អតីតអ្នកចាត់ការក្លិបមេឃខៀវ Manchester City លោក Roberto Mancini បានបង្ហាញពីចំណាប់អារម្មណ៍ ចង់ក្លាយជាគ្រូបង្វឹករបស់ក្រុមជម្រើសជាតិព័រទុយហ្គាល់ ។ Mancini បច្ចុប្បន្នមិនទាន់មានការងារឡើយចាប់តាំងពីរូបគាត់បានចាកចេញពីក្លិប Galatasaray កាលពីខែ មិថុនា ហើយបុរសសញ្ជាតិអ៊ីតាលីវ័យ៤៩ឆ្នាំរូបនេះបានអះអាងថា គាត់ចង់ក្លាយជាគ្រូបង្វឹកជម្រើសជាតិព័រទុយហ្គាល់ បន្ទាប់ពីលោក ប៉ាវឡូ បេនតូ (Paulo Bento) ត្រូវបានបណ្តេញចេញក្រោយពេលព័រទុយហ្គាល់ ប្រកួតចាញ់ អាល់បានៀ១-០ក្នុងយុទ្ធនាការជម្រុះយូរ៉ូ ។
លោក Mancini ប្រាប់អ្នកសារព័ត៌មានថា “ជាការពិតខ្ញុំចង់ដឹកនាំព័រទុយហ្គាល់ព្រោះក្រុមនេះសម្បូរទៅដោយ កីឡាករល្អៗច្រើនហើយនេះជាក្លិបល្អមួយនៅអឺរ៉ុប” ។ គួរបញ្ជាក់ថា ថ្វីបើលោក Mancini ចំណាយពេលត្រឹមតែ៩ខែដឹកនាំ Galatasaray ក៏ដោយប៉ុន្តែលោកបាន ជួយឲ្យក្លិបនេះឈ្នះជើងឯកទួរគីខាប់ផងដែរកាលពីរដូវកាលមុន ៕ដោយផន សុខជាតិ
