ខេត្តឧត្តរមានជ័យ ល្បែងស៊ីសងកន្ទុយលេខ កំពុងតែរីករាលដាលយ៉ាអាណាធិបតេយ្យ ដែលមានមេធំៗដល់ទៅជាង១០នាក់ ដែលមានកូនកញ្ច្រែងរាប់រយ អង្គុយកត់នៅនឹងកន្លែង និងបម្រើសេវាដល់ផ្ទះ បន្ទាប់ពីអាជ្ញាធរ និងសមត្ថកិច្ច ស្រុកបានបិទមួយរយៈពេលខ្លីកន្លងមក ។ សព្វថ្ងៃគេសង្កេតឃើញកូនកញ្ច្រែងដែលអង្គុយកត់កន្ទុយលេខនិងបម្រើសេវាតាមផ្ទះ កំពុងតែដើរអួត ក្តែងៗថា ឥឡូវនេះគ្មានអាជ្ញាធរ ឬសមត្ថកិច្ចណាហ៊ានបិទទៀតទេ ព្រោះមេធំកន្ទុយលេខ គ្រប់រូបបានបង់លុយទៅឲ្យអាជ្ញាធរ និងសមត្ថកិច្ចអស់ទៅហើយ ។ 
ហេតុនេះហើយពួកគាត់ដែលជាអ្នកកត់លេខមិនមានការព្រួយបារម្ភពីការប្រមាថមើលងាយ និងប្រមាថចាប់ពីស្ថាប័នណាទៀតទេ ។ ក្រោមការបើកចំហរបស់អាជ្ញាធរ ក៏ដូចជាសមត្ថកិច្ចមូលដ្ឋានបណ្តែតបណ្តោយឲ្យល្បែងស៊ីសងកើតមានពេញស្រុកយ៉ាងអាណាធិបតេយ្យ ដោយមិនគោរពតាមគោលនយោបាយរបស់ភូមិ ឃុំ មានសុវត្តិភាព ។បានធ្វើឲ្យប្រជាពលរដ្ឋនៅក្នុងស្រុក ទទួលរងគ្រោះជាបន្តបន្ទាប់ ជាពិសេសការកើនឡើងនៃអំពើហឹង្សាក្នុងគ្រួសារ ដែលប្រភពមួយបានបង្ហើបឲ្យដឹងថា ប្តីចេញទៅរកស៊ីបាត់ពីផ្ទះ ប្រពន្ធខ្ចីលុយចងការអ្នកជិតខាងលេងល្បែងស៊ីសងខាងលើ។
ជាក់ស្តែងសព្វថ្ងៃមេកន្ទុយលេខធំៗ ក្នុងចំណោមជាង១០នាក់នោះ គឺនៅក្នុងផ្សារអន្លង់វែងចាស់ចំនួន៣នាក់ និងផ្សាររង្វង់មូលអន្លង់វែងចំនួន ០៣នាក់ផងដែរ និងមាននៅតាមបណ្តាភូមិនៅក្នុងទីរួមស្រុកជាច្រើននាក់ទៀត ។ គួរបញ្ជាក់ផងដែរថា ល្បែងស៊ីសងកន្ទុយលេខបើមិនមានបើកភ្លើងខៀវ ពីអាជ្ញាធរស្រុក និងសមត្ថកិច្ចមូលដ្ឋានក្នុងស្រុក និងស្ថាប័នពាក់ព័ន្ធ
ផ្សេងៗទៀតនោះទេគឺមិនអាចប្រព្រឹត្តទៅបានយ៉ាងរលួនបែបនេះបានឡើយ ព្រោះប្រភេទល្បែងស៊ីសងខាងលើនេះ ពាក់ព័ន្ធ នឹងសកម្មភាពដែលកំពុងតែប្រព្រឹត្តគឺបើកចំហរពេញមួយទំហឹងតែម្តងដោយគ្មានការបិទបាំង និងលាក់លៀមអ្វីទាំងអស់ ។ ជុំវិញករណីខាងលើក្រុមការងារយើងបានធ្វើការទំនាក់ទំនងតាមទូរស័ព្ទទៅលោក ស៊ឹម វណ្ណៈ អធិការដ្ឋាននគរបាលស្រុកអន្លង់វែង ដោយលោកបានឲ្យដឹៀងថា ចាំលោកឲ្យកូនចៅទៅមើល តែសកម្មភាពដូចជាគ្មានការប្រែប្រួល ។ ដោយ បែន នួន
