លោកចន ឃែរី បានអញ្ជើញទៅដល់ប្រទេសអេហ្ស៊ីប នៅថ្ងៃ១៣ខែកញ្ញា ក្នុងគោលដៅស្វែងរកការគាំទ្រ ពីបណ្តាប្រទេសអារ៉ាប់ នៅតំបន់ដើមបូព៌ា ដើម្បីរួមគ្នាបង្កើតសហប្រតិបត្តិការចំរុះមួយ ក្នុងការកម្ទេចក្រុមជីហាតអ៊ីស្លាមជ្រុលនិយម ដែលកំពុងតែយាយីអ៊ីរ៉ាក់ និងស៊ីរី។ អេហ្ស៊ីបដែលជាស្នូលចម្បងនៅក្នុងពិភពអារ៉ាប់ គឺជាគន្លិះសំខាន់ណាស់ក្នុងការដាស់ប្រទេសក្នុងតំបន់ ក៏ដូចជាបុព្វជិតសាសនាអ៊ីស្លាម ដើម្បីវាយបំបែកពួកជីហាតជ្រុលនិយម។ បន្ទាប់ពីលោកបារ៉ាក់ អូបាម៉ា បានធ្វើសេចក្តីថ្លែងការណ៍ ថានិងវាយកំទេចពួកជីហាតអ៊ីស្លាមជ្រុលនិយម ឲ្យអស់ លោក ចន ឃែរី ប្រមុខការទូតអាមេរិក
បានចាប់ផ្តើម ធ្វើយុទ្ធនាការប្រមែប្រមូល ប្រទេសអារ៉ាប់ឲ្យចូល រួមគ្នា ក្នុងការបោសសម្អាតពួកជីហាតនិយមជ្រុល។ គម្រោងរបស់លោកអូបាម៉ា គឺបង្កើតជាក្រុមសហប្រតិបតិ្តការចំរុះមួយ រវាងប្រទេសក្នុងតំបន់មជ្ឈឹមបូព៌ា និងសហរដ្ឋអាមេរិក ក្នុងការសហការគ្នាផ្តល់ពត៌មានទៅវិញទៅមក ទាំងផ្នែកយោធា និងនយោបាយ។ កាលពីថ្ងៃសៅរ៍ លោកចន ឃែរី បានអញ្ជើញទៅដល់ប្រទេសអេហ្ស៊ីប ដើម្បីជួបពិភាក្សាជាមួយប្រធានាធិបតីអេហ្ស៊ីប អាប់ឌែល ហ្វាត្តាស អាល់ ស៊ីស្ស៊ី និងលោក ប្រធាន
សម្ព័ន្ធអារ៉ាប់ ណាប៊ីល អាល់ អារ៉ាប៊ី។ តាមការឲ្យដឹងរបស់មន្ត្រីការទូតអាមេរិកដែលអមដំណើរលោកចន ឃែរី បំណងរបស់អាមេរិកក្នុងពេលនេះ គឺចង់បានការគាំទ្រពីស្ថាប័នកំពូលរបស់សាសនាអ៊ីស្លាម។ ស្ថាប័ននោះគឺសំដៅលើសកលវិទ្យាល័យអ៊ីស្លាមដ៏ធំជាងគេបំផុត ឈ្មោះអាល់ អាហ្សារ ដែលមានទីតាំងនៅក្រុងគែរ៍ ប្រទេសអេហ្ស៊ីប។ គួរបញ្ជាក់ថា អេហ្ស៊ីប គឺជាស្នូលនៃពិភពអារ៉ាប់ ពោលគឺប្រទេសនេះ ជាទីដែលមានមនោគមវិជ្ជា និងឥទ្ធិពលរបស់សាសនាអ៊ីស្លាម ទៅលើប្រទេសក្នុង
ពិភពអារ៉ាប់ទាំងមូល។ ទន្ទឹមនឹងនេះ មេពួកជីហាតនិយមជ្រុលភាគច្រើន ក៏មានដើមកំណើតពីអេហ្ស៊ីបដែរ។ អាមេរិក ប្រាថ្នាចង់ឲ្យ សកលវិទ្យាល័យនេះ ចេញជាអនុសាសន៍រួមមួយ ឲ្យដល់បណ្តាវិហារអ៊ីស្លាមទាំងអស់ ដោយប្រកាសថ្កោលទោសរាល់អំពើព្រៃផ្សៃ ដែលពួកជីហាតបានធ្វើ ព្រមទាំងអំពាវនាវឲ្យប្រជាពលរដ្ឋទូទៅ កុំគាំទ្រពួកអ៊ីស្លាមនិយមជ្រុលទាំងនោះ។ គម្រោងសហប្រតិបត្តិការចំរុះរបស់អាមេរិកនេះ បានទទួលការគាំទ្រពីប្រទេសចំនួន១០ហើយ ក្នុងពិភពអារ៉ាប់។ កត្តាសំខាន់
ដែលជំរុញប្រទេសអារ៉ាប់ឲ្យចូលរួមជាមួយអាមេរិក ក្នុងការកម្ទេចពួកឧទ្ទាមជីហាត គឺដោយសាប្រទេសទាំងនោះ ភ័យខ្លាចពួកភេរវករជីហាត បន្តរីករាលដាល ធ្វើសកម្មភាពក្នុងប្រទេសខ្លួន។ តាមពិតតាមបណ្តាប្រទេសស្ទើរតែទាំងអស់ក្នុងតំបន់ដើមបូព៌ា សុទ្ធសឹងតែមានពួកឧទ្ទាមអ៊ីស្លាមនិយមជ្រុល ដោយឡែកៗពីគ្នា។ ថ្វីត្បិតតែពួកនេះមិនមែនជាក្រុមតែមួយពិតមែន តែចំណុចរួមរបស់ពួកវា គឺការធ្វើភេរកម្មបង្កការភ័យខ្លាច និងភាពសាហាវយង់ឃ្នង ជ្រុលនិយមក្នុងការគោរពសាសនាអ៊ីស្លាម។ ដូច្នេះហើយ ទើបមានការបារម្ភថា ពួកនេះអាចរួបរួមគ្នា ជាមួយពួកជីហាតអ៊ីរ៉ាក់ និងពួកអាល់កាអ៊ីដា បង្កចលាចល
កាប់សម្លាប់ប្រជាជននៅតាមបណ្តាប្រទេសក្នុងតំបន់។ ទោះបីជាយ៉ាងណា អ៊ីរ៉ង់ ស៊ីរី និងទួកគីបានបដិសេធមិនចូលរួមក្នុងក្រុមចំរុះនេះទេ ដោយពួកគេ នៅមានភាពមន្ទិលសង្ស័យ ទៅលើប្រទេសអារ៉ាប់មួយចំនួន ដែលមានទំនាក់ទំនងស្នឹតជាមួយពួកជីហាត។ ចង់កម្ទេចពួកជីហាតនៅលើដែនដីមជ្ឈឹមបូព៌ាដ៏ធំល្វឹងល្វើយ មិនមែនជាការងាយទេ។ អ្វីដែលសំខាន់គឺ ទាល់តែកាត់ផ្តាច់ឲ្យបាន នូវប្រភពអាវុធរបស់ពួកនេះ ហើយនិងបិទច្រកចេញចូលរបស់ពួកឧទ្ទាម កុំឲ្យវាធ្វើចរាចរណ៍បាន៕ Bun rithy
