ខេត្តព្រះវិហារ រថយន្ដអ្នកកាសែតម្នាក់ល្បីខាងបើកប្រដេញរថយន្ដដឹកបទល្មើសព្រៃឈើតាមដងផ្លូវជាតិលេខ៦២ក្នុងទិសដៅពីភូមិក្រាំងដូងចូលមកខេត្តព្រះវិហារបានជួបគ្រោះថ្នាក់ចរាចរត្រូវរថយន្ដដឹកឈើបុកពីក្រោយរថយន្ដអ្នកកសែតខណះបើកជែងក្នុងល្បឿនលឿនទៅចតពីមុខរថយន្ដដឹកឈើ។គ្រោះថ្នាក់ចរាចរនេះកើតទ្បើងនៅវេលាម៉ោង៥ទាបភ្លឺថ្ងៃទី១២កញ្ញា២០១៤ស្ថិតនៅចំណុចមុខវត្តប្រយុទ្ធក្នុងភូមិប្រយុទ្ធសង្កាត់ប៉ាលហាលក្រុងព្រះវិហារ។ រថយន្ដបង្កម៉ាកតូយ៉ូតាតាកូម៉ាពណ៌សមិនស្គាល់ស្លាកលេខបើកបរដោយឈ្មោះទិត្យស្រូភ្នាក់ងារកាសែតអាកាប៉េនិងអ្នកជិះម្នាក់ទៀតត្រូវជាកូនប្រុសហើយក៍ជាអ្នកកាសែតម្នាក់ដែរ។សាក្សីឃើញហេតុការណ៍បានអោយដឹងថាករណីគ្រោះថ្នាក់ចរាចរនេះរថយន្ដរបស់អ្នកកាសែតបានខ្ទាតចំងាយ
ជាង១០ម៉ែត្រធ្លាក់ចេញពីចិញ្ចើមផ្លូវជាតិលេខ៦២សំណាងល្អតៃកុងមិនជួបគ្រោះថ្នាក់ធ្ងន់ធ្ងរនិងទៅបុកប្រជាពលរដ្ឋកំពុងធ្វើដំណើរតាមដងផ្លូវនោះ។រថយន្ដបង្កម៉ាកតាកូម៉ារងការខូចខាតផ្នែកខាងក្រោយ។ សាក្សីបានបន្តទៀតថាមុនកើតហេតុគ្រោះថ្នាក់ចរាចរឃើញរថយន្ដកាមរីរបស់អ្នកកាសែត១ក្រុមទៀតបានចូលរួមប្រដេញយ៉ាងប្រកៀកប្រកិតគ្នាពេញផ្លូវជាតិលេខ៦២ជាមួយរថយន្ដដឹកឈើម៉ាកស្តារិច១២កៅអីពណ៌ត្រីឆ្លូញរហូតដល់បង្កអោយមានគ្រោះថ្នាក់ចរាចរកើតទ្បើងតែម្ដង។
សាក្សីនិយាយថាការខំបើកក្នុងល្បឿនលឿនរត់គេចពីក្រុមអ្នកកាសែតដែលយកដងផ្លូវជាតិធ្វើជាផ្ទះសំបែងនោះដោយសារភ័យខ្លាចនៅពេលកាក់ឃាត់រថយន្ដជាប់នឹងត្រូវអ្នកកាសែតជំរិតទារលុយច្រើនៗពីពួកគាត់ជាឈ្មួញឈើ។ហើយបើឈ្មួញឈើសំរួលអោយលុយតិចតួចនោះក្រុមអ្នកកាសែតនឹងកោះហៅជំនាញមេព្រៃមកចាប់យកទៅរក្សាទុកនៅស្នាក់ការមិនខាន។ សមត្ថកិច្ចនគរបាលមូលដ្ឋានបានអោយដឹងថាករណីគ្រោះថ្នាក់ចរាចរនេះហួសដៃពីសមត្ថកិច្ចជំនាញនគរបាលចរាចរព្រោះកំលាំងជំនាញមេព្រៃបានទៅអូសយករថយន្ដនិងវត្ថុតាងឈើប្រណីតក្នុងរថយន្ដទៅទុកនៅទីស្នាក់ការរបស់ខ្លួនរីឯរយថន្ដបង្កត្រូវអ្នកកាសែតហៅរថយន្ដស្ទូចមកស្ទូចហើយបើកគេចចេញទៅបាត់។ លោករ៉ាត់សោភាប្រធានមន្ទីរព័ត៌មានខេត្តព្រះវិហារបានអោយដឹងថាកន្លងមកអ្នកកាសែតអាកាប៉េម្នាក់នេះត្រូវបានគាត់ហៅមកនិយាយ
ណែនាំអោយបញ្ឈប់សកម្មភាពដេញរថយន្ដដឹកឈើដើម្បីទារលុយកាក់ពីឈ្មួញឈើប៉ុន្ដែត្រូវបានអ្នកកាសែតម្នាក់នេះបដិសេធថាគ្មានភស្តុតាងសំរាប់ចោទប្រកាន់គាត់ទេប៉ុន្ដែលើកនេះមានភស្ដុតាងជាក់ស្ដែងអញ្ចឹងចាំគាត់សួរបញ្ជាក់រឿងនេះ។ លោកឆេញសេងនាយផ្នែករដ្ឋបាលព្រៃឈើត្បែងមានជ័យបានអោយដឹងនៅព្រឹកថ្ងៃទី១២កញ្ញានេះថារថយន្ដដឹកឈើត្រូវបានយកមករក្សាទុកនៅទីកន្លែងរដ្ឋបាលព្រៃរបស់លោក។លោកនិយាយថាក្នុងរថយន្ដឃើញមានគល់ឈើធ្នង់ចាស់ៗចំនួន៨ដុំប៉ុណ្ណោះបើតាមការស៊ើបសួរទើបដឹងថារថយន្ដអ្នកកាសែតខាងលើពិតជាបើកដេញកាក់រថយន្ដដឹកឈើប្រាកដមែន។ម្ចាស់រថយន្ដដឹកឈើបានរត់គេចខ្លួនហើយទុករថយន្ដនិងគល់ឈើចោលនៅកន្លែងកើតហេតុហើយមិនទាន់ស្គាល់អត្តសញ្ញាណនៅទ្បើយទេ។ ប្រជាពលរដ្ឋរស់នៅភូមិប្រយុទ្ធបានរាយការណ៍អោយដឹងថានៅទល់មុខវត្តប្រយុទ្ធជាប់ផ្លូវជាតិលេខ៦២មានប៉ុស្ដិ៍កុងត្រូលជជុះដុះស្លែមួយកន្លែងត្រូវគេដឹងថាមានមេព្រៃឈ្មោះធាធីមមាននគរបាលសេដ្ឋកិច្ចក្រសួង
ឈ្មោះរ៉ា,សមត្ថកិច្ចកងរាជអាវុធហត្ថក្រុងព្រះវិហារហើយថែមទាំងមានអ្នកកាសែតនិងភ្នាក់ងារទូរទស្សន៍ខ្លះប្រចាំការ២៤ម៉ោងលើ២៤ម៉ោងដើម្បីចាំកាក់និងដេញរថយន្ដដឹកអនុផលព្រៃឈើខុសច្បាប់ដើម្បីទារលុយថ្លៃការពារ។ ប្រជាពលរដ្ឋនិយាយថាពួកគាត់ខំធ្វើស្រែចំការមួយរដូវមិនស្មើក្រុមកុងត្រូលជជុះប្រមូលលុយពីក្រុមឈ្មួញដឹកឈើរយះពេល១ខែផងដោយពួកគាត់បានស៊ើបការណ៍ដឹងថាក្នុង១ខែៗក្រុមនេះអាចរកលុយក្រៅផ្លូវច្បាប់បានចាប់ពី១ពាន់ដុល្លារដល់២ពាន់ដុល្លារអាមេរិកហើយមិនយូរខែប៉ុន្មានឃើញនាំគ្នាដូរស៊េរីរថយន្ដថ្មីៗស្ទើរគ្រប់គ្នា។ប្រជាពលរដ្ឋសំណូមពរដល់អាជ្ញាធរមូលដ្ឋានជួយប្រាប់កុងត្រូលជជុះខាងលើនេះអោយផ្លាស់ប្តូរទៅកន្លែងផ្សេងទៀតព្រោះជារៀងរាល់យប់ពួកគាត់ដេកមិនសូវលក់ទេឮតែសូរសំលេងដេញទ្បានដឹកឈើវីវូរំខានដំណេកខ្លាំងណាស់៕ ប៊ុន វាសនា
