កណ្តាល ៖ រថយន្តកាមរីពណ៌ស្ក ពាក់ស្លាកលេខ ឆ4216 ភព2 បើកបោះពួយយ៉ាងលឿនក្នុងទិសដៅពីកើតមកលិចបានបុកលោកតាវ័យ៨៣ឆ្នាំម្នាក់ដើរឆ្លងថ្នល់ជាតិលេខ១បណ្តាលឲ្យស្លាប់បាត់បង់ជីវិតនៅនឹងកន្លែងកើតហេតុ ។ នៅក្នុងហេតុការណ៍នោះត្រូវបានប្រជាពលរដ្ឋរស់នៅតំបន់ក្បែរនោះចេញមកអន្តរាគមន៍ឃាត់រថយន្ត និងតៃកុងឡានបានភ្លាមៗ ប្រគល់ឲ្យសមត្ថកិច្ចចាត់ការតាមច្បាប់ចរាចរជើងគោក ។ ករណីគ្រោះថ្នាក់ចរាចរនេះកើតឡើងនៅវេលាម៉ោង១៨ និង៣៦នាទី ថ្ងៃទី៩ ខែកញ្ញា ឆ្នាំ២០១៤ តាមបណ្តោយផ្លូវជាតិលេខ១ ចន្លោះគីឡូម៉ែត្រលេខ៤៦-៤៧ ស្ថិតនៅភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្តាល ។
ជនរងគ្រោះស្លាប់បាត់បង់ជីវិតឈ្មោះ ស្រី មេង ភេទប្រុស អាយុ៨៣ឆ្នាំ រស់នៅភូមិឃុំកើតហេតុខាងលើ ខណះពេលដែលគាត់ដើរឆ្លងថ្នល់ជាតិស្រាប់តែរថយន្តបង្កបុកពេញទំហឹងបណ្តាលឲ្យស្លាប់ភ្លាមរំពេច នៅនឹងកន្លែង ។ ចំណែកតែកុងឡានដែលត្រូវឃាត់ខ្លួនឈ្មោះ រិន សាវ៉េត ភេទប្រុស អាយុ៣៣ឆ្នាំ មានទីលំនៅភូមិអូរដឹម សង្កាត់ចោមចៅ ខណ្ឌដង្កោ រាជធានីភ្នំពេញ បើកបររថយន្តចេញពីព្រុំដែនបាវិតខេត្តស្វាយរៀង ឆ្ពោះមកកាន់ទីក្រុងភ្នំពេញ លុះមកដល់ចំណុចកើតហេតុខាងលើបានបុកលោកតាវ័យ៨៣ឆ្នាំស្លាប់លើកំណាត់ផ្លូវជាតិលេខ១ ។
លោក ព្រុំ សំណាង អធីការរងទទួលផ្នែកចរាចរស្រុកកៀនស្វាយបានឲ្យដឹងថា តៃកុងឡានបង្កហេតុ កម្លាំងជំនាញចរាចរកំពុងកសាងសំណុំរឿងដើម្បីបន្តបញ្ចូនទៅតុលាការខេត្តកណ្តាលចាត់ការតាមច្បាប់ចរាចរជើងគោកថ្មី ៕ ផន សុខជាតិ
