អ្នកប្រកបរបរ រកស៊ីប៉ះកង់ តាមចិញ្ចើមផ្លូវមុខផ្សាររាត្រី ស្ថិតក្នុងសង្កាត់វត្ដភ្នំ ខណ្ឌដូនពេញ បានលង់ទឹកទន្លេស្លាប់ក្រោយពីរូបគាត់ចុះទៅងូតទឹកតែម្នាក់ឯង កាលពីវេលាម៉ោង១១និង២០នាទីព្រឹកថ្ងៃទី១៥ ខែកញ្ញា ឆ្នាំ២០១៤ ដែលប្រជាពលរដ្ឋសង្ស័យថា អាចមកពីរមួលក្រពើ ។ 
នាយនគរបាលប៉ុស្ដិ៍វត្ដភ្នំ លោកអ៊ុន សំអាត បានឱ្យដឹងថា ជនរងគ្រោះឈ្មោះប៉ុក យូ អាយុ៥៥ឆ្នាំ ជាអ្នករកស៊ីប៉ះកង់និងលក់សាំង នៅតាមផ្លូវលេខ១០២កែងផ្លូវព្រះស៊ីសុវត្ថិ សង្កាត់វត្ដភ្នំ ខណ្ឌដូនពេញហើយជនរងគ្រោះស្នាក់នៅកន្លែងប៉ះកង់នោះតែម្ដង ។ លោកអ៊ុន សំអាត បានបន្ដថា មុនពេលកើតហេតុ ជនរងគ្រោះបានចុះទៅងូតទន្លេ ស្រាប់តែលង់ស្លាប់តែម្ដង ។ 
ហើយក្រោយពីលោកទទួលបានព័ត៌មាននិងមិនឃើញសពជនរងគ្រោះអណ្ដែតមន្ដ្រីនគរបាលរបស់លោក និងសាច់ញាតិ ជនរងគ្រោះ បានជួលជនជាតិចាម ចុះរាវរកនៅក្នុងទឹក លុះមួយសន្ទុះក្រោយមកស្រាប់តែប្រទះឃើញសពដាច់ខ្យល់ស្លាប់បាត់ទៅហើយ ។ ក្រោយរាវរកសពជនរងគ្រោះឃើញហើយសមត្ថកិច្ចជំនាញ បានធ្វើកោសល្យវិច័យថា ស្លាប់បណ្ដាលមកពីលង់ទឹក ហើយសពត្រូវបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
