។លោកបន្តទៀតថា ដោយយោងតាមពាក្យបណ្តឹងរបស់ជនរងគ្រោះ កម្លាំងអាវុធហត្ថខេត្ត បានចុះស្រាវជ្រាវរហូតចាប់បានជនសង្ស័យលួចម៉ូតូទាំង៤នាក់ជាបន្តបន្ទាប់។
លោកបន្ថែមទៀតថា ជនសង្ស័យទាំង៤នាក់នេះមាន ទី១ / ឈ្មោះ សុខ សីហា ហៅ តឿ ភេទប្រុសអាយុ២០ឆ្នាំ មុខរបរកូនជាងខាត់ទ្វារបង្អួចស្នាក់នៅភូមិតាវៀន សង្កាត់សាលាកំរើក ក្រុងសៀមរាប (ឃាត់ខ្លួនថ្ងៃទី៦ខែកញ្ញានៅក្នុងផ្សារទំនើបអង្គរទ្រេត កន្លែងលេងហ្គេម)(ជាអ្នកលួច)និងទី២/ឈ្មោះ សុខ ឡាបូ ភេទប្រុសអាយុ២៨ឆ្នាំមុខរបរមិនពិតរស់នៅភូមិវិហារចិន សង្កាត់ស្វាយដង្គំ(ឃាត់ខ្លួននៅថ្ងៃនិងទីកន្លែងជាមួយគ្នា)ទី៣/ឈ្មោះយ៉េង គឹម ហ៊ាង ភេទប្រុសអាយុ២៤ឆ្នាំមុខរបររត់រឺម៉កស្នាក់នៅភូមិវាល សង្កាត់គោកចក ក្រុងសៀមរាប (ឃាត់ខ្លួនថ្ងៃតែមួយ នៅមុខ
ផ្ទះសំណាក់អាយ វិន ផ្សារក្រោម) និងទី៤/ឈ្មោះ អ៊ួន សុវណ្ណរតនា ហៅ ប៊ួស ភេទប្រុសអាយុ២៣ឆ្នាំ មុខរបររត់រឺម៉ក ទីលំនៅបច្ចុប្បន្នភូមិខ្វៀន សង្កាត់គោកចក ក្រុងសៀមរាប (ឃាត់ខ្លួនថ្ងៃទី៧ខែកញ្ញា នៅចំនុចភូមិទ្រាំង សង្កាត់ស្លក្រាម ក្រុងសៀមរាប )។និងដកហូតបានម៉ូតូម៉ាកសេ១២៥ពណ៌ក្រហម ឆ្នាំ២០០៥ពាក់ស្លាកលេខសៀមរាប1G 4597។ បច្ចុប្បន្ន ប៉េ អ៊ឹមការិយាល័យស្រាវជ្រាវបទល្មើសព្រហ្មទណ្ឌខេត្តបានធ្វើការប្រគល់ម៉ូតូជូនម្ចាស់ដើមវិញ ចំណែកជនសង្ស័យដែលលួចម៉ូតូទាំង៤នាក់នេះកម្លាំងជំនាញបានរៀបចំកសាងសំណុំ រឿងបញ្ជូនទៅតុលាការដើម្បីចាត់ការតាមផ្លូវច្បាប់៕ ដោយ កុសល
