កំពង់ឆ្នាំង៖នៅក្នុងរដូវកាន់បិណ្ឌនៃពិធីបុណ្យភ្ជុំបិណ្ឌប្រពៃណីខ្មែរ ក្នុងបិណ្ឌទី១ ត្រូវនិងនៅព្រឹកថៃ្ងទី៩ខែកញ្ញា ឆ្នាំ២០១៤ លោក ឈួរ ច័ន្ទឌឿនអភិបាលខេត្តនិងលោកជំទាវ និងដោយមានការចូលរួមពីលោកជំទាវ ដោក សុទ្ធាប្រធានក្រុមប្រឹក្សាខេត្ត លោកអភិបាលរងខេត្ត លោកលោកស្រី ប្រធានអនុប្រធានមន្ទីរ និងមន្ត្រីរាជការគ្រប់អង្គភាពជុំវិញខេត្តកំពង់ឆ្នាំង និងប្រជាពលរដ្ឋក្នុងក្រុងកំពង់ឆ្នាំង បានអញ្ជើញចូលរួមកាន់បិណ្ឌ១នៅវត្តអារញ្ញការាម ដើម្បីប្រគេនចង្ហាន់និងទ័យវត្ថុដល់ព្រះសង្ឃឧទ្ទិសកុសលផលបុណ្យជូនដល់មាតាបិតា និងបុព្វការីជនមានគុណដែលបានចែកឋានទៅតាមប្រពៃណី ស្ថិតនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។
គណៈកម្មការវត្តអារញ្ញការាមបានអោយដឹងថា៖បុណ្យបិណ្ឌភ្ជុំជាបុណ្យដ៏ធំមួយរបស់ដូនតាខ្មែរ ដែលកាន់ព្រះពុទ្ធសាសនា ហើយដែលជាប្រពៃណីតាំងពីបុរាណកាលមក តម្រូវប្រារព្ធពិធីបុណ្យនេះនៅតាមវត្ដអារាមនានាទាំងអស់រយៈពេល១៥ថ្ងៃនិង១៥យប់ គឺចាប់ពីថ្ងៃ១រោចខែភទ្របទ ដល់ថ្ងៃ១៤រោច ខែភទ្របទគេហៅថា «ថ្ងៃកាន់បិណ្ឌឬដាក់បិណ្ឌ» ឯ ថ្ងៃ១៥រោចខែភទ្របទ គឺមានតែរយៈពេល១ថ្ងៃនេះគេហៅថាជាថ្ងៃភ្ជុំបិណ្ឌ ដែលជាថ្ងៃធ្វើបុណ្យរួមគ្នាគ្រប់ក្រុមវេនទាំងអស់និងពុទ្ធបរិស័ទជិតឆ្ងាយ និងត្រូវបានអញ្ជើញមកជួបជុំគ្នាយកចង្ហាន់ប្រគេនព្រះសង្ឃទាំងចង្ហាន់ពេលព្រឹកនិងទាំងចង្ហាន់ពេលថ្ងៃត្រង់ខ្លះ។
ជាពិសេសគោលបំណងនៃបុណ្យនេះគឺគេហៅថាបុណ្យកតញ្ញុតាធម៌ដែលផុសចេញ ពីសន្ដានចិត្ដនៃពុទ្ធបរិស័ទឬប្រជាពលរដ្ឋខ្មែរទាំងមូលតែម្ដងដើម្បីឧទ្ទិសកុសលដល់ឪពុកម្តាយ និងញាតិទាំង៧សន្តានដែលបានស្លាប់ទៅអោយរួចពីទុក្ខទោសឬកម្មពារវេរាជាំអំពើបានទាំងឡាយ។ លោក ឈួរ ច័ន្ទឌឿន បានពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាទាំងបីជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីសម្តេចតែងគិតពីសុខទុក្ខរបស់ប្រជាពលរដ្ឋនិង ព្រះសង្ឃទាំងអស់នៅគ្រប់ទីកន្លែង ដោយមិនប្រកាន់និន្នាការនយោបាយឡើយ។
លោកក៏បានបន្តទៀតថា៖ក្រោមការដឹកនាំរបស់សម្តេចតេសែនជានាយករដ្ឋមន្ត្រីប្រទេសកម្ពុជា មានការរីកចំរើនលើគ្រប់វិស័យទាំងផ្នែកពុទ្ធចក្រ និងអាណាចក្រ ការរីកចំរើនទាំងអស់នេះអាស្រ័យដោយប្រទេសយើងមានស្ថេរភាពនិងសន្តិភាពផងដែរ អ្វីៗដែលយើងមាននៅថៃ្ងនេះគឹអាស្រ័យដោយយើងមានថៃ្ងជ័យជំនៈ៧មករា ឆ្នាំ១៩៧៩ ដែលជាកំណើតទី២របស់យើងទាំងអស់គ្នា។ លោក ឈួរ ច័ន្ទឌឿន បានមានប្រសាសន៍បញ្ជាក់ផងដែរថា៖ទម្លាប់ទំនៀមជាប្រពៃណីនៃការកាន់បិណ្ឌតាមវត្តអារាម នានា នៅក្នុងបាវចនាជាតិបានបញ្ជាក់ច្បាស់(ជាតិ សាសនា ព្រះមហាក្សត្រ ) គឺជា ពាក្យនៃការគ្រប់គ្រងរបស់ប្រទេសជាតិ ជាពិសេសការគ្រប់គ្រងរដ្ឋ ដែលក្នុងរដ្ឋធម្មនុញ្ញចែងថា ព្រះពុទ្ធសាសនាគឺជាសាសនារបស់រដ្ឋ។ លោកក៏បានសំណូមពរផងដែរសូមអោយប្រជាពលរដ្ឋទាំងអស់សូមចូលរួមគោរពច្បាប់រដ្ឋធម្មនញ្ញ ដែលជាច្បាប់កំពូលនិងអនុវត្តតាមគោលនយោបាយយុទ្ធចតុកោណតំណាក់កាលទី៣ នៃរាជរដ្ឋាភិបាលអាណត្តិទី៥ដែលដឹកនាំដោយសម្តេចអគ្គមហាសេនាបតីតេជោហ៊ុនសែនជានាយករដ្ឋមន្ត្រី ដែលបានកើតចេញពីឆន្ទៈរាស្ត្រពិតប្រាកដមានប្រជាជនភាគច្រើនបានគាំទ្រ ដើម្បីអភិវឌ្ឍន៍វិស័យព្រះពុទ្ធសាសនារបស់ជាតិអោយមានការរីកចំរើនតទៅអនាគត។ 
នៅក្នុងពេលចូលរួមកាន់បិណ្ឌ១នេះដែរ លោកអភិលាលខេត្ត និងលោកជំទាវ បានប្រគេនថវិកាសរុបចំនួន៤.០៤០.០០០រៀលសំរាប់កសាងពុទ្ធិកសកលវិទ្យាល័យព្រះសីហនុរាជខេត្តកំពង់ឆ្នាំង ប្រគេនសាដកនិងបច្ច័យដល់ព្រះសង្ឃ៤១អង្គ សរុបបច្ច័យចំនួន២.០៥០.០០០រៀល ជូនថវិកាដល់យាយជីតាជីចំនួន៥០នាក់ក្នុងម្នាក់ៗថវិកា១០.០០០រៀល និងបានរាប់បាតដើម្បីឧទ្ទិសកុសលដល់ជីដូនជីតាបងប្អូនសាច់ញ្ញាតិទាំង៧សន្តាន បុព្វបុរសយុទ្ធជនយុទ្ធនារី ដែលបានលះបង់ជីវិតដើម្បីជាតិនិងប្រជាជន និងឧទ្ទិសកុសលដល់ប្រជាពលរដ្ឋទាំងអស់ដែលបានស្លាប់បាត់បង់ជីវិតក្នុងរបបប៉ុលពតផងដែរ៕ ដោយផន សុខជាំតិ 
