កំពង់ឆ្នាំង៖លោក ឈួរ ច័ន្ទឌឿន អភិបាលខេត្តកំពង់ឆ្នាំង រួមដំណើរដោយលោក អ៊ុន សំអុល អភិបាលរងខេត្ត លោក អម សុភា នាយករដ្ឋបាលសាលាខេត្ត លោក ម៉ម ឈឿម ប្រធានមន្ទីរព័ត៌មានខេត្ត លោកធន់ ធឿន មេបញ្ជាការតំបន់ប្រតិបត្តិការសឹករងខេត្ត និងថ្នាក់ដឹកនាំជាច្រើនទៀតនៅរសៀលថៃ្ងទី១២ខែកញ្ញាឆ្នាំ២០១៤ បានអញ្ជើញចុះសាកសួរសុខទុក្ខពលទាហ៊ាន នាយទាហ៊ាននៅក្នុងស្រុកទឹកផុស នៅក្នុងឱកាសបុណ្យភ្ជុំបិណ្ឌនេះ និងបានផ្តល់ថវិកាចំនួន៣ម៉ឺនដុល្លាសំរាប់សង់អគារស្នាក់ ជូនដល់អង្គភាព កងវរៈសេនាតូចលេខ១ ស្ថិតនៅស្រុកទឹកផុស ខេត្តកំពង់ឆ្នាំង។ 
លោក ឈួរ ច័ន្ទឌឿន អភិបាលខេត្តកំពង់ឆ្នាំង បានមានប្រសាសន៍ថា៖ ការផ្តល់ជូនថវិកាដល់បញ្ជាការដ្ឋានវរៈសេនាតូចលេខ១ សម្រាប់សាងសង់អគារនេះ គឺបន្ទាប់ពីពិនិត្យឃើញអគារស្នាក់នៅរបស់ពលទាហ៊ាន និងនាយទាហ៊ាននៅទីនោះ មានសភាពចាស់ទ្រុឌទ្រោមខ្លាំង ដែលធ្វើអោយមាន ការលំបាកដល់ការរស់នៅ របស់ពលទាហ៊ាន នាយទាហ៊ាន ដែលបំពេញបេសកកម្មនៅទីនោះ ។ លោកអភិបាលខេត្ត បានមានប្រសាសន៍ទៀតថា៖ ថវិកាដែលបានផ្តល់ជូននៅពេលនេះគឺ ត្រូវយកទៅប្រើប្រាស់អោយបានចំទិសដៅ និងមានតម្លាភាពក្នុងគោលដៅ ដើម្បីសាងសង់អគារស្នាក់នៅ អោយមានគុណភាពល្អ ធានាបានការប្រើប្រាស់បានយូរអង្វែង សម្រាប់ផលប្រយោជន៍អង្គភាពនាពេលបច្ចុប្បន្ននិងសំរាប់នាថៃ្ងអនាគត ។ 
លោក ឈួ រច័ន្ទឌឿន អភិបាលខេត្តបានមានប្រសាសន៍ផ្តាំផ្ញើ អោយពលទាហ៊ាន និងនាយទា ហ៊ានទាំងអស់ត្រូវចេះថែទាំសុខភាព និងរួមសាមគ្គីសហការគ្នាក្នុងអង្គភាព ជាមួយអាជ្ញាធរដែនដីប្រជាពលរដ្ឋអោយបានល្អ ដើម្បីសមជាកងទ័ពបំរើប្រជាជន និងដើម្បីឈានទៅសំរេចអោយបានជោគជ័យរាល់ភារកិច្ចដែលថ្នាក់លើបានប្រគល់អោយ។ លោកឧត្តមសេនីយត្រី ធន់ ធឿន មេបញ្ជាការតំបន់ប្រតិបត្តិការសឹងរងខេត្តកំពង់ឆ្នាំង តំណាងអោយពលទាហ៊ាន និងនាយទាហ៊ានទាំងអស់ បានថ្លែងអំណរគុណយ៉ាងជ្រាវជ្រៅដល់លោក ឈួរ ច័ន្ទឌឿន អភិបាលខេត្តកំពង់ឆ្នាំង ដែលបានយល់ពីការលំបាក និងគិតគូរពីសុខទុក្ខនិងការរស់នៅរបស់កងទ័ព។
ក្នុងនាមជាមេបញ្ជាការតំណាងអោយពលទាហ៊ាន និងនាយទាហ៊ានទាំងអស់ សូមប្តេជ្ញាអនុវត្តន៍អោយបានជោគជ័យរាល់ភារកិច្ចដែលថ្នាក់លើប្រគល់អោយ និងសូមជូនពរ លោកអភិបាលខេត្ត អោយមានសុខភាពល្អបរិបូរណ៌ និងទទួលបានជោគជ័យគ្រប់ភារកិច្ច ដើម្បីដឹកនាំខេត្តកំពង់ឆ្នាំងអោយកាន់តែមានការរីកចំរើន កសាងបានសមិទ្ធផលថ្មីៗថែមទៀតដើម្បីទុកជាមរតកជូនប្រជាពលរដ្ឋខេត្តកំពង់ឆ្នាំង៕ ដោយផន សុខជាតិ 
