ខេត្តកំពង់ឆ្នាំង ៖ ក្មេងស្រីអាយុ៦ឆ្នាំម្នាក់ បានស្រែកយំ និងរត់អោយអ្នកស្រុកជួយ ជាច្រើនលើកច្រើនសារ បន្ទាប់ពីម្តាយមីងរបស់ខ្លួនបានវាយធ្វើទារុណកម្ម និងបង្អត់បាយ ក្រោយពីប្រជាពលរដ្ឋបានរាយការណ៍ទៅអាជ្ញាធរស្រុក និង ឃុំ ពីករណីម្តាយមីងធើ្វបាបក្មួយនេះ អាជ្ញាធរស្រុកបានត្រឹមតែជនសង្ស័យមកសាកសួរកាលពីព្រឹកថ្ងៃទី៨ ខែកញ្ញា ឆ្នាំ២០១៤ ។
ក្មេងស្រីរងគ្រោះដែលត្រូវម្តាយមីងវាយធ្វើបាបនេះមានឈ្មោះ ស្រី ដា អាយុ៦ឆ្នាំ មានស្រុកកំណើតនៅខេត្តសៀមរាប ។ ដោយឡែកម្តាយមីងដែលវាយធ្វើបាបក្មួយស្រីនោះមានឈ្មោះ តាំង ហ្គិចសាង អាយុ៤៥ឆ្នាំ រស់នៅឃុំពន្លៃ ស្រុកបរិបូរណ៌ ខេត្តកំពង់ឆ្នាំង ។ ប្រជាពលរដ្ឋដែលរស់នៅក្បែរផ្ទះស្ត្រីនេះបានប្រាប់ថា ក្មេងស្រីត្រូវបានម្តាយមីងវាយធ្វើបាបសឹងរាល់ថ្ងៃទៅហើយ ពេលខ្លះវាយនឹងខ្សែភ្លើង និង ពេលខ្លះយករំពាត់ធំមកវាយធ្វើបាបយ៉ាងខ្លាំង និងមិនអោយបាយហូបទៀតផង ដែលសកម្មភាពនេះធ្វើអោយអ្នកស្រុកដែលរស់នៅក្បែរនោះអាណិតក្មេងស្រីនោះយ៉ាងខ្លាំង ប៉ុន្តែមិនហ៊ានរាយការណ៍ទៅសមត្ថកិច្ច ។
ប្រជាពលរដ្ឋបានប្រាប់ទៀតថា ជាក់ស្តែងការពីល្ងាចថ្ងៃទី៧ ខែកញ្ញា ស្ត្រីជាម្តាយមីងបានវាយក្មេងស្រីយ៉ាងខ្លាំង រហូតដល់ក្មេងស្រីរងគ្រោះ រត់ចេញពីផ្ទះចំនួន២ដងទៅសុំផ្ទះអ្នកស្រុកស្នាក់នៅ ដើម្បីគេចពីការធ្វើបាប របស់ស្ត្រីជាម្តាយមីងរបស់ខ្លួន ។ ដោយមើលឃើញពីការធ្វើទារុណកម្មរបស់ស្ត្រីម្តាយមីងមកលើក្មេងស្រីកាន់តែខ្លាំងឡើងៗ អ្នកស្រុកក៏បានអោយក្មេងស្រីស្នាក់នៅប្តឹងទៅអាជ្ញាធរអោយជួយអន្តរាគមន៌តែម្តង ។ នៅចំពោះមុខអាជ្ញាធរស្រុក ស្ត្រីឈ្មោះ តាំង ហ្គិចសាង បានប្រាប់ថា ខ្លួនពិតជាបានវាយធ្វើបាប ក្មួយស្រីរបស់ខ្លួនពិតប្រាកដមែន ដែលរូបគាត់តែងតែវាយធ្វើបាបសឹងតែរាល់ថ្ងៃទៅហើយ ដោយសារតែគាត់ខឹងនឹងក្មួយស្រីតែងតែលួចរបស់របរ អីវ៉ាន់នៅក្នុងផ្ទះ ។ ក្មួយស្រីរបស់គាត់ដែលយមកចិញ្ចឹមនេះ គឺយកមកពីខេត្តសៀមរាបកាលពីខែកក្កដា ឆ្នាំ២០១៣ ក្នុងពេលដែលឪពុកម្តាយរបស់ក្មេងស្រីរងគ្រោះទៅធ្វើការនៅស្រុកថៃអស់ ។ 
ស្ត្រីរូបនេះបានប្រាប់ទៀតថា គាត់មិនដឹងថាការវាយធ្វើបាបក្មួយស្រីរបស់ខ្លួននេះ វាខុសទៅនឹងច្បាប់នោះទេ។ ក្រោយពីធ្វើការសាកសួរហើយស្ត្រីរូបនេះ ត្រូវបានអាជ្ញាធរស្រុកដោះលែងអោយមានសេរីភាពវិញ មិនមានការឃាត់ខ្លួនទេ ។អាជ្ញាធរស្រុកបានប្រាប់ថា ករណីនេះជាករណីព្រហ្មទណ្ឌ ហើយនឹងប្រគល់តួនាទីនេះ ទៅសមត្ថកិច្ចជាអ្នកអនុវត្តបន្ត ។ 
នៅចំពោះមុខអាជ្ញាធរស្រុក ក្មេងស្រីរងគ្រោះបានប្រាប់ថា ខ្លួននឹងឈប់រស់នៅជាមួយម្តាយមីងរបស់ខ្លួនទៀតហើយ ព្រោះការរស់នៅជាមួយម្តាយមីង មានតែការវាយធ្វើបាបនាងមិនដែលលោះថ្ងៃណានោះទេ ធ្វើអោយនាងបាក់ស្លុតស្មារតី និងរៀនមិនបានដិតដល់នោះទេ ។រហូតមកដល់ពេលនេះ សមត្ថកិច្ចនៅពុំទាន់បានឃាត់ខ្លួនស្ត្រីរូបនោះនៅឡើយទេ ដោយគ្រាន់តែធ្វើការសាកសួរហើយដោះលែងទៅវិញ ៕ 
សីលា
