(ខេត្តកែប)៖ នៅរសៀល ថ្ងៃទី១៥ ខែកញ្ញា ឆ្នាំ២០២២ លោក អ៊ឹម បញ្ញារិទ្ធិ អភិបាលរងនៃគណៈអភិបាលខេត្ត តំណាងដ៏ខ្ពង់ខ្ពស់ឯកឧត្តមបណ្ឌិត សោម ពិសិដ្ឋ អភិបាល នៃគណៈអភិបាលខេត្ត បានដឹកនាំក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្ត តំណាងរដ្ឋបាលក្រុង ស្រុក និងអ្នកពាក់ព័ន្ធនានា សរុបប្រមាណ៤២រូប ដើម្បីប្រជុំត្រួតពិនិត្យ និងចាត់អាទិភាពគម្រោង សកម្មភាពកម្មវិធីវិនិយោគបីឆ្នាំរំកិល(២០២៣-២០២៥)របស់រដ្ឋបាលខេត្ត នៅសាលប្រជុំសាលាខេត្តកែប។
មានប្រសាសន៍ ក្នុងពិធីបេីកកិច្ចប្រជុំនេះ លោក អ៊ឹម បញ្ញារិទ្ធិ អភិបាលរងខេត្ត បានលេីកឡេីងថា កិច្ចប្រជុំនាពេលនេះ គឺមានគោលបំណងឱ្យសមាជិកក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្ត និងអ្នកពាក់ព័ន្ធយល់កាន់តែច្បាស់អំពីដំណើរការ និងសារសំខាន់នៃការរៀបចំកសាងកម្មវិធីវិនិយោគបីឆ្នាំរំកិលខេត្ត និងពិនិត្យ កែសម្រួល និងរៀបចំតាមលំដាប់អាទិភាព នូវបណ្តាបញ្ជីគម្រោង ដូចខាងក្រោម៖
– តារាងគម្រោង សកម្មភាពកំពុងដំណើរការ
– តារាងគម្រោង សកម្មភាពមានថវិកាគាំទ្រ
– តារាងគម្រោង សកម្មភាពមិនមានថវិកាគាំទ្រ
– តារាងគម្រោង សកម្មភាពរបស់ក្រសួង ស្ថាប័នកំពុងដំណើរការក្នុងដែនដីខេត្ត
– តារាងគម្រោង សកម្មភាពរបស់អង្គការជាតិ អន្តរជាតិ និងវិស័យឯកជនកំពុងដំណើរការក្នុងដែនដីខេត្ត
– តារាងគម្រោង សកម្មភាពវិនិយោគដែលបានបញ្ចប់។ល។
បន្ទាប់ពីលោក អ៊ឹម បញ្ញារិទ្ធិ មានមតិបើកកិច្ចប្រជុំរួចមក លោក ភោគ សុខេន អនុប្រធានមន្ទីរផែនការខេត្ត បានធ្វើបទបង្ហាញពីបញ្ជីគម្រោង សកម្មភាព នៃកម្មវិធីវិនិយោគបីឆ្នាំរំកិល(២០២៣-២០២៥)របស់រដ្ឋបាលខេត្ត ជូនអង្គប្រជុំ ដើម្បីពិនិត្យ កែសម្រួល បំពេញបន្ថែម និងចាត់អាទិភាព ជាបន្តបន្ទាប់។ ដោយបាន ពិនិត្យ កែសម្រួល និងបំពេញបន្ថែមចំណុចខ្វះខាត នូវបញ្ជីគម្រោងសកម្មភាព នៃកម្មវិធីវិនិយោគបីឆ្នាំ
រំកិល(២០២៣-២០២៥)របស់រដ្ឋបាលខេត្ត ដែលបានដាក់ជូន រួមមាន៖
✓ បញ្ជីគម្រោង សកម្មភាពកំពុងដំណើរការ ដោយបំពេញបន្ថែមនូវចំណុចខ្វះខាត មានដូចជា(ការឆ្លើយតបនឹងគោលដៅ, កម្រិតទុនវិនិយោគតាមបណ្តាឆ្នាំ)
✓ តារាងគម្រោង សកម្មភាពមានថវិកាគាំទ្រ ដោយបំពេញបន្ថែមនូវចំណុចខ្វះខាតមានដូចជា(កម្រិតទុនវិនិយោគតាមបណ្តាឆ្នាំ,រយៈពេលនៃការអនុវត្ត)
✓ តារាងគម្រោង សកម្មភាពមិនមានថវិកាគាំទ្រ ដោយបំពេញបន្ថែមនូវចំណុចខ្វះខាត មានដូចជា(ការឆ្លើយតបនឹងគោលដៅ, រយៈពេលនៃការអនុវត្ត និងបន្ថែមគម្រោងសកម្មភាពថ្មីៗ មួយចំនួន)
✓ បញ្ជីកម្មវិធីប្រតិបត្តិការសេវារដ្ឋបាល ប្រចាំឆ្នាំ២០២៣ ដោយបំពេញបន្ថែម និងកែសម្រួលលើសេវារដ្ឋបាលរបស់មន្ទីរអង្គភាពមួយចំនួន។
នៅចុងបញ្ចប់នៃកិច្ចប្រជុំនេះ លោកអភិបាលរងខេត្ត បានជម្រុញ និងលើកទឹកដល់អ្នកចូលរួមទាំងអស់ ដែលជាតំណាងមន្ទីរអង្គភាព ត្រូវរាយការណ៍ជូនប្រធានមន្ទីរអង្គភាពរៀងខ្លួនអំពីលទ្ធផលកិច្ចប្រជុំនេះ និងធ្វើការបំពេញបន្ថែមនូវចំណុចខ្វះខាត លើគម្រោងសកម្មភាពវិស័យរបស់ខ្លួន ឱ្យបានទាន់ពេលវេលា និងត្រឹមត្រូវ។ លោកក៏បានជម្រុញក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្ត រៀបចំវេទិកាពិគ្រោះយោបល់ស្តីពីការរៀបចំកសាងកម្មវិធីវិនិយោគបីឆ្នាំរំកិលខេត្ត ឱ្យបានទាន់ពេលវេលា។ 
ជាពិសេស លើកទឹកចិត្តដល់រដ្ឋបាលក្រុង ស្រុក ជួយជម្រុញ ដល់រដ្ឋបាលឃុំសង្កាត់ ឱ្យរៀបចំ និងកសាងផែនការអភិវឌ្ឍន៍រយៈពេលប្រាំឆ្នាំ(២០២៣-២០២៧) និងកម្មវិធីនិយោគបីឆ្នាំរំកិល(២០២៣-២០២៥)របស់រដ្ឋបាលឃុំ សង្កាត់ ឱ្យបានទាន់ពេលវេលា នៃច្បាប់កំណត់៕ សេង ណារិទ្ធ
