ថ្ងៃទី០៩ ខែកញ្ញា ឆ្នាំ២០១៤ ឯកឧត្តម កែន សត្ថា អភិបាលខេត្តកែប បានអញ្ជើញ ជាអធិបតីក្នុងពិធីសំណេះសំណាល សួរសុខទុក្ខ និងចែកអំណោយជូនដល់ស្ត្រីមេម៉ាយក្រីក្រជួបការលំបាក ចំនួន ២៥០ គ្រួសារដែលរៀបចំឡើងដោយមន្ទីរកិច្ចការនារី នៅក្នុងបរិវេណមជ្ឈមណ្ឌលអភិវឌ្ឍន៍ស្ត្រី ចំការដូង ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ។ លោកស្រី អ៊ុល ភិរុណ ប្រធានមន្ទីរកិច្ចការនារីខេត្តកែប បានឲ្យដឹងពីស្ថានភាពស្ត្រីនៅក្នុងខេត្តកែប ដែលក្នុងចំណោមប្រជាពលរដ្ឋរស់នៅអចិន្ត្រៃយ៍ចំនួន ៨.៥៧៥ គ្រួសារ ស្មើនឹងចំនួនមនុស្ស ៣៨.៧១៣ នាក់ គឺមាន ស្ត្រីចំនួន ២០.១៩៣ នាក់ ។
ស្ត្រីមេម៉ាយក្រីក្រជួបការលំបាកមានចំនួន ១.៤៣៧ គ្រួសារ ក្នុងនោះក្រីក្រកម្រិត១ មានចំនួន ៤៦៦ គ្រួសារ កម្រិត២ មាន ៩៧១ គ្រួសារ ។ ស្ត្រីមេម៉ាយក្រីក្រទាំងអស់នេះ សុទ្ធតែត្រូវការនូវការជួយឧបត្ថម្ភគាំទ្រ និង ផ្តល់សេវាពីស្ថាប័នពាក់ព័ន្ធ ដើម្បីស្តារស្ថានភាពរស់នៅរបស់ពួកគាត់ ឲ្យមានភាពនឹងនរឡើងវិញ ។ ឯកឧត្តម កែន សត្ថា បានកោតសរសើរ និង វាយតម្លៃខ្ពស់ ចំពោះការខិតខំប្រឹងប្រែង យកចិត្តទុកដាក់ របស់ថ្នាក់ដឹកនាំ និង មន្ត្រី រាជការ នៃមន្ទីរកិច្ចការនារីទាំងអស់ ក្នុងការបំពេញតួនាទីជាអ្នកផ្តល់សេវាប្រកបដោយប្រសិទ្ធិភាព និង តម្លាភាព ជួយដល់មុខសញ្ញារងគ្រោះ និង ងាយរងគ្រោះ ដើម្បីធានាឲ្យស្ត្រី ទទួលបាននូវការលើកកំពស់ស្ថានភាពរស់នៅក្នុងសង្គម ទាំងការពង្រឹងសិទ្ធិរបស់ស្ត្រី ការថែទាំសុខភាព ការអប់រំបណ្តុះបណ្តាលវិជ្ជាជីវៈ ការផ្តល់ឱកាសការងារ ការទទួលបានប្រាក់ចំណូល និង កិច្ចការពារខាងផ្លូវច្បាប់ដោយស្មើភាព ។
ឯកឧត្តម ក៏បានពាំនាំនូវការផ្តាំផ្ញើសួរសុខទក្ខ ប្រកបដោយក្តីនឹករលឹកដ៏ជ្រាលជ្រៅពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា និង សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែគិតគូរដល់សុខទុក្ខ និង ការលំបាករបស់ប្រជាពលរដ្ឋគ្រប់កាលៈទេសៈ ពិសេស ស្ត្រីមេម៉ាយក្រីក្រជួបការលំបាកខ្វះខាត ។ ឯកឧត្តម ក៏បានលើកឡើងពីប្រវត្តិសាស្ត្រ និង តថភាពនៃសង្គមពីអតីតកាល ដែលប្រទេសកម្ពុជាយើងមានសង្គ្រាមអូសបន្លាយអស់ជាច្រើនទសវត្ស ហើយបន្សល់ទុកនូវបញ្ហាជាច្រើន ដូចជា ការមិនបានទទួលឱកាសក្នុងការសិក្សា និង ការងារ គួបផ្សំនឹង សកលភាវូបនីយកម្ម និង គ្រោះធម្មជាតិ នាពេលបច្ចុប្បន្ន បានធ្វើឲ្យប្រជាជនត្រូវប្រឈមនឹងភាពក្រីក្រ អំពើហឹង្សា ដែលបណ្តាលមកពីកង្វះសីលធម៌ សុជីវធម៌ គុណធម៌ ចំណេះដឹង រវាងមនុស្សនៅក្នុងសង្គម និង គ្រួសារ ព្រមទាំងការឆ្លងរីករាលដាលនៃជម្ងឺអេដស៍ ។ ឆ្លើយតបនឹងបញ្ហាទាំងនេះ រាជរដ្ឋាភិបាលបានយកចិត្តទុកដាក់ រៀបចំគោលនយោបាយ បង្កើតយន្តការ និង ដាក់ចេញវិធានការសំខាន់ៗជាច្រើន ដើម្បីធានាសិទ្ធិ និង ឧត្តមប្រយោជន៍ របស់ ស្ត្រី កុមារ និង យុវវ័យ ។
ឯកឧត្តម បានផ្តាំផ្ញើដល់បងប្អូន ស្ត្រីទាំងអស់ ខិតខំបង្កបង្កើនផល អប់រំ ថែទាំ កូន ចៅ ឲ្យបានរៀនសូត្រចេះដឹងគ្រប់ៗគ្នា ដើម្បីអនាគតក្លាយជាពលរដ្ឋល្អ មានប្រយោជន៍ដល់សង្គមជាតិ ស្របតាមការយកចិត្តទុកដាក់របស់រាជរដ្ឋាភិបាលកម្ពុជា នាពេលបច្ចុប្បន្ន ។ ក្នុងឱកាសនោះ ឯកឧត្តម បានចែកជូននូវអំណោយរបស់រាជរដ្ឋាភិបាលផ្តល់តាមរយះមន្ទីរកិច្ចការនារីដល់ស្ត្រីមេម៉ាយក្រីក្រ ទាំង ២៥០ គ្រួសារ ដោយក្នុងមួយគ្រួសារៗទទួលបាន អង្ករ ២០ kgsត្រីខ ១០ កំប៉ុង ភួយសំឡី ០១ និង ថវិកា ១០.០០០ ៛ ។
បន្ទាប់មក ឯកឧត្តម ក៏បានអញ្ជើញពិនិត្យការដ្ឋានជួសជុលកែលម្អផ្លូវក្នុងក្រុង ០១ ខ្សែ ប្រវែងជាង ០១ គីឡូម៉ែត្រ ដែលគ្រោងនឹងចាក់កៅស៊ូឲ្យរួចរាល់នៅដំណាច់ខែកញ្ញា ឆ្នាំ២០១៤ នេះ និង ពិនិត្យការដ្ឋាន ចាក់ខ្សាច់បន្ថែម នៅលើឆ្នេរលេងទឹកត្រង់ចំណុចស្រីស ព្រមទាំង ពិនិត្យការដ្ឋានពង្រីកកំណាត់ផ្លូវជាតិលេខ ៣៣ អា ប្របមាត់សមុទ្រ ត្រង់ចំណុចផ្សារក្តាម ដែលកំពុងដំណើរការស្ថាបនាដោយមន្ទីរសាធារណការ និង ដឹកជញ្ជូនខេត្ត ។ដោយផន សុខជាំតិ
