កណ្តាល ៖ យុវជនចិត្តភ្លើងខឹងម្តាយស្តីបន្ទោសបន្តិចបន្តួចរឿងចាប់ឆ្កែយកធ្វើស៊ី រត់ចងកសម្លាប់ខ្លួន ។ ហេតុការណ៍នេះកើតឡើងនៅវេលាម៉ោង ៤ និង៣០នាទីព្រឹក ថ្ងៃទី១០ ខែកញ្ញា ឆ្នាំ២០១៤ ស្ថិតនៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល ។ ជនរងគ្រោះឈ្មោះ ជុំ ពន្លក ភេទប្រុស អាយុ២១ឆ្នាំ រស់នៅភូមិឃុំកើតហេតុខាងលើ បានយកខ្សែនីឡុងចងក ទៅនឹងដើមគគីរខាងក្រោយផ្ទះ លុះព្រឹកឡើងស្រាប់តែក្រុមគ្រួសារចុះទៅបត់ជើងដៃ ប្រទះឃើញក៏មានការភ្ញាក់ផ្អើលឡើងតែម្តង ។ 
ទង្វើបុរសរូបនេះធ្វើបែបនេះធ្វើឲ្យម្តាយបង្កើតមានវិប្បសារី ដោយនឹកស្មានមិនដល់គ្រាន់តែរឿងស្តីបន្ទោសបន្តិចបន្តួច គិតខ្លីចងកសម្លាប់ខ្លួន ។ ម្តាយជនរងគ្រោះឈ្មោះ ជុំ ចេង ភេទស្រី អាយុ៥៥ឆ្នាំ បានរៀបរាប់ថា នៅមុនថ្ងៃកើតហេតុកូនប្រុសរបស់គាត់បានចាប់សត្វឆ្កែយកទៅធ្វើស៊ីជាមួយមិត្តភក្តិរបស់គេ ក្នុងពេលនោះគាត់ជាម្តាយបានស្តីបន្ទោសស្រាប់តែកូនរបស់គាត់អត់ចូលផ្ទះរយះពេល២-៣ថ្ងៃដោយនឹកស្មានថាកូនរបស់គាត់នៅដើរលេងផឹកស៊ីជាមួយមិត្តភក្តិរបស់គេ ក្នុងភូមិ ។
ស្រាប់តែព្រឹកថ្ងៃទី១០ ខែកញ្ញា នេះក៏ប្រទះឃើញកូនគាត់ចងកសម្លាបខ្លួននៅខាងក្រោយផ្ទះមិនដឹងពីពេលណានោះទេ។ សាក្សីកន្លែងកើតហេតុបានឲ្យដឹងថា យុវជនរូបនេះត្រូវបានគេប្រទះឃើញដើរនៅក្នុងភូមិ ។ មានន័យថាជនរងគ្រោះរូបនេះចងកសម្លាប់ខ្លួននៅពេលយប់ម៉ិញនេះឯង ។ ទាក់ទិននៃការស្លាប់នេះសមត្ថកិច្ចជំនាញបចេ្ចកទេសកោសល្យវិច័យស្រុកកៀនស្វាយបានចុះទៅកន្លែងកើតហេតុធ្វើការពិនិត្យសព បញ្ជាក់ថាយុវជនរូបនេះគឺពិតជាបានចងកធ្វើអត្តឃាតដោយខ្លួនឯងប្រាកដមែន ។ ក្រោយពីបានពិនិត្យសពរួចសមត្ថកិច្ចប្រគល់សពឲ្យក្រុមគ្រួសារធ្វើបុណ្យតាមគន្លងប្រពៃណីខ្មែរ ៕ ដោយផន សុខជាតិ
