កំពង់ឆ្នាំង៖ បុរសម្នាក់ត្រូវបានសមត្ថកិច្ចនគរបាលក្រុងកំពង់ឆ្នាំង ចាប់ខ្លួនបន្ទាប់ពីរូបគេ បានវាយប្រពន្ធនឹងអង្រែបុកគ្រឿង និងកាំបិតរងរបួសយ៉ាងធ្ងន់ធ្ងរនៅក្នុងផ្ទះរបស់ខ្លួនរួច មក។ការចាប់ខ្លួនប្តីដៃដល់នេះបានធ្វើឡើងនៅវេលាម៉ោង៣និង០៥នាទីល្ងាចថ្ងៃទី០៦ ខែកញ្ញា ឆ្នាំ ២០១៤ នៅក្នុងភូមិទី៦ សង្កាត់ខ្សាម ក្រុងកំពង់ឆ្នាំង។ 
លោក ញ៉ោក ប៊ុនធី អធិការរងនគរបាលក្រុងបានអោយដឹងថា៖ជនដៃដល់វាយប្រ ពន្ធឯងមានឈ្មោះ សៅ ស៊ីថា អាយុ៣២ឆ្នាំ ចំណែកប្រពន្ធដែលរងគ្រោះមានឈ្មោះ កែវ វាសនា អាយុ៣១ឆ្នាំ រស់នៅក្នុងភូមិទី៦ សង្កាត់ខ្សាម ក្រុងកំពង់ឆ្នាំង។ ស្ត្រីឈ្មោះ កែវ វាសនា ជាជនរងគ្រោះបានអោយដឹងថា៖នៅព្រឹកថ្ងៃ កើតហេតុវេ លាម៉ោង៧និង៣០នាទី ប្តីរបស់នាងឈ្មោះ
សៅ ស៊ីថា បានវាយមកលើរូបនាងដោយយក អង្រែបុកគ្រឿងចំនួន៧អង្រែ គឺត្រូវចំជើង២អង្រែ,កែងដៃ១អង្រែ,ស្មាស្តាំ៣អង្រែ,ក្បាល ១ អង្រែ បន្ទាប់មកគេបានយកកាំបិតបាំងតោមកវាយបំបែកត្រជៀកខាងស្តាំហូរឈាមជា ច្រើននិងបានដាល់និងទះកំភ្លៀងជាច្រើនដៃបណ្តាលអោយហើមជាំ ពេញមុខតែម្តង។
នាងបានបន្តអោយដឹងទៀតថា៖ ការវាយដំនាងក្នុងលើកនេះ មិនមែនជាលើកទី១នោះទេ គឺកន្លងមករូបគេតែងតែវាយធ្វើបាបនាងជារៀងដរាបមក ទោះបីសមត្ថកិច្ច និងអាជ្ញាធរ មូលដ្ឋានបានហៅរូបគេទៅណែនាំជាច្រើនលើកច្រើនសារក៍ដោយ។ នៅព្រឹកថ្ងៃទី០៦ ខែកញ្ញានេះ ដោយទ្រាំទ្រនឹងការវាយធ្វើបាបរបស់ប្តីតទៅទៀតមិនបាន ស្ត្រីរងគ្រោះក៍បានមកប្តឹងសមត្ថកិច្ចអោយចាប់ខ្លួនបុរសជាប្តី បញ្ជូនខ្លួនទៅតុលាការ ផ្តន្ទាទោសតាមច្បាប់។
នៅចំពោះមុខសមត្ថកិច្ចជនដៃដល់រូបនោះបានសារភាពថា៖ រូបគេពិតជាបានវាយធ្វើបាបប្រពន្ធខ្លួនពិតមែន ក៍ដោយសារតែនាងលួចលាក់មានប្រុសសាហាយ ហើយនៅព្រឹកកើតហេតុនោះ រូបគេបានមកទាន់ឃើញប្រុសនោះរត់ចេញពីផ្ទះ ពេលសួរនាងៗបានលាក់លៀមជាមួយរូបគេទៀតទើបគេវាយធ្វើបាប។តែសមត្ថកិច្ចបាននិយាយថា នេះគឺជា ការនិយាយដោះសាររបស់ជនដៃដល់តែប៉ុណ្ណោះ។ជនដៃដល់ត្រូវបានសមត្ថកិច្ចកសាងសំណុំរឿងបញ្ជូនខ្លូនទៅស្នងការនគរបាលខេត្ត ចាត់ការបន្តបញ្ជូនខ្លួនទៅតុលាការខេត្ត។
តាមមាត្រា២២២នៃក្រមព្រហ្មទណ្ឌ៖ជនណាប្រើអំពើហឹង្សាប្រព្រឹត្តដោយសហព័ន្ធ ឬ អនីតិសង្វាសជន ត្រូវផ្តន្ទាទោសពី២ទៅ៥ឆ្នាំ និងត្រូវពិន័យជាប្រាក់ពី៤លានរៀល Bun rithy
