កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម បានសម្ដែងការគាំទ្រចំពោះសមាគមរាជសីហ៍ សម្រាប់សកម្មភាពមនុស្សធម៌ តាមរយៈការផ្តល់នូវក្តីស្រលាញ់ ការខ្វាយខ្វល់ និងការយកចិត្តទុកដាក់ទៅដល់ជនងាយរងគ្រោះ នៅខេត្តកំពង់ចាម ការថ្លែងបែបនេះក្នុងឱកាសជួបពិភាក្សាការងារជាមួយប្រតិភូថ្នាក់ដឹកនាំសមាគមរាជសីហ៍ នាព្រឹកថ្ងៃទី២៥ ខែកក្កដា ឆ្នាំ២០២២ ។
ឯកឧត្តម ស៊ូម សារឿន ប្រធានសមាគមរាជសីហ៍ បានលើកឡើងអំពីចក្ខុវិស័យរបស់សមាគម សំដៅផ្តល់ក្តីសង្ឃឹមទៅដល់ជនងាយរងគ្រោះមានដូចជាកុមារកំព្រា ចាស់ជរាគ្មានទីពឹង និងស្ត្រី មេម៉ាយក្រីក្រ នៅតាមសហគមនមូលដ្ឋាន ព្រមទាំងផ្តល់ស្ថានបត្យកម្មព្រលឹងដល់យុវជន នៅក្នុងការ អភិវឌ្ឍសង្គមទៀតផង ។
ឯកឧត្តម ស៊ូម សារឿន បានបន្តថា បេសកម្ម របស់យើងគឺ ការប្រមូលមូនិធិដែលជាជំនួយមនុស្សធមរបស់សប្បុរសជនក្នុង និងក្រៅប្រទេស និងប្រើប្រាស់ មូលនិធិទាំងនេះសម្រាប់សកម្មភាពមនុស្សធម និងសប្បុរសធម។ ព្រមទាំងកែលម្អគុណភាពជីវិតរបស់ជនងាយរងគ្រោះនៅក្នុងសង្គម តាមរយៈការផ្តល់នូវក្តីស្រលាញ់ ការខ្វាយខ្វល់ និងការយកចិត្តទុកដាក់ទៅដល់ពួកគាត់ដោយមិនគិតពីវប្បធម សាសនា និន្នាការនយោបាយ និងស្ថានភាពរបស់បុគ្គលក្នុងសង្គមផងដែរ ។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានថ្លែងអំណរគុណចំពោះសមាគមរាជសីហ៍ ដែលបានឧបត្ថម្ភ អង្ករ ចំនួន២តោន មី ១០០កេស ត្រីខ ១០០យួរ និងទឹកបរិសុទ្ធ ១០០កេស ផ្តល់ជូនរដ្ឋបាលខេត្តកំពង់ចាម សម្រាប់ប្រេីប្រាស់ក្នុងសកម្មភាពមនុស្សធម៌ផងដែរ ៕
