បន្ទាយមានជ័យ ះ លោកឧបនាយករដ្ឋមន្ត្រី ប៊ិន ឈិន ប្រធានអាជ្ញាធរជាតិដោះស្រាយវិវាទដីធ្លីក្នុងវេទិការប្រជុំត្រួតពិនិត្យការដោះស្រាយវិវាទដីធ្លីក្នុងសាលប្រជុំសាលាខេត្តបន្ទាយមានជ័យនាព្រឹកថ្ងៃ១៧ខែ០៩ឆ្នាំ២០១៤ ដែលមានការចូលរួមពីគ្រប់ប្រធាន អនុប្រធានមន្ទីរជុំវិញក្នុងខេត្តនិងកងកម្លាំងគ្រប់ប្រភេទ "មន្ត្រីដែលទទួលការងារដោះស្រាយវិវាទដីធ្លីក្នុងខេត្តបន្ទាយមានជ័យទាំងអស់សូមកុំយកកន្ទេលធំប្រឡំដេកអោយសោះ ដែលធ្វើអោយការដោះស្រាយគ្មានប្រសិទ្ធភាពហើយវាបានក្លាយជាជម្ងឺមហារីកមិនអាចព្យាបាលបាន"។
លោក គោ ស៊ុមសារឿត អភិបាលខេត្តបន្ទាយមានជ័យនិងជាប្រធានគណះកម្មការដោះស្រាយវិវាទដីធ្លីថ្នាក់ខេត្តបានលើកឡើងថា បញ្ហាទំនាស់ដីធ្លីនៅក្នុងខេត្តពិតជាបញ្ហាដ៏ស្មុគស្មាញ ពិបាកក្នុងការដោះស្រាយ ហើយវាក៏បានបន្តភាពស្មុគស្មាញនេះដល់អាជ្ញាធរខេត្តពីមួយអាណត្តិទៅមួយអាណត្តិ ក្នុងនោះលោកក៏បានទទួលបន្ទុកនូវអំរែកនេះដែរ។ ជានេះលោកក៏បានលើកបន្ថែមដោយបញ្ជាក់ថា មានការវិវាទខ្លះបានផ្តើមចេញពីអ្នកមានអំណាច ពីការសម្បទានដីសេដ្ឋកិច្ច តែខ្លះប្រជាពលរដ្ឋក៏ខូចណាស់ដែរដែលដីរបស់ពួកគាត់លក់អស់កាលដីនៅមិនទាន់មានហាងឆេង លុះដល់ដីឡើងថ្លៃក៏វិលចូលទៅកាន់កាប់ជាថ្មីហើយចោទប្រកាន់គេថារំលោភយក ។ឯខ្លះទៀតបានចូលកាន់កាប់ដោយខុសច្បាប់នូវដីព្រៃឈើរបស់រដ្ឋ ។
បន្ទាប់មក លោកឧបនាយករដ្ឋមន្ត្រី ប៊ិន ឈិន បានថ្លែងថា វិវាទដីធ្លីវាបានកើតមានគ្រប់ខេត្តក្រុង ការដោះស្រាយក៏បាននិងកំពុងបន្តដោះបានបន្តបន្ទាប់ ហើយខ្លះក៏មិនអាចដោះបានដោយគូវិវាទមិនបានសម្របខ្លួនអោយមន្ត្រីជំនាញធ្វើការដោះស្រាយឬមិនទទួលយកលទ្ធផលនៃការដោះស្រាយរបស់ក្រុមគណះកម្មការ។ លោកក៏បានបញ្ជាក់ផងដែរពី
ការដោះស្រាយថា ការដោះស្រាយមិនអាចមានប្រសិទ្ធិភាពទេ ប្រសិនជាគណះកម្មការខ្លះទទួលយកប្រយោជន៍និងឈរនៅពីក្រោយនៃការវិវាទនេះ ដូច្នេះកន្ទេលធំសូមកុំប្រឡំដេក។ក្នុងនោះលោកបានជំរុញអោយមន្ត្រីជំនាញពាក់ពន្ធ័សូមអោយពិនិត្យឡើងវិញដល់ព្រៃសម្បទានចំនួនបីដែលកំពុងតែមានបញ្ហាជាមួយពលរដ្ឋដូចជានៅស្រុកថ្មពួក រឿងជនពិការដែលបានប្តឹងត្រូវដោះស្រាយដោយបែងចែកអ្នកចាស់និងអ្នកថ្មី៕ដោយផន សុខជាតិ
