ត្បូងឃ្មុំ៖ រថយន្តដឹកសំពីងសំពោងទាំងយប់ទាំងថ្ងៃ រហូតដល់ក្រឡាប់ ប្រជាពលរដ្ឋនាំគ្នារិះគន់ថា ដោយសារថៅកែរថយន្តដឹកទំនិញទាំងនោះ ស្គាល់ចិត្តប៉ូលីសរបស់ស្នងការខេត្តត្បូងឃ្មុំ ទើបហ៊ានដឹកបំពានបែបនេះ ហើយបណ្តាលឲ្យក្រឡាប់ទាំងព្រឹកថ្ងៃទី១១ ខែកញ្ញា ឆ្នាំ២០១៤ ចំណុច ជិតផ្សារស្ទឹងខាងលិច ស្ថិតក្នុងភូមិពោរោងលិច ឃុំកោងការ ស្រុកពញាក្រែក ខេត្តត្បូងឃ្មុំ ។ 
សមត្ថកិច្ចប៉ូលីសស្រុកពញាក្រែកបានឲ្យដឹងថា រថយន្តដែលក្រឡាប់នោះមានម្ចាស់ឈ្មោះ ចែដែត ផ្សារក្រែក ហើយរថយន្ត ម៉ាកហ៊ីណូ ពណ៌សលាយខៀវ ពាក់ស្លាកលេខ យ.០៦០០ ភ.ព.៣ ដឹកទំនិញ មាន មីសញ្ញាខ្លាឃ្មុំ សាប៊ូ ប្រដាប់ប្រដាក្មេងលេង និងឥវ៉ាន់ចាប់ហួយ យកមកពីប្រទេសវៀតណាម តាមច្រកអន្តរជាតិត្រពាំងផ្លុង ហើយមកក្រឡាប់ចំណុចខាងលើតែម្តង ។ ហេតុការណ៍នេះមិនបណ្តាលឲ្យមានមនុស្សរងរបួសឡើយ ។ ហើយប្រជាពលរដ្ឋឆ្ងល់ថា គេឃើញមានកម្លាំងប៉ូលីសចរាចររបស់លោក ស្នងការខេត្តដាក់នៅ ត្រួតពិនិត្យជិតសាលាខេត្តត្បូងឃ្មុំ ជាប់ជាប្រចាំដែរ ហេតុអីនៅតែមានរថយន្តដឹកសំពីងសំពោងយ៉ាងរលូនទៅវិញ ។
លោក ឧត្តមសេនីយ៍ត្រី ម៉ៅ ពៅ ស្នងការខេត្តត្បូងឃ្មុំវិញបានអះអាងថា កន្លងមកកម្លាំងយើងអនុវត្តន៍ជាបឋម ហើយមានភាពទន់ភ្លន់ទៀតនោះ បានពិន័យរថយន្តដឹកសំពីងសំពោងចំនួនរាប់រយគ្រឿង នឹងបានអប់រំធ្វើកិច្ចសន្យាបញ្ឈប់ការដឹកបែបនេះ ។ ឥលូវនេះយើងបានអនុវត្តន៍តាមច្បាប់ចរាចរ យើងបានទទួលគោលការណ៍ពីឯកឧត្តមនាយឧត្តមអគ្គស្នងការនគរបាលជាតិ និង ឯកឧត្តមអភិបាលខេត្តហើយ គឺរឹតបន្តឹងរថយន្តដែលដឹកសំពីងសំពោងបែបនេះ ត្រូវទំលាក់ចោលទាំងអស់ ហើយយើងត្រូវសហការរួមធ្វើទាំងអស់គ្នា ៕ដោយផន សុខជាតិ
