កំពង់ឆ្នាំង៖ដើម្បីស្វែងយល់អំពីស្ថានភាពទឹកជំនន់ទន្លេនិងសុខទុក្ខប្រជាពលរដ្ឋនៅតាមដងទន្លេ នៅព្រឹកថ្ងៃទី១៨ ខែកញ្ញា ឆ្នាំ២០១៤ លោក ឈូរ ច័ន្ទឌឿន អភិបាលខេត្តកំពង់ឆ្នាំងបានដឹកនាំមន្ត្រីរាជការតាមមន្ទីរអង្គភាពជុំវិញខេត្តចុះទៅពិនិត្យស្ថានភាពទឹកជំនន់នៅតាមមូលដ្ឋានក្នុងស្រុកជលគីរី និងបានចូលសួរសុខទុក្ខប្រជាពលរដ្ឋជាអ្នកជម្ងឺនៅក្នុងមណ្ឌលសុខភាពឃុំព្រៃគ្រី។
លោក ឈូរ ច័ន្ទឌឿន អភិបាលខេត្តកំពង់ឆ្នាំងមានប្រសាសន៍អោយដឹងថា៖តាមរបាយការណ៍របស់មន្ទីរធនធានទឹកនិងឧតុនិយមខេត្ត អោយដឹងថាកំពស់ទឹកទន្លេនៅស្ថានីយ៍ឧតុនិយមផ្សារក្រោមនៅព្រឹកថ្ងៃទី១៨ ខែកញ្ញា ឆ្នាំ២០១៤ ទឹកទន្លេមានកំពស់៩,០៦ម៉ែត្រស្មើនិងកំពស់ទឹកកាលពីថ្ងៃម្សិលមិញទី១៧ ខែកញ្ញា ឆ្នាំ២០១៤ បើប្រៀបធៀបនិងរយះពេលដូចគ្នា កំពស់ទឹកនៅឆ្នាំ២០១៣ គឺខ្ពស់ជាង០,២៩ម៉ែត្រតែប៉ុណ្ណោះ ។ស្ថានភាពទឹកទន្លេនេះបានធ្វើអោយប្រជាពលរដ្ឋរស់នៅតាមដងទន្លេមានក្ដីព្រួយបារម្មណ៍យ៉ាងខ្លាំង ខ្លាចទឹកទន្លេឡើងតូច ដោយមូលហេតុថា អាងទឹកមួយចំនួន ទឹកទន្លេមិនទាន់ហូរចូលពេញ សំរាប់ធានាដល់ការស្រោចស្រពស្រូវរដូវប្រាំងនិងដំណាំក្នុងចំការរបស់ពួកគាត់នៅពេលរដូវសម្រកខាងមុខ។
ក្រោយពីបានពិនិត្យស្ថានភាពទឹកជំនន់រួចមកលោកអភិបាលខេត្តបានចុះទៅសួរសុខទុក្ខប្រជាពលរដ្ឋដែលកំពុងសំរាកព្យាបាលជម្ងឺចំនួន៥នាក់ នៅក្នុងមណ្ឌលសុខភាពឃុំព្រៃគ្រីនៅក្នុងនោះដែរ លោកអភិបាលខេត្តបានជួយឧបត្ថម្ភដល់អ្នកជម្ងឺ ក្នុងអ្នកជម្ងឺម្នាក់ៗទទួលបានប្រាក់ចំនួន ២ម៉ឺនរៀល។ទន្ទឹមនេះដែរលោកអភិបាលខេត្ត បានចុះទៅពិនិត្យការសាងសង់អាគារថ្មីមួយខ្នងរបស់មណ្ឌលសុខភាពឃុំព្រៃគ្រី។ លោក ប្រាក់ វុន ប្រធានមន្ទីរសុខាភិបាលខេត្ត ដែលបានអញ្ជើញចុះទៅពិនិត្យការសាងសង់អាគារមណ្ឌលសុខភាពឃុំព្រៃគ្រី ជាមួយអភិបាលខេត្តបាននិយាយអោយដឹងថា៖នៅក្នុងខេត្តកំពង់ឆ្នាំង មានមណ្ឌលសុខភាពសរុបចំនួន៣៩មណ្ឌល មានមន្ទីរពេទ្យបង្អែក៣កន្លែង និងមានមន្ទីពេទ្យធំរបស់ខេត្ត១កន្លែង ។
ដោយឡែកនៅក្នុងស្រុកជលគីរីមានមណ្ឌលសុខភាពចំនួន៣កន្លែង និងមានបុគ្គលិកពេទ្យចំនួន២៣នាក់បំរើការនៅក្នុងមណ្ឌលសុខភាពទាំង៣។ដោយប្រ ជាពលរដ្ឋនៅក្នុងឃុំព្រៃគ្រីមានចំនួនច្រើន និងជាទីប្រជុំជនផងនោះ ក្រសួងសុខាភិបាលបានទម្លាក់ថវិកា អោយមន្ទីរសុខាភិបាលខេត្ត សាងសង់អាគារមណ្ឌលសុខភាពថ្មីនៅក្នុងឃុំព្រៃគ្រី១កន្លែងទៀត ដែលមានទំហំ៩ម៉ែត្រ គុណនិង១២ម៉ែត្រ ចំណែកអាគារមណ្ឌលសុខភាពចាស់ដែលនៅជាប់គ្នានោះ ត្រូវដាក់ធ្វើជាបន្ទប់សំរាប់អោយអ្នកជម្ងឺសំរាកព្យាបាលវិញ។ 
លោកមន្ទីរសុខាភិបាលខេត្តបានអោយដឹងទៀតថា៖រយះពេល៩ខែក្នុងឆ្នាំ២០១៤ នេះស្ថានភាពជម្ងឺទូទៅ និងជម្ងឺឆ្លងនៅក្នុងខេត្ត ពុំមានអ្វីកើតឡើងគួរអោយកត់សំគាល់ឡើយ នេះក៏ដោយសារ មន្ត្រីសុខាភិបាលនៅគ្រប់ស្រុកនិងគ្រប់មណ្ឌលសុខភាពបានបំរើសេវាកម្មព្យាបាលជម្ងឺជូនប្រជាពលរដ្ឋបានយ៉ាងល្អនិងពុំមានបាតុភាពអ្វីឡើយ៕ដោយផន សុខជាតិ
