កំពង់ធំ ៖ លោកមេប៉ុស្តិ៍ដាច់យ៉ៃ យកស្រាធ្វើជាត្រីមុខ អាងអាវុធបាញ់បោះសេរី ខ្លួនជាមន្ត្រីនគរបាល ជាគំរូ ជាអ្នកអនុវត្តន៍ច្បាប់ តែបើអ្នកអនុវត្តន៍ច្បាប់ មិនគោរពច្បាប់ អង្គុយលើច្បាប់ បែបយ៉ាងដល់ប្រជាពលរដ្ឋដូច្នេះ អត្តចរិកទំនើងរបៀបនេះ ត្រូវបានមេឃុំ និងប្រជាពលរដ្ឋ លែងស្វាគមន៍ហើយដោយសារតែការបាញ់បោះសេរីជាច្រើនលើក ច្រើនសារគ្មានថ្ងៃណាកែខ្លួន។
ប្រជាពលរដ្ឋ បាត់បង់ភាពកក់ក្តៅ ដោយសារតែអ្នកបង្គោលអនុវត្តន៍គោលនយោបាយ ៩ចំនុចភូមិឃុំ មានសុវត្តិភាព ចាប់អាវុធបាញ់បោះសេរី និងមានចរិកក្មេងពាល គំរាមគំហែង គ្រាន់តែប្រជាពលរដ្ឋដឹកសរសផ្ទះក៏ដាច់ចិត្តបាញ់បោះជាច្រើនគ្រាប់ គំរាមជំរិតទារលុយ៥ម៉ឺនរៀលដើម្បីយកទិញស្រាផឹក ។ 
ប៉ូលិសទំនើងត្រូវបានគេស្គាល់ឈ្មោះ ប្រាក់ ផាន់ណូ ជានាយប៉ុស្តិ៍រដ្ឋបាល ឃុំបាក់ស្នា ស្រុកបារាយណ៍ ខេត្តកំពង់ធំ បានធ្វើសកម្មភាពបាញ់បោះសេរី គំរាមគំហែងមកលើប្រជាពលរដ្ឋស្លូតត្រង់ ព្រមទាំងបានធ្វើ ឲ្យប្រជាពលរដ្ឋគ្មានភាពតក់ស្លុត ដោយសារលោក ប្រាក់ ផាន់ណូ មានតួនាទីជានាយប៉ុស្តិ៍រដ្ឋបាល បានចាញ់ជាច្រើនលើកច្រើនសារ រហូតមានប៉ូលិសមួយចំនួន មិនអាចរួមរស់ជាមួយបានសុំដកខ្លួនទៅកន្លែងផ្សេង ។
ជាក់ស្តែងលោក ប្រាក់ ផាន់ណូ ជានាយប៉ុស្តិ៍បាក់ស្នា បានបាញ់ជំរិតទារប្រាក់ ពីបុរសម្នាក់នៅយប់ថ្ងៃទី ៧ ខែកញ្ញា ឆ្នាំ ២០១៤ នៅចន្លោះម៉ោង១១ទៅ១២យប់ ស្ថិតនៅឃុំបាក់ស្នា ស្រុកបារាយណ៍ ខេត្តកំពង់ធំ ដោយសារតែតៃកុងឡានម្នាក់នោះ បានដឹកសរសផ្ទះ ឲ្យស្ត្រីមេម៉ាយកូន៣ម្នាក់ មានជីវភាពក្រីក្ររស់នៅក្នុង ខ្ទមកំសត់ បុរសនោះក៏ដឹកជូន តែមកដល់ចំនុចមុខឃុំបាក់ស្នា លោក ប្រាក់ ផាន់ណូ ជានាយប៉ុស្តិ៍បានទារលុយពីតៃកុងឡាន ចំនួន ៥ម៉ឺនរៀលដើម្បីទិញស្រាផឹក តែ
តៃកុងឡានមិនបានជាប់លុយមកទេក៏អាងតែជា មេប៉ុស្តិ៍ធ្លាប់ជាមិត្តភ័ក្ក ក៏និយាយថា អាម៉ាកចាំព្រឹកទៅចាំយក ឥឡូវអត់បានយកលុយមកទេ គ្រាន់តែឆ្លើយ បែបនេះភ្លាម លោក ប៉ូលិសទំនើងបានទាញអាវុធអាការ៥៤បាញ់ចំនួន២គ្រាប់ទៅនឹងដី តែផ្ទុះមួយគ្រាប់ ខណៈពេលនេះបានធ្វើឲ្យផ្អើលឆោឡោស្មានតែជាអំពើឃាតកម្ម ព្រោះមេប៉ុស្តិ៍មានភាពស្រវឹងជោគជាំ ។
ប្រភពពត៌មាន បានឲ្យដឹងថា ក្រោយពីកើតហេតុ លោក ប្រាក់ ផាន់ណូ ប៉ូលិសទំនើង បានគំរាមប្រជាពលរដ្ឋ និងដៃគូបដិបក្ស មិនឲ្យលេចលឺពត៌មាននេះចេញទៅក្រៅ តែដោយសារប្រជាពលរដ្ឋ បច្ចុប្បន្នមិន មែនល្ងង់ដូចសម័យមុនទេ គឺគាត់ត្រូវការភាពយុត្តធម៌ ទាមទារឲ្យមានការគោរពច្បាប់ទាំងអស់គ្នា មិនមែន គោរពតែប្រជាពលរដ្ឋនោះទេ ទើបពត៌មាននេះត្រូវបានបែកធ្លាយ ក្នុងនោះដែរលោក ប្រាក់ ផាន់ណូ បានរត់ ទៅពឹងពាក់មនុស្សម្នាក់ ដែលធ្វើការនៅក្រសួងពត៌មាន ដើម្បីឲ្យជួយបិទបាំងអំពើ និងទង្វើទំនើងរបស់ខ្លួន ។ 
លោក វរៈសេនីយ៍ត្រី សួង ថេន អធិការ ស្រុកបារាយណ៍ បានឲ្យដឹងថា ករណីលោក ប្រាក់ ផាន់ណូ បាញ់បោះដោយសារតែ ការសុំលុយពីមិត្តរបស់គាមិនបាននេះ គឺពិតជាកើតឡើងមែន ក្នុងនោះដែរលោក បាន ហៅលោក ប្រាក់ ផានណូ មកអប់រំណែនាំ និងដាក់ពិន័យតាមច្បាប់កងកម្លាំង ។
លោក ម៉ី សារឿន មេឃុំបាក់ស្នារ បានឲ្យដឹងថា នៅថ្ងៃកើតហេតុ លោកប្រាក់ ផាន់ណូ បានដឹកនាំកម្លាំង ទៅការពារក្នុងពិធីបុណ្យភ្ជុំបិណ្ទ ស្ថិតនៅវត្តអណ្តោត ហើយក៏នាំកូនចៅផឹកស៊ីយ៉ាងសប្បាយ នៅផ្ទះរបស់ លោកមាស ខេរា លុះដល់ពេលស្រវឹងធ្លាក់ភ្នែក បានទាញកាំភ្លើងខ្លីបាញ់គំរាមកូនចៅចំនួន ៣គ្រាប់ ផ្ទុះ២ គ្រាប់ បានបង្ករឲ្យមានការភ្ញាក់ផ្អើលដល់អ្នកអណ្តោតដែលកំពុងតែសប្បាយ ដែលទៅការពារគេ បែជាមក បាញ់បោះដោយខ្លួនឯង ។
លោកមេឃុំ បានបន្តាថា ក្រោយមកលោក ប៉ូលិសទំនើងរូបនេះ បានវិលត្រឡប់មកប៉ុស្តិ៍រដ្ឋបាលវិញ មកដល់កណ្តាលផ្លូវ កូនចៅជ្រុះមួក ក៏ទាញអាយវុធបាញ់មួយគ្រាប់ទៀតដោយស្មានថាជាអាថ៌គោ រហូតដល់មានរថយន្តកូរ៉េដឹកសរសផ្ទះអោយស្រីមេម៉ាយ ក៏បាញ់២គ្រាប់ទៀត ដើម្បីជំរិតទារប្រាក់៥ម៉ឺនរៀល ទិញស្រាផឹក ។
ប្រជាពលរដ្ឋ បានសំណូមពរឲ្យ ឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ត្រី ជូរ សំអាន ស្នងការខេត្តកំពង់ធំ ចាត់វិធានការដាច់ខាតចំពោះលោក ប្រាក់ ផានណូ ជាប៉ូលិសទំនើង បាញ់បោះសេរី បង្ករភាពព្រួយបារម្ភណ៍ និងអសន្តិសុខដល់ ប្រជាពលរដ្ឋ និងសំណូមពរឲ្យមានការផ្លាស់ប្តូរប៉ូលិសរូបនេះចេញ ពីឃុំបាក់ស្នារ ។
