បន្ទាយមានជ័យ ៖ ជ្រូករស់ ចំនួន២១ក្បាល ដែលនាំចូល តាមច្រករបៀងអូរបីជាន់ ស្រុកអូរជ្រៅ ត្រូវបានកម្លាំង នគរបាលស្រុក សហការជាមួយ មន្ត្រីពេទ្យសត្វ បានស្ទាក់ចាប់នៅ ចំណុចភូមិកូនត្រី ស្ថិតក្នុងឃុំកូប កាលពីទៀបភ្លឺ ថ្ងៃទី១៥ ខែតុលា ឆ្នាំ២០១៤ រួចនាំយក មកការិយាល័យ បសុព្យាបាលខេត្ត ។ 
ហេតុការណ៍ ស្ទាក់ចាប់នេះ បានធ្វើអោយអាជីវករ ជាម្ចាស់ជ្រូក មានប្រតិកម្មយ៉ាងខ្លាំង ហើយឈានដល់ការ ទម្លាយរឿង សមត្ថកិច្ចពាក់ពន្ធ័ និងពេទ្យសត្វយកលុយពីពួកគាត់រួច បើកភ្លឿងខៀវអោយ មានការនាំចូល។ លោកស្រី មុំ អាជីវករ រស់នៅក្រុងប៉ោយប៉ែត បាននិយាយថា លោកស្រីបានចងការ យកលុយគេមករកស៊ី ហើយបានប្រកបដឹកជ្រូកនេះ ចេញពីប្រទេសថៃ តាមច្រករបៀងអូរបីជាន់ ក្នុងស្រុកអូរជ្រៅ ខេត្តបន្ទាយមានជ័យ ជាច្រើនឆ្នាំ មកហើយ ដោយបានការបើកភ្លើងខៀវ ពីសមត្ថកិច្ចជំនាញ ពេទ្យសត្វ និងសមត្ថកិច្ចពាក់ព័ន្ធ ជាច្រើនផ្សេងទៀត ។ 
លោកស្រី បានរកស៊ីយ៉ាងរលូន ជួបបញ្ហាបន្តិចបន្តួច គឺដោយសារតែបង់លុយ ជារៀងរាល់ខែអោយទៅ លោក ហ៊ុយ ទូច ប្រធានការិយាល័យ ផលិតកម្ម និងបសុព្យាបាល នៃមន្ទីរកសិកម្មខេត្ត ចំនួន៨០០ដុល្លារ និង១០០ដុល្លារ អោយទៅ ឈ្មោះ ម៉ាញ ជាមន្ត្រីពេទ្យសត្វ និង៥ម៉ឺនរៀល ផ្សេងទៀតអោយ ទៅឈ្មោះ ហេង ជាមន្ត្រីការិយាល័យនេះផងដែរ និងមានការបង់លុយ ដល់មន្ត្រីកាំកុងត្រូល ក្នុងមួយរថយន្ត ៥ម៉ឺនរៀលផងដែរ រីឯសមត្ថកិច្ច ពាក់ពន្ធ័ជាច្រើនទៀត ក្នុងមួយរថយន្ត មួយម៉ឺនរៀល នៅពេលដែលដឹកជ្រូក ចេញពីព្រំដែនម្តងៗ ។
លោកស្រីបន្តថា របរដឹកជ្រូកនេះ មិនមែនមានតែលោកស្រី ជាមួយ និងស្វាមីគាត់ទេ គឺមានឈ្មួញជាច្រើននាក់ទៀត ដែលខ្លះក៏មានច្បាប់ ដោយទិញលាយសិន ពីក្រុមហ៊ុន គេខ្លះក៏គ្មានច្បាប់ ប្រកបមុខរបរនេះ ដោយគ្រាន់តែត្រូវរ៉ូវ និងតាមការណែនាំ ជាមួយជំនាញ ជាការស្រេច ។ 
ហើយថ្មីៗនេះ លោកស្រីក៏បានរត់ទៅទិញលាយសិន ពីក្រុមហ៊ុនប៉ូប៉ូ ដែលទទួលសិទ្ធិដឹកជ្រូកពី ប្រទេសថៃ និងប្រទេសវៀតណាម មកចែកចាយក្នុង ប្រទេសកម្ពុជា សំរាប់រយះពេលបីខែ ដោយបង់លុយអោយ ក្រុមហ៊ុន ប៉ូប៉ូចំនួន១ម៉ឺន ដុល្លារ ដើម្បីលោកស្រីមានសិទ្ធិចែកចាយ ជ្រូករស់ក្នុងខេត្តបន្ទាយមានជ័យ ស្រាប់តែក្រុមពេទ្យសត្វ បែរជាចាប់ជ្រូកគាត់ទៅវិញ ឯអ្នកដឹកផ្សេងទៀត ត្រូវរួចខ្លួន ។ 
ឆ្លើយតបនិងការចាប់ ព្រមទាំងការចោទប្រកាន់នេះ លោក ហ៊ុយ ទូច ប្រធានការិយាល័យ ផលិតកម្ម និងបសុព្យាបាលបាននិយាយអោយដឹងថា ការចាប់ជ្រូកទាំង២១ក្បាល ខាងលើរបស់ឈ្មោះមុំ គឺដោយសារតែការដឹកជញ្ជូន មិនមានលិខិតអនុញ្ញាតិត្រឹមត្រូវ ហើយចំពោះការចោទប្រកាន់ថា មានការបង់លុយមួយខែ៨០០ដុល្លារ ជាសិទ្ធិសេរីភាព នៃការនិយាយស្តីករបស់គាត់៕ Jhon ny
