កំពង់ចាម: ក្នុងរដូវទឹកទន្លេមេគង្គហក់ឡើងនេះ គេសង្កេតឃើញថាមានបទល្មើសនេសាទកេីនឡេីងព្រមជាមួយផងដែរ ទោះជា
យ៉ាងណាសមត្ថកិច្ចអាជ្ញាធរមូលដ្ឋាន បានខិតខំធ្វេីការបង្ក្រាបជាបន្តបន្ទាប់ ជាក់ស្ដែងកាលពីថ្ងៃទី៩ ខែកញ្ញា ឆ្នាំ២០២២នេះ លោកវរសេនីយ៍ឯក ជា ជួន អធិការនគរបាលស្រុកកងមាស បានចាត់តាំងលោកវរសេនីយ៍ទោ ថុង ភូរីវុធ អធិការរងទទួលផែនការងារយុត្តិធម៌ ដឹកនាំកំលាំងអធិការដ្ឋាននគរបាលស្រុកកងមាស ជាមួយកំលាំងប៉ុស្តិ៍នគរបាលរដ្ឋបាលព្រែកក្របៅ ចុះបង្រ្កាបបទល្មើសនេសាទខុសច្បាប់លូស្បៃម៉ុង នៅចំណុចបឹងចង្កែងទួយ ស្ថិតនៅភូមិពាមក្នុង ឃុំព្រែកក្របៅ ស្រុកកងមាស ខេត្តកំពង់ចាម ។
សមត្ថកិច្ចបានឲ្យដឹងថា ក្នុងប្រតិបត្តិការនេះ កម្លាំងជំនាញបានធ្វើការរឹបអូសបាន លូស្បៃមុងចំនួន៤៣មាត់ វះបំផ្លាញព្រួលប្រវែង២៥០០ម៉ែត និងបង្គោលឈើ បង្គោលឫស្សីចំនួន៣០០ដើម ព្រមទាំងបានចាក់លែងកូនត្រីចូលបឹងធម្មជាតិវិញចំនួន៣៥គីឡូក្រាម ចំពោះឯឧបករណ៍ខាងលើ ត្រូវបានដុតចោលនៅចំណុចព្រែកក្អែក ស្ថិតនៅភូមិពាមក្នុង ឃុំព្រែកក្របៅ ស្រុកកងមាស តាមបញ្ជារបស់លោក ហាក់ ហ៊ាន់ ព្រះរាជអាជ្ញាររងអមសាលាដំបូងខេត្តកំពង់ចាមផងដែរ ៕
