ខេត្តរតនគិរី : កម្លាំងអធិការដ្ឋាននគរបាលស្រុកលំផាត់ នៃស្នងការដ្ឋាននគរបាលខេត្តរតនគីរី បានចុះឃាត់ខ្លួនអ្នកបើករថយន្តម្នាក់ ក្រោយបើករថយន្តបុកអ្នកជិះម៉ូតូស្លាប់ម្នាក់ និងរបួសធ្ងន់ម្នាក់រួចមក។
ហេតុការណ៍គ្រោះថ្នាក់ចរាចរណ៍រវាងរថយន្ត និងម៉ូតូ បានកើតឡើងនៅចំណុចមុខតូបជាងម៉ាន លើផ្លូវជាតិលេខ៧៦ ចន្លោះបង្គោល ២៧១-២៧២ ស្ថិតនៅក្នុងភូមិដីឡូតិ៍ ឃុំជ័យឧត្ដម ស្រុកលំផាត់ ខេត្តរតនគិរី កាលពីថ្ងៃទី ១ ខែឧសភា ឆ្នាំ ២០២២។
មន្ត្រីនគរបាលស្រុកលំផាត់បានឲ្យដឹងថា ករណីខាងលើនេះ រថយន្តម៉ាកស្កេននៀ ពណ៌ស ពាក់ស្លាកលេខត្បូងឃ្មុំ 3A-3276 ធ្វើដំណើរពីជើងទៅត្បូង បើកបរដោយឈ្មោះ ថុល លីណេត ភេទប្រុស អាយុ ២៤ ឆ្នាំ ជនជាតិខ្មែរ មុខរបរអ្អ្នកបើកបររថយន្តដឹកដីក្នុងក្រុមហ៊ុនចម្ការចេកស្រុកលំផាត់ មានទីលំនៅភូមិរមូល ឃុំរអាង ស្រុកកំពង់សៀម ខេត្តត្បូងឃ្មុំ (គ្មានរបួស)។ 
អ្នករួមដំណើរ ឈ្មោះ ខុម សុឃា ភេទប្រុស អាយុ ៣១ ឆ្នាំ ជនជាតិខ្មែរ មុខរបរថៅកែរថយន្តដឹកដីក្នុងក្រុមហ៊ុនចម្ការចេកស្រុកលលំផាត់ មានទីលំនៅភូមិ ៥៥ ឃុំក្រែក ស្រុកពញាក្រែក ខេត្តកំពង់ចាម (គ្មានរបួស)។
ចំណែកភាគីម៉ូតូម៉ាកឆ្លាម ពណ៌ខ្មៅ គ្មានស្លាកលេខ ធ្វើដំណើរពីត្បូងទៅជើង បើកបរដោយឈ្មោះ ធៀង មៀង ភេទប្រុស អាយុ ២៥ ឆ្នាំ ជនជាតិឡាវ មុខរបរកសិករ មានទីលំនៅភូមិស្រែឈូក ឃុំជ័យឧត្តម ស្រុកលំផាត់ ខេត្តរតនគិរី បានស្លាប់នៅកន្កន្លែងកើត របួសបាក់ភ្លៅឆ្វេង បាក់កដៃឆ្វេង និងបែកមុមុខ។ 
ចំណែកអ្នករួមដំណើរ ឈ្មោះ ដុំ ឆវី ភេទប្រុស អាយុ ១៩ ឆ្នាំ ជនជាតិឡាវ មុខរបរ កសិករ មានទីលំនៅភូមិ-ឃុំជាមួយអ្នកបើកបរម៉ូតូ របួសធ្ងន់ បាក់ភ្លៅខាងឆ្វេង បាក់កដៃឆ្វេង ឈាមតាមច្រមុះ ត្រចៀក និងនិងរងការសន្លប់។
ក្រោយពេលកើតហេតុកម្លាំងនគរបាលជំនាញ នៃអធិការដ្ឋាននគរបាលស្រុកលំផាត់ បានតាមស្រាវជ្រាវរករថយន្តដែលបើកគេចចេញពីកន្លែងកើតហេតុ និងបានរកឃើញរថយន្ត និងអ្នកបើកបរ អ្នករួមដំណើរ ចម្ងាយជាង ១០ គីឡូម៉ែត្រពីកន្លែងកើតហេតុ។
ដោយមានការសម្របសម្រួលនីតិវិធីពីលោក លាង អ៊ូ ព្រះរាជអាជ្ញារងអមសាលាដំបូងខេត្តរតនគិរី បានធ្វើការឃាត់ខ្លួន អ្នកបើកបររថយន្ត ដែលមានអត្តសញ្ញាណខាងលើជាបណ្តោះអាសន្ននៅអធិការដ្ឋាននគរបាលស្រុកលំផាត់ ដើម្បីកសាងសំណុំរឿងតាមនីតិវិធី។
ចំពោះវត្ថុតាងរថយន្ត ១ គ្រឿង និងម៉ូតូ ១ គ្រឿង បានយកមករក្សាទុកនៅអធិការដ្ឋាន ដើម្បីបំពេញបែបបទតាមនីតិវិធី៕
