កំពង់ចាម៖ លោកស្នងការនគរបាលខេត្ត បានដឹកនាំកម្លាំងការិយាល័យជំនាញ សហការជាមួយកម្លាំងអធិការនគរបាលស្រុកព្រៃឈរ ចុះបង្ក្រាបទីតាំងឃ្លាំងស្តុកឈើក្រញូងដ៏ធំមួយកន្លែង នៅព្រឹកថ្ងៃទី១៤ ខែកញ្ញា ឆ្នាំ២០១៤ ស្ថិតចំណុចក្នុងភូមិដូនដី ឃុំជ្រៃវៀន ស្រុកព្រៃឈរ ខេត្តកំពង់ចាម ។
ក្នុងភារៈកិច្ចដ៏ក្តៅគគុកនេះដែរ កម្លាំងបានប្រមូលឈើក្រញូងប្រភេទឈើពេញខ្នាតបានមួយចំនួនធំ ផងដែរ។ លោក ឧត្តម សេនីយ៍ត្រី បែន រ័ត្ន ស្នងការនគរបាលខេត្តកំពង់ចាម បានបញ្ជាក់ឲ្យដឹងថា កម្លាំងសហការរបស់យើងគឺធ្វើឡើងតែមួយស្ថាប័នរបស់ស្នងការទេ ដោយមានការចង្អុលបង្ហាញពីឯកឧត្តម លន់ លឹមថៃ គណៈបញ្ជាការឯកភាពខេត្ត និង លោក ហួត វុទ្ធី ព្រះរាជអាជ្ញាអមសាលាដំបូងខេត្តផងដែរ ។
ហើយក្នុងភារៈកិច្ចដ៏ក្តៅគគុកនេះ កម្លាំងយើងបានចុះស្រាវជ្រាវ តាមដានស៊ើបអង្កេតយ៉ាងល្អិតល្អន់ ឈានទៅបង្ក្រាបនៅព្រឹកថ្ងៃខាងលើតែម្តងជាលទ្ធផលកម្លាំង បានរឹបអូសប្រមូលឈើក្រញូងពេញខ្នាតចំនួនជាង៨ម៉ែត្រគូប ដែលមានតម្លៃជិត៤០ម៉ឺនដុល្លារសហរដ្ឋអាមេរិច និងវត្ថុតាងមានជញ្ជីងចំនួន៣ សម្រាប់ថ្លឹងផងដែរ ។ 
ឥលូវយើងប្រមូលវត្ថុតាងល្មើសទាំងអស់ យកទៅរក្សាទុកនៅស្នងការខេត្ត ហើយបន្ទាប់យើងនឹងអនុវត្តន៍ទៅតាមច្បាប់ព្រៃឈើ ដោយយើងប្រគល់ទៅឲ្យខណ្ឌរដ្ឋបាលព្រៃឈើកំពង់ចាមតែម្តង ។ លោក ឧត្តមសេនីយ៍ស្នងការ បានបញ្ជាក់បន្ថែមទៀតថា ម្ចាស់ទីតាំង ជាប្រជាពលរដ្ឋសាមញ្ញនៅទីនេះ ម្ចាស់ឈើកំពុងតែគេចខ្លួន តែយើងស្គាល់អត្តសញ្ញាណ ទុកឲ្យជំនាញស៊ើបអង្កេតតាមក្រោយ ។ Jhon ny 
