កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត នាព្រឹកថ្ងៃទី១៦ ខែកញ្ញា ឆ្នាំ
២០២២នេះ បានអញ្ជើញចូលរួមក្នុងពិធីបុណ្យកាន់បិណ្ឌវេនទី៦ នៅវត្តបុទុមរតនៈដីដុះ និងវត្តសុទស្សនារាមជ្រោយថ្ម ស្ថិតក្នុងក្រុងកំពង់ចាម ដោយមានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងមន្ត្រីរាជការ អាជ្ញាធរមូលដ្ឋាន និងពុទ្ធបរិស័ទជិតឆ្ងាយផងដែរ។
ក្នុងឱកាសនោះដែរ ឯកឧត្តម អ៊ុន ចាន់ដា និងលោកឯកឧត្តម ខ្លូត ផន ព្រមទាំង សហការី បានឧទ្ទិស សូមឲ្យដួងវិញ្ញាណក្ខន្ធ បុព្វការីជន បានយោងយកកំណើតកើតនៅក្នុងទីឋានដ៏ខ្ពង់ខ្ពស់ និងងាកក្រោយឲ្យពរជ័យ ដល់កូន ចៅបានសេចក្តីសុខ សេចក្តីចម្រើន ជាពិសេសសូមឲ្យព្រះបារមីដ៏សក្ដិសិទ្ធិនៅក្នុងលោក ព្រះបារមីនៅវត្តបុទុមរតនៈដីដុះ និងវត្តសុទស្សនារាមជ្រោយថ្ម តាមជួយបីបាច់ថែរក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត មានសុខភាពល្អបរិបូរណ៍ ជន្មាយុយឺនយូរ ដើម្បីសម្តេចបានដឹកនាំ ការពារព្រះរាជាណាចក្រកម្ពុជា ឲ្យរក្សាបានជានិរន្តរ៍ នូវសន្តិភាព ស្ថេរភាពនយោបាយ សន្តិសុខសណ្តាប់ធ្នាប់សាធារណៈ និងការអភិវឌ្ឍ រីកចំរើនថ្មីៗបន្ថែមទៀត ដើម្បីជាសេចក្តីសុខ សេចក្តីចម្រើន របស់ប្រជាពលរដ្ឋខ្មែរទូទាំងប្រទេស។ ព្រមទាំងឧទ្ទិសនូវមហាកុសលផលបុណ្យ សូមឲ្យបានដល់វិញ្ញាណក្ខន្ធវីរៈកម្មាភិបាល យុទ្ធជន យុទ្ធនារី អ្នកស្នេហាជាតិ ដែលបានបាត់បង់ជីវិតដើម្បីបុព្វហេតុជាតិមាតុភូមិជាតិស្នេហានៃយើងផងដែរ ។
នាឱកាស ឯកឧត្ដម ខ្លូត ផន និងឯកឧត្ដម អ៊ុន ចាន់ដា ព្រមទាំងសហការី បាននាំយកទេយ្យវត្ថុប្រគេន ដល់វត្តទាំង ២ខាងលើ ដោយក្នុង ១វត្ត ៖ អង្ករ ១០០គីឡូក្រាម ទឹកសុទ្ធ ៥កេស ទឹកក្រូច ៥កេស ទឹកដោះគោខាប់ ១កេសធំ តែ ៥កញ្ចប់ ស្ករស ៥គ.ក្រ ត្រីខ ១កេស ទឹកត្រី ៥យួរ និងបច្ច័យកសាងជាង ៥លានរៀល ។ ដោយឡែក ព្រះសង្ឃ ៧អង្គ ក្នុង ១អង្គៗ ប្រគេន ទេយ្យវត្ថុ ចំនួន ១ បច្ច័យ ១០ម៉ឺនរៀល ចង្ហាន់ ១ស្រាក់ និងផ្លែឈើ ១កន្ត្រក ផងដែរ ៕
