ខេត្តព្រះសីហនុ ថ្ងៃទី១៧ ខែកញ្ញា ឆ្នាំ២០១៤ មន្ត្រីរាជការ កងកម្លាំងប្រដាប់អាវុធសិស្ស និស្សិត និងប្រជាពលរដ្ឋខេត្តព្រះសីហនុអបអរសាទរទិវាសន្តិភាពអន្តរជាតិ ២១កញ្ញា ឆ្នាំ២០១៤ លើកទី១២ ក្រោមអិបតីភាពឯកឧត្តម ឈិត សុខុន អភិបាលខេត្តព្រះសីហនុ ។ 
ឯកឧត្តម ឈិត សុខុន មានប្រសាសន៌គូសបញ្ជាក់ថា រាជរដ្ឋាភិបាលកម្ពុជាបានចេញអនុក្រឹត្យលេខ ៣១អនក្របក ចុះថ្ងៃទី០៩ ខែឧសភា ឆ្នាំ២០០៣ បានកំណត់យកថ្ងៃទី២១ខែកញ្ញា ជាថ្ងៃប្រារព្ឋទិវាសន្តិភាពអន្តរជតិនូវទូទាំងប្រទេសជារៀងរាល់ឆ្នាំ ។ ការប្រារព្ឋទិវាសន្តិភាពអន្តរជាតិថ្ងៃទី២១ ខែកញ្ញា លើកទី១២ ក្នុងគោលបំណងពង្រឹងឧត្តមគតិសន្តិភាពរបស់ប្រជាជាតិ និងប្រជាជនទាំងអស់ទូទាំងពិភពលោក ដោយពង្រឹងសាមគ្គីភាព និងកិច្ចសហប្រតិបត្តិការទំនាក់ទំនងល្អ
ពីជាតិមួយទៅជាតិមួយ ទាំងក្នុងតំបន់ក៏ដូចជានៅទូទាំងសកលលោក ដើម្បីបន្ថយភាពតានតឹងនឹងមានសាមគ្គីភាពយោគយល់ អធ្យាស្រ័យគ្នា គោរពគ្នាទៅវិញទៅមក និងជួយគ្នាលុបបំបាត់អំពើហិង្សា ការប្រទុស្គរាយ ដែលនាំឲ្យមានការវិវាទឈានទៅដល់ការបង្ហូរឈាមគ្នា និងហានិភ័យដល់ប្រជាជាតិ និងមនុស្សជាតិទាំងមូល ។
ការប្រារព្ឋនូវទិវាសន្តិភាពអន្តរជាតិ ២១កញ្ញា ស្របតាមសេចក្តីសំរេចរបស់អង្គការសហប្រជាជាតិ ដែលមានអំពាវនាវដល់គ្រប់ប្រទេស ជាសមាជិកអង្គការសហប្រជាជាតិ រួមទាំងអង្គការជាតិ អន្តរជាតិ សង្គមស៊ីវិលអោយប្រារព្ឋទិវាសន្តិភាពអន្តរជាតិ ដើម្បីជំរុញ និងបំផុសឲ្យមានការយល់ដឹងជាសកល អំពីសន្តិភាពពិភពលោក ក្នុងតំបន់និមួយៗ ។
ឯកឧត្តមអភិបាលខេត្តបញ្ជាក់ទៀតថា ទិវាសន្តិភាពអន្តរជាតិ២១កញ្ញា ជាទិវាមួយ មានអត្ថន័យជាទីបំផុត ព្រោះសន្តិភាពគឺជាមាតានៃភាពសុខសាន្ត មាតានៃសុភមង្គលសម្រាប់ប្រជាពលរដ្ឋគ្រប់រូបនៅទូទាំងប្រទេស ក៌ដូចជានៅទូទាំងសកលលោកផងដែរ ដើម្បីសម្រេចគោលដៅនេះ យើងទាំងអស់គ្នាត្រូវរួមសហការសាមគ្គីយោគយល់គ្នាទៅវិញទៅមក និង
បញ្ឈប់នូវរាល់អំពើហិង្សា ការប្រើប្រាស់គ្រឿងញៀន ល្បែងស៊ីសង គ្រឿងស្រវឹងដែលបំផ្លាញដល់ខ្លួនឯង និងលះបង់នូវលោភៈ ទោសៈ មោហៈ ប្រកាន់ភ្ជាប់នូវភាពសច្ចះធម៌ និងយុត្តិធម៌សង្គម ។ ដើម្បីស្វែងរកសន្តិភាព ស្ថេរភាពជូនប្រជាពលរដ្ឋកម្ពុជាទូទាំងប្រទេស ជាពិសេសនៅក្នុងមូលដ្ឋានមានសេចក្តីសុខប្រកបដោយជីវភាពសុខសាន្តរីកចំរើន៕ ដោយ ផន សុជាតិ
