ខេត្តកំពត៖ ជនសង្ស័យ២នាក់បងប្អូនបង្កើតត្រូវសមត្ថកិច្ចការិយាល័យកណ្តាល ខេត្តកំពត សាងសំណុំរឿងទៅសាលាដំបូងខេត្តចាត់ការតាមផ្លូវច្បាប់ បន្ទាប់ពីរូបគេទាំង២នាក់បានធ្វើសកម្មភាពលួចកាច់សោរម៉ូតូគេក្នុងវត្តបានសម្រេច រួចយកទៅប្លុងលាក់ទុកនៅក្នុងព្រៃ ប៉ុន្តែត្រូវបានប្រជាពលរដ្ឋប្រទះឃើញក៏រាយការណ៍ប្រាប់សមត្ថកិច្ចឲ្យស្រាវជ្រាវ ទើបឈានទៅឃាត់ខ្លួនបុរសទាំង២នាក់នេះតែម្តង។ ជនសង្ស័យ២នាក់បងប្អូនខាងលើត្រូវប៉ូលិសឃាត់ខ្លួនក្នុងពេលតែមួយនាវេលាម៉ោង១៨ល្ងាច ថ្ងៃទី១៥ខែកញ្ញា ឆ្នាំ២០១៤ ត្រង់ចំណុចព្រៃចាស់ ក្នុងភូមិ ទ្រមែ ឃុំទ្រមែ ស្រុកឈូក ពោលគឺក្រោយពីជនសង្ស័យទាំង២នាក់ខាងលើធ្វើសកម្មភាពកាច់សោរម៉ូតូគេនៅក្នុងវត្តក្រាំងស្នាយបានសម្រេចកាលពីវេលាម៉ោង១១ព្រឹកក្នុងថ្ងៃដដែល
បានសម្រេចរួចមក។ សមត្ថកិច្ចបានឲ្យដឹងទៀតថា ការឈានដល់ឃាត់ខ្លួនជនសង្ស័យខាងលើដោយសារមានប្រជាពលរដ្ឋរាយការណ៍ថា បានប្រទះឃើញមនុស្សមិនស្គាល់មុខយកម៉ូតូC125សេរីឆ្នាំ២០១៣មួយគ្រឿងទៅលាក់ទុកក្នុងព្រៃ ទើបមានការសង្ស័យ ហើយក៏រាយការណ៍ជូនសមត្ថកិច្ចដែនដី ចៃដន្យនៅក្នុងវត្តក្រាំងស្នាយក៏មានការឆោឡោពីរឿងបាត់ម៉ូតូផង ទើបសមត្ថកិច្ចតាមស្រាវជ្រាវដោយឲ្យកំលាំងចាំឃ្លាំមើលជាប់ជាប្រចាំនៅចំណុចដែលជនមិនស្គាល់មុខយកម៉ូតូនោះលាក់ទុក ទីបំផុតនៅល្ងាចថ្ងៃដដែលស្រាប់តែជនសង្ស័យទាំង២នាក់នោះមកក្រវែលក្បែរៗនោះ ទើបសមត្ថកិច្ចឃាត់ខ្លួនមក
សាកសួរតែម្តង។សមត្ថកិច្ចបានបញ្ជាក់ថា បុរសសង្ស័យទាំង២នាក់គឺជាបងប្អូនបង្កើតនឹងគ្នា ទី១ឈ្មោះ កង រ៉ាម៉ន ភេទប្រុស អាយុ២៨ឆ្នាំ មុខរបរមិនពិតប្រាកដរស់នៅក្នុងភូមិអណ្តូងគៀន ឃុំរបាតជាន់ជុំ ស្រុកគិរីវង់ ខេត្តតាកែវ និងទី២ឈ្មោះ កង ដានី ភេទប្រុស អាយុ២៦ឆ្នាំ មានទីលំនៅ ក្នុងភូមិត្រពាំងស្រង់ ស្ថិតក្នុងឃុំ ស្រុកខាងលើ។ដោយឡែកម្ចាស់ម៉ូតូមានឈ្មោះ អ៊ុយ
គឹមសាន ភេទប្រុស អាយុ៤៩ឆ្នាំមានទីលំនៅក្នុងភូមិល្វេ ឃុំក្រាំងស្នាយ ស្រុកឈូក ខេត្តកំពត ហើយម៉ូតដែលត្រូវចោរលួចម៉ាកC125ពណ៌ខ្មៅ ផលិតឆ្នាំ២០១៣ ពាក់ស្លាកលេខ កំពត 1G-9491 ។ បច្ចុប្បន្នដោយសារជនសង្ស័យទាំង២នាក់បានសារភាពថា ពិតជាបានប្រព្រឹត្តដូចការរៀបរាប់ខាងលើនេះមែន ទើបសមត្ថកិច្ចចងក្រងឯកសារបញ្ជូនទៅសាលាដំបូងខេត្តកំពត ចាត់ការតាមផ្លូវច្បាប់នារសៀលថ្ងៃទី១៧ខែកញ្ញា ឆ្នាំ២០១៤នេះ៕ Bun rithy
