ខេត្តកំពត៖ មានគេលួចទំលាយថា ល្បែងតាយ សីុវ គ្មានច្បាប់ទំលាប់មួយកន្លែងកំពុងបើកលេងយ៉ាងក្រអើតដោយជ្រកក្រោមផ្លាកយីហោ កាសីណូដឺវីមាណដែលមានទីតាំងក្នុងច្រកទ្វារអន្តរជាតិព្រែកចាក ស្ថិតក្នុងភូមិថ្កូវ ឃុំឫស្សីស្រុកខាងលិច ស្រុកកំពុងត្រាច ខេត្តកំពត ហើយល្បែងតាយ សីុវ ខុសច្បាប់ខាងលើបានលួចបើកលេងរាប់ខែមកហើយ ថែមទាំងភ្នាល់សីុសងធំៗ ដោយមានថៅកែជាជនជាតិវៀតណាម។
ចំពោះការបើកលេងល្បែង តាយ ស៊ីង ក្នុងបរិវេណកាស៊ីណូដឺវីមាណដោយចំហបែបនេះ គេមិនដឹងថា មេសីុសងជនជាតិវៀតណាមខាងលើរត់ការត្រឹមថ្នាក់ណានោះទេ ទើបហ៊ានបើកស្វាគមន៍ភ្ញៀវសឹងតែ២៤ម៉ោងបែបនេះឡើយ។ម្យ៉ាងទៀតល្បែងតាយ សីុវ ខាងលើបើកចាក់ភ្នាល់១ដៃៗរាប់ពាន់ដុល្លា ថែមទាំងមានមនុស្សចោមរោមចាក់សីុសងដូចគេមើលប៉ាហីុ ប៉ុន្តែបែរជាគ្មានអាជ្ញាធរឬសមត្ថកិច្ចជំនាញណាម្នាក់ទៅស្រៀសសៃម្តងសោះ។
ប្រភពដ៏ជឿរជាក់ខាងលើបានបង្ហើបទៀតថា ការបើកល្បែងតាយ សីុវ ក្នុងបរិវេណកាសីុណូ ដឺវីមាណ បានដោយរលូនបែបនេះ ដោយសារថៅកែជនជាតិវៀតណាមរូបនោះ សំអាងលើច្បាប់របស់កាសីុណូវីមាណតែប៉ុណ្ណោះទើបឆ្លៀតឱកាសមកសំងំបើកលេងសីុសងក្បែរៗនោះតែម្តង ព្រោះគេគិតថា ការបើកបនល្បែងក្នុងបរិវេណកាសីុណូពិតជាមានសុវត្ថិភាព គឺគ្មានអាជ្ញាធរឬសមត្ថកិច្ចជំនាញណាមួយមករំខានឡើយ ពិសេសជាងនេះទៅទៀត គ្មានខ្ទង់ចំណាយដូចម្ចាស់កាសីុណូនោះឡើយ ដោយគ្រាន់តែចំណាយបន្តិចបន្តួចជូនដល់អ្នកកាងមួយក្តាប់តូចប៉ុណ្ណោះ។
ប្រភពបានបញ្ជាក់ថា ល្បែងតាយ សីុវ ដែលកំពុងបើកលេង ដោយជ្រកក្រោមដំបូលកាសីុណូ ដឺវីមាណ នោះ ហាក់មានភាពក្រអើតគឺមិនខ្លាចច្បាប់ថែមទាំងគ្មានញញើតអាជ្ញាធរនិងសមត្ថកិច្ចតំបន់បន្តិចឡើយ កុំថាឡើយប៉ូលិស ប៉េអឹម សូម្បីស្ថាប័នជំនាញផ្សេងៗក៏ថៅកែល្បែងតាយ សីុវ ម្នាក់នេះព្រឺផង ហើយប្រសិនមានគេសួនាំមេតាយ សីុវ វៀតណាមនោះ បែរជាប្រាប់ថា ជារបស់កាសីុណូដឺវីមាណដែលមានច្បាប់ទម្លាប់ត្រឹមត្រូវ តែធាតុពិតលួចមកជ្រកក្រោមផ្លាកយីហោគេសោះ។
ដូច្នេះបើអាជ្ញាមានសមត្ថកិច្ចឬស្ថាប័នពាក់ព័ន្ធបានជ្រាបដូចសេចក្តីរាយការណ៍ ខាងលើនេះ សូមចុះមកត្រួតពិនិត្យឬបង្ក្រាបល្បៃង តាយ សីុវ ខុសច្បាប់ដែលកំពុងជ្រកកោនក្នុងបរិវេណកាសីុណូដឺវីមាណ នេះផងបើទុកយូរប្រយ័ត្នមានបញ្ហាកាន់តែធំ ព្រោះកន្លងមកមានគេលួចខ្សឹបថា មេបើកបនល្បែងនេះសុទ្ធតែលេងដោយប្រើល្បិចកល សីុលុយស្រស់ៗមិនត្រឹមតែសីុលុយដុងឬប្រាក់ដុល្លានោះទេ សូម្បីប្រាក់រៀលក៏សីុគ្មានប្រណីដែរ៕ ដោយផន សុខជាតិ
