ខេត្តសៀមរាប៖ សមត្ថកិច្ច ចម្រុះចុះត្រួតពិនិត្យ និង បង្ក្រាបឈើប្រណិតជាច្រើនដុំដែល ដឹកនាំបញ្ជារផ្ទាល់ ដោយលោក សំរិទ្ធ សុខុន ព្រះរាជអាជ្ញារងអមសាលា ដំបូង ខេត្ត បានធ្វើការឆែកឆេរលំនៅដ្ឋានមួយកន្លែង រកឃើញឈើ ប្រណិតៗជា ច្រើន ដុំដែលបានសន្សំទុក សម្រាប់ធ្វើផ្ទះជាង១០ឆ្នាំមកហើយ ។
ប្រតិបត្តិការចុះបង្ក្រាបឈើប្រណិតនេះធ្វើឡើងនៅម៉ោង១០នឹង២០នាទីថ្ងៃទី០៨ខែសីហាឆ្នាំ២០១៤ ត្រង់ចំណុចផ្ទះដីឡូមួយកន្លែង ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ។ មន្ត្រីរដ្ឋបាលព្រៃឈើខេត្តបានឱ្យដឹងថា ម្ចាស់ផ្ទះឈ្មោះ ហេង សំណាង ភេទប្រុសអាយុ៣៩ឆ្នាំ មុខរបរ ជាគ្រូបង្រៀនមានស្រុកកំណើតនៅ ភូមិសួង សង្កាត់សួង ក្រុងសួង ខេត្តត្បូងឃ្មុំ បច្ចុប្បន្នរស់នៅភូមិកើតហេតុខាងលើ។ មន្ត្រីរដ្ឋបាលព្រៃឈើបន្ថែមថា ការចុះប្រត្តិបត្តិការ ត្រួតពិនិត្យ និងឈានដល់ធ្វើការឆែកឆេរនេះដោយមានដីការពីស្ថាប័នរបស់តុលាការ នឹង បញ្ជាផ្ទាល់ដោយលោកសំរិទ្ធ សុខុន ព្រះរាជអាជ្ញារងអមសាលាដំបូងខេត្ត ឲ្យចុះត្រួតពិនិត្យ រហួតរកឃើញឈើប្រណិតជាច្រើនដុំ។ មន្ត្រីជំនាញបាន តាមដាន ជាច្រើនខែមកហើយ ដោយក្ដាប់បានមុខសញ្ញាច្បាស់ហើយទើប សហការជាមួយសមត្ថកិច្ចចម្រុះសម្រេចចិត្តចុះ ឆែកឆេរតែម្ដង។
នៅចំពោះមុខសមត្ថកិច្ចលោក ហេង សំណាង បានអះអាងទាំងទឹកភ្នែកហូរគួរ ឲ្យសង្វែកថា ខ្លួនមានមុខរបរជាគ្រូបង្រៀនហើយមិនបានរកស៊ីឈើនោះទេ ឈើទាំងនេះគឺរូបខ្លួនបានសន្សំលុយទិញតាំងពីរឆ្នាំ២០០៣មកម្លេះ ពោលគឺទិញម្ដង៣ទៅ៤ដុំនៅម្ដុំផ្សារដើមក្រឡាញ់ តាមរយះអ្នកយកមកលក់ឲ្យ។ មន្ត្រីរដ្ឋបាលព្រៃឈើសៀមរាបបានឲ្យដឹងថា ឈើមានប្រភេទសុក្រមចំនួន២៥ដុំស្មើ នឹង ០.៩៦០ម៉ែត្រគូប ឈើប្រភេទធ្នង់ ចំនួន ៦៣ដុំស្មើ នឹង១.៣៩៧ម៉ែត្រគូប សរុបចំនួន ៨៨ដុំ ស្មើនឹង ២.៣៥៧ម៉ែត្រគូប បានដឹកយកទៅរក្សាទុកនៅថ្នាលបណ្ដុះកូនឈើខណ្ឌរដ្ឋបាលព្រៃឈើសៀមរាប ដែលមានទីតាំងស្ថិតនៅក្នុងស្រុកបន្ទាយស្រី។ មន្ត្រីជំនាញបានបន្ថែមថា ចំពោះការរឹបអូសវត្ថុតាងទាំងអស់នេះ សមត្ថកិច្ចទុកពេល ១៥ថ្ងៃ ដើម្បីឲ្យ
ម្ចាស់ចូលខ្លួនមកបង់ផាកពិន័យតាមច្បាប់រដ្ឋបាលព្រៃឈើ។ តែបើក្នុងរយៈពេល ១៥ ថ្ងៃម្ចាស់មិនចូលខ្លួនមកទេ មន្ត្រីរដ្ឋបាលព្រៃឈើ នឹង បញ្ជូនសំណុំរឿង ទៅតុលាការ ដំបូងខេត្តសៀមរាបដើម្បីអនុវត្តបន្តតាមច្បាប់ព្រៃឈើ។ បើតាមប្រភពពីម្ចាស់ឈើបានឲ្យដឹងថា រូបលោកបានទិញឈើបន្តិចបន្តួចនៅពេលដែលគាត់បានបើកប្រាក់ខែពីការបង្រៀនសិស្សជារឿងរាល់ខែម្តង បន្តិចៗ ដើម្បីសន្សំទុក ធ្វើផ្ទះមួយសម្រាប់ទុកឲ្យក្រុមគ្រួសារបានរស់នៅស្រួលប៉ុណ្ណោះ ប៉ុន្តែពេលនេះក្តីសង្ឃឹម របស់គាត់ត្រូវបានរលាយសាបសូន្យអស់មួយប៉ព្រិចភ្នែក៕ Bun rithy
