បន្ទាយមានជ័យ៖ ឯកឧត្តម ឧបនាយករដ្ឋមន្រ្តី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុម
ការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ អមដំណើរដោយក្រុមការងារ និងអាជ្ញាធរដែនដីគ្រប់លំដាប់ថ្នាក់ នាល្ងាចថ្ងៃទី៥ ខែតុលា ឆ្នាំ២០២២នេះបានអញ្ជេីញជួបសំណេះសំណាល និងសួរសុខទុក្ខប្រជាពលរដ្ឋដែលកំពុងជួបការលំបាកដោយសារជំនន់ទឹកភ្លៀង ចំនួន១៣៣គ្រួសារ នៅក្រុងប៉ោយប៉ែត ខេត្តបន្ទាយមានជ័យ ។
ក្នុងនាមប្រធានក្រុមការងារ ឯកឧត្តម ឧបនាយករដ្ឋមន្រ្តី កែ គឹមយ៉ាន សូមពាំនាំផ្តាំផ្ញើនូវការសួរសុខទុក្ខ និងចែករម្លែកនូវទុក្ខលំបាក របស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋនៅក្នុងខេត្តបន្ទាយមានជ័យ ដែលកំពុងទទួលរងនូវផលប៉ះពាល់ដោយសារជំនន់ទឹកភ្លៀងនៅពេលនេះ។
ឯកឧត្តម ឧបនាយករដ្ឋមន្រ្តី បានបន្តថា ថ្នាក់ដឹកនាំរាជរដ្ឋាភិបាល និងគណបក្សប្រជាជនគ្រប់លំដាប់ថ្នាក់ តែងតែនៅផ្សារភ្ជាប់ជាមួយប្រជាពលរដ្ឋគ្រប់កាល:ទេស: គ្រប់ពេលវេលា និងបានណែនាំដល់អាជ្ញាធរពាក់ព័ន្ធគ្រប់លំដាប់ថ្នាក់ត្រូវប្រុងជេីងការ ដើម្បីត្រៀមជួយប្រជាពលរដ្ឋករណីមានអាសន្នបន្ទាន់កើតឡើង ហើយក៏មិនត្រូវធ្វេសប្រហេសការពារជំងឺឆ្លងផ្សេងៗឡើយ ដូចជា ជំងឺកូវីដ-១៩ និងគ្រុនឈាមជាដើម ហើយត្រូវថែទាំសុខភាព និងរក្សាអនាម័យជានិច្ចផងដែរ។
ក្នុងឱកាសនោះ ឯកឧត្តម ឧបនាយករដ្ឋមន្រ្តី បានថ្លែងបន្ថែមដោយបានណែនាំដល់គ្រប់ផ្នែកពាក់ព័ន្ធទាំងអស់ត្រូវថែរក្សាទឹកទុកប្រើប្រាស់ស្ដារវិស័យកសិកម្ម ស្រូវប្រាំង ចិញ្ចឹមសត្វ និងដាំបន្លែ ឧស្សាហកម្ម និងទេសចរណ៍ បង្កេីតការងារបង្កេីនប្រាក់ចំណូលជូនប្រជាពលរដ្ឋនិងបន្តយកចិត្តទុកដាក់ចំពោះព្រះសង្ឃតាមវត្តអារាមដែលគង់ចាំព្រះវស្សានៅតាមវត្តអារាមនានា។
ឯកឧត្តម ឧបនាយករដ្ឋមន្រ្តី កែ គឹមយ៉ាន បាននាំអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនដេីម្បីសម្រាលនូវការលំបាក ដល់ប្រជាពលរដ្ឋចំនួនសរុប១៣៣គ្រួសារនៅក្រុងប៉ោយប៉ែត គ្រួសារដែលមានសមាជិកស្លាប់ដោយទឹកជំនន់០៣គ្រួសារ នគរបាល កងរាជអាវុធហត្ថ ទាហាន ប្រជាការពារភូមិ ក្រុមគ្រូពេទ្យ លោកគ្រូ អ្នកគ្រូ និង កុមារតូចៗ ។
នៅល្ងាចនាថ្ងៃដដែលនេះ ឯកឧត្តម ឧបនាយករដ្ឋមន្រ្តី កែ គឹមយ៉ាន និងក្រុមការងារបានបន្តដំណេីរទៅពិនិត្យស្ថានភាពទឹកនៅស្ទឹងអូរកៃដន ពិនិត្យគម្រោងការរៀបចំប្រឡាយរំដោះទឹកកាត់ពីព្រំប្រទល់ស្រុកអូរជ្រៅ និងក្រុងប៉ោយប៉ែត និងបានឧបត្ថម្ភកងពល៥១៣នូវថវិកា និងគ្រឿងឧបភោគ បរិភោគមួយចំនួន៕ដោយ៖ឃិន គន្ធា
