សៀមរាប ៖នៅរដ្ឋបាលសាលាខេត្តសៀមរាបនាព្រឹកថ្ងៃទី ១១ ខែ កញ្ញា ឆ្នាំ២០១៤នេះ មានបើកសិក្ខាសាលាផ្សព្វផ្សាយ និង ដាក់ឲ្យប្រើប្រាស់សៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយខេត្តឆ្នាំ២០១៤ ក្រោមអធិបតី ភាពរបស់លោកឃឹមប៊ុនសុងអភិបាលនៃគណៈអភិបាលខេត្តនិង ជាប្រធានគណៈកម្មាធិការគ្រប់គ្រងគ្រោះមហន្តរាយខេត្តសៀមរាប ដោយមានការចូលរួមពីសំណាក់ឯកឧត្តមលោកជំទាវ គណៈអភិបាលខេត្ត ថ្នាក់ដឹកនាំមន្ទីរ អាជ្ញាធរក្រុង ស្រុក ឃុំ សង្កាត់ និង អង្គការដៃគូចូលរួមផងដែរ។
អង្គសិក្ខាសាលាផ្សព្វផ្សាយដាក់ឲ្យប្រើប្រាស់សៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយខេត្តឆ្នាំ២០១៤ក្នុងគោលបំណងដើម្បីត្រៀមរៀបចំនិងត្រៀមឆ្លើយតបគ្រោះមហន្តរាយ ដែលបានកំពុងកើតឡើងពីមួយឆ្នាំទៅមួយឆ្នាំ សំដៅត្រៀមអន្តរាគមន៍ឲ្យបានទាន់ពេលវេលា និង មានប្រសិទ្ធភាព ក្នុងការជួយសង្គ្រោះអាយុជីវិតរបស់ប្រជាពលរដ្ឋ ដែលទទួលរងគ្រោះដោយសារមុខសញ្ញាគ្រោះថ្នាក់ផ្សេងៗ ។ បន្ទាប់ពីសេចក្តីរាយការណ៍របស់លេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តស្តីពីកិច្ច ដំណើរការធ្វើបច្ចុប្បន្នភាពសៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយឆ្នាំ២០១៤និង ការធ្វើ ចំណាប់អារម្មណ៍របស់លោកមេឃុំអន្លង់សំណរ ស្រុកជីក្រែង ស្តីពីការអនុវត្តសៀវភៅផែនការឆ្លើយតបគ្រោះមហន្ត រាយ និង ការធ្វើចំណាប់អារម្មណ៍ និង ទស្សនទាន ស្តីពីបទពិសោធន៍ ក្នុងការឆ្លើយតបគ្រោះមហន្តរាយរបស់អង្គការ ភ្លែនអន្តរជាតិរួចមក មានប្រសាសន៍នោះដែរលោកឃឹម ប៊ុនសុងបានគូសបញ្ជាក់ថាការផ្សព្វផ្សាយ និង ដាក់ឲ្យ ប្រើប្រាស់សៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយនេះមានសារៈសម្ខាន់ និង បង្ហាញពីការ យកចិត្តទុកដាក់ខ្ពស់រួមគ្នាមួយ ក្នុងកិច្ចការឆ្លើយតបទៅនឹងគ្រោះមហន្តរាយនានាដែលតែងតែកើតឡើងជារៀងរាល់ ឆ្នាំ ។
ម្យ៉ាងទៀតការធ្វើបច្ចុប្បន្នភាពសៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយឆ្នាំ២០១៤នេះក៏ ដោយមានការចូលរួម ពីក្រុមការងារលេខាធិការដ្ឋានគ្រប់គ្រងគ្រោះមហន្តរាយខេត្ត តំណាងមន្ទីរអង្គភាព អាជ្ញាធរ ក្រុង ស្រុក ឃុំ សង្កាត់ និង ដៃគូអភិវឌ្ឍន៍ និង អង្គការមិនមែនរដ្ឋាភិបាលនានា។ឯកឧត្តមបានបន្តទៀតថា ហានិភ័យ នៃគ្រោះមហន្តរាយ ដែលបានកើតឡើងជាបន្តបន្ទាប់នៅកម្ពុជា ក្នុងរយៈពេល១០ឆ្នាំចុងក្រោយតែងកើតឡើងញឹកញាប់ដែលបណ្តាលមកពីការប្រែប្រួលអាកាសធាតុ ការបំពុលបរិស្ថាន បានធ្វើឲ្យបាត់បង់អាយុជីវិតមនុស្សសត្វ ខូច ខាតហេដ្ឋារចនាសម្ព័ន្ធ ផលដំណាំ និង ទ្រព្យសម្បត្តិផងដែរ ។
លោកឃឹម ប៊ុនសុងបានបន្តទៀតថាមុខសញ្ញា គ្រោះថ្នាក់ បង្កឡើងដោយធម្មជាតិ និង ដោយមនុស្ស មានទឹកជំនន់ គ្រោះរាំងស្ងួតខ្យល់កន្ទ្រាក់ ខ្យល់ព្យុះ រន្ទះបាញ់ និង អគី្គភ័យជាដើម ។ ក្នុងឆ្នាំ២០១៣ទឹកជំនន់គ្របដណ្តប់លើខេត្តសៀមរាបបណ្តាលឲ្យក្រុង ស្រុកទាំង១២ ដោយ មាន៦៩ ឃុំ សង្កាត់ ស្មើ ៤៣៩ភូមិ ទទួលរងផលប៉ះពាល់ និងខូចខាត ទៅលើវិស័យផលិតកម្មសង្គមកិច្ច និង ហេដ្ឋារចនាសម្ព័ន្ធមួយចំនួនផងដែរ។ឯកឧត្តមបន្តទៀតថា នាដើមឆ្នាំ២០១៤នេះ ខេត្តសៀមរាបទទួលរងនូវឥទ្ធិពល ខ្យល់កន្ទ្រាក់ លាយឡំនឹងភ្លៀងហើយតំបន់មួយចំនួនបានជួបនូវអគ្គីភ័យ បានធ្វើឲ្យក្រុង ស្រុក០៨ មាន២សង្កាត់ និង ១២ឃុំស្មើ ៤៣ភូមិ បានបណ្តាឲ្យរបួសមនុស្ស ០៥នាក់ ងាប់គោ០១ក្បាល រលំផ្ទះ ៤០ខ្នង រលំតូប១៤ខ្នងទ្រេតផ្ទះ ០៣ខ្នង របើកដំបូល១០៤ខ្នង និង ឆេះផ្ទះ០៤ខ្នងផងដែរ ។ ក្នុងនោះគណៈកម្មាធិការគ្រប់គ្រងគ្រោះមហន្តរាយខេត្ត សហការជាមួយសាខាកាកបាទក្រហមកម្ពុជាខេត្តអង្គការដៃគូរពាក់ព័ន្ធបានចុះជួយអន្តរាគមន៍និងផ្តល់ អំណោយសង្គ្រោះបន្ទាន់ដល់បងប្អូនរងគ្រោះផងដែរ។លោកឃឹមប៊ុនសុងក៏បានលើកឡើងនូវ យន្តការល្អៗមួយចំនួនដើម្បីជាមូលដ្ឋានសម្រាប់មន្ទីរ អាជ្ញាធរមូលដ្ឋានគ្រប់ជាន់ថ្នាក់ក៏ដូចអង្គការដៃគូអភិវឌ្ឍន៍ក្នុងការគ្រប់គ្រងគ្រោះមហន្តរាយ ដើម្បីកាត់បន្ថយនូវផលប៉ះពាល់នៃគ្រោះមហន្តរាយដោយរួមសកម្មភាពដែលត្រូវអនុវត្តមុនពេលក្នុងពេលនិង ក្រោយពេលគ្រោះមហន្តរាយ។ក្នុងនោះដែរឯកឧត្តមក៏បានសង្កត់ធ្ងន់ទៅលើបញ្ហាគ្រោះមហន្តរាយ ដែលបង្កឡើងដោយគ្រោះថ្នាក់ចរាចរ បានបន្សល់នូវជនពិការ កុមារកំព្រាស្រី្តមេម៉ាយ ដែលជាបញ្ហាដល់សង្គម ។
ម្យ៉ាងទៀតនៅឆ្នាំ២០១៤នេះ ខេត្តសៀមរាបបានបញ្ជៀស និងកាត់បន្ថយនូវគ្រោះអគ្គីភ័យបានល្អ ក៏ដោយការយល់ ដឹង និង យកចិត្តទុកដាក់របស់ប្រជាពលរដ្ឋព្រមទាំងការចុះជួយអន្តរាគមន៍បានទាន់ពេលវេលារបស់សមត្ថកិច្ច ពន្លត់ អគ្គីភ័យយើងផងដែរ។លោកក៏បានផ្តាំផ្ញើដល់អាជ្ញាធរសមត្ថកិច្ចនិងអង្គការដៃគូទាំងអស់ ត្រូវមានកិច្ចសហការគ្នាឲ្យបានល្អសម្ខាន់បណ្តាអង្គការដែលមាននៅក្នុងមូលដ្ឋានខ្លួន ព្រមទាំងត្រូវត្រៀមបម្រុងនូវរាល់សម្ភារៈបរិក្ខាក្នុងការជួយសង្គ្រោះឲ្យបានគ្រប់ពេលវេលា។ ឯកឧត្តមក៏មានសង្ឃឹមជឿជាក់ផងដែរថាសៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយខេត្ត ឆ្នាំ២០១៤នេះនឹងក្លាយជាឯកសារដ៏មានតម្លៃសម្រាប់ប្រតិបត្តិការឆ្លើយតបនិងគ្រប់គ្រងគ្រោះមហន្តរាយ នៅក្នុងដែនសមត្ថកិច្ចរបស់ខ្លួនក្នុងការអនុវត្តគោលការណ៍ទាំងនេះប្រកបដោយប្រសិទ្ធភាពខ្ពស់។ ម្យ៉ាងទៀតសៀវភៅនេះ គឺប្រមូលផ្តុំទៅដោយយន្តការ វិធានការ មធ្យោបាយ ទិន្នន័យសម្ភារៈនិង ធនធានសម្ខាន់ៗ សម្រាប់ត្រៀមរៀបចំកាត់បន្ថយនិងឆ្លើយតបនៅពេលដែលគ្រោះមហន្តរាយកើតឡើងព្រមទាំង បានធ្វើការប្រកាស់ដាក់ឲ្យប្រើប្រាស់សៀវភៅផែនការត្រៀមបម្រុងសម្រាប់ឆ្លើយតបគ្រោះមហន្តរាយខេត្តឆ្នាំ ២០១៤ ជាផ្លូវការផងដែរ ។ដោយផន សុខជាតិ
