កំពង់ឆ្នាំងៈ យោងតាមសេចក្តីសំរេចលេខ១៨សសរ ចុះថ្ងៃទី២៧ ខែមករា ឆ្នាំ២០១៤ របស់រាជរដ្ឋាភិបាល នៅព្រឹកថ្ងៃទី២៤ ខែកុម្ភៈក្នុងសាលាខេត្តកំពង់ឆ្នាំង ឯកឧត្តម្ភ អ៊ុក រ៉ាប៊ុន ប្រធានក្រុមការងារថ្នាក់ជាតិចុះមូលដ្ឋានខេត្តកំពង់ឆ្នាំង បានធ្វើការប្រជុំប្រកាសការបង្កើតក្រុមលេខាធិការ និងក្រុមការ ងារ ចុះមូលដ្ឋាននៅស្រុក ក្រុងទាំង៨ ក្នុងខេត្តកំពង់ឆ្នាំង ដើម្បីត្រួតពិនិត្យនិង គាំទ្រកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ ផែនការណ៍យុទ្ធសាស្ត្រអភិវឌ្ឍន៍ជាតិ របស់រាជរដ្ឋា ភិបាល អណត្តិទី៥។
ឯកឧត្តម អ៊ុក រ៉ាប៊ុន បានថ្លែងថា៖ដើម្បីធានាអោយក្រុមការងារចុះមូលដ្ឋានងាយស្រួលក្នុងការធ្វើសកម្មភាពទទួលបានលទ្ធផលល្អប្រសើរ រដ្ឋាភិបាលបានកំណត់អំពីតួនាទីភារកិច្ច និងរបបធ្វើការងារដែលមានខ្លឹមសារមួយចំនួនដូចជា៖ តួនាទីភារកិច្ច,ក្រុមការងារមានតួនាទីលើកកំពស់កិច្ចសហការសំរប សំរួលដោះស្រាយបញ្ហានានាដើម្បីបំរើផលប្រយោជន៍ជូនប្រជាពលរដ្ឋនៅមូលដ្ឋាន។
ក្រុមការងារពុំមានតួនាទីឬសិទ្ធសំរេចកិច្ចការជំនួសក្រសួងឬស្ថាប័ននានាឡើយ។ត្រូវផ្សាភ្ជាប់ទំនាក់ទំនងរវាងរដ្ឋាភិបាលនិង ប្រជាពលរដ្ឋតាមរយៈការផ្សព្វផ្សាយនូវកម្មវិធីនយោបាយ ផែនការយុទ្ធសាស្ត្រអភិវឌ្ឍន៍ជាតិ គោលនយោបាយភូមិឃុំមានសុវត្ថិភាព និងកម្មវិធីគោលនយោបាយគ្រប់វិស័យ ក៍ដូចជាសភាពការណ៍រួមរបស់ប្រទេសជាតិដោយផ្សាភ្ជាប់ជាមួយសភាពការណ៍ជាក់ស្តែងនៅមូលដ្ឋាន។ សហការជំរុញលើកកំពស់គណនេយ្យភាពរបស់ក្រសួង ស្ថាប័ន និងអាជ្ញាធររដ្ឋបាលថ្នាក់ក្រោមជាតិក្នុងការផ្តល់សេវាសាធារណៈ។សហការរៀបចំវេទិការសាធារណៈដើម្បីស្តាប់សំណូមពរនិងសំណើរ និងបញ្ហាប្រឈមរបស់ប្រជាពលរដ្ឋនិងយកចិត្តទុកដាក់ដោះស្រាយដោយផ្អែកលើច្បាប់និងលិខិតបទដ្ឋានគតិយុត្តនានារបស់ជាតិ។
ក្នុងនោះដែរឯកឧត្តមបានប្រកាសសេចក្តីសំរេចបង្កើតក្រុមលេខាធិការ១ក្រុម មានសមាសភាព១២រូប និងក្រុមការងារចុះមូលដ្ឋានក្រុង ស្រុកក្នុងខេត្តកំពង់ឆ្នាំងចំនួន៨ក្រុមដែលមានសមាសភាពចំនួន៧៣រូប។នៅក្នុងក្រុមការងារចុះមូលដ្ឋាននីមួយៗមានប្រធាន អនុប្រធាន និងសមាជឹកពី៧ទៅ១២រូប ដែលក្នុងនោះមានសមាសភាពជារដ្ឋលេខាធិការ អនុរដ្ឋលេខាធិការមកពីក្រសួង ស្ថាប័នផ្សេងៗ សមាជឹកក្រុមប្រឹក្សាខេត្តស្រុក ក្រុង គណៈអភិបាលខេត្ត គណៈអភិបាលស្រុកក្រុង និងប្រធានអនុប្រធានមន្ទីរជុំវិញខេត្ត។
នៅក្នុងកិច្ចប្រជុំនេះដែរក៍មានការពិភាក្សាផ្លាស់ប្តូរយោបល់ និងបទពិសោធន៍កន្លងមកយ៉ាងផុលផុស ដើម្បីពង្រឹងការចុះមូលដ្ឋានរបស់ក្រុមការងារអោយទទួលបានលទ្ធផលល្អ ប្រសិទ្ធិភាពខ្ពស់ និងសំរេចអោយបាននូវគោលនយោបាយចតុកោណ ដំណាក់កាលទី៣របស់រាជរដ្ឋាភិបាលកម្ពុជាក្នុងអណត្តិទី៥នេះ។
ក្នុងកម្មវិធីនេះដែរមានការចូលរួមពីឯកឧត្តម លោកជំទាវ លោក លោកស្រី មកពីក្រសួង និងស្ថាប័នថ្នាក់ជាតិ គណៈអភិបាលខេត្ត គណៈអភិបាលក្រុងស្រុក អាជ្ញាធរឃុំសង្កាត់ និងកងកំលាំងប្រដាប់អាវុធតាម មូលដ្ឋានគ្រប់អង្គភាពចូលរួមជាច្រើនផងដែរក្រោមអធិបតីភាពឯកឧត្តម អ៊ុក រ៉ាប៊ុន និងឯកឧត្តម ត្រាំ អ៊ីវតឹក ជាប្រធានអនុប្រធានក្រុមការងារថ្នាក់ជាតិ និងលោក ឈួរ ច័ន្ទឌឿន គណអភិបាលខេត្ត ជាអនុប្រធានអចិន្ត្រៃយ៍ នៃក្រុមការងារថ្នាក់ជាតិ៕ 
