កំពង់ចាម: ឯកឧត្តមឧបនាយករដ្ឋមន្ត្រី យឹម ឆៃលី បានអញ្ជើញ ប្រគល់ពានរង្វាន់ដល់ក្រុមកីឡាករប្រណាំងទូក ង ទូកខ្នាតអន្តរជាតិ នៅក្រុងកំពង់ចាម ខណៈភ្ញៀវទេសចរណ៍ច្រើនកុះករបានមកទស្សនាកម្សាន្តសប្បាយរីករាយ ក្នុងពិធីប្រណាំងទូក បណ្តែតប្រទីប តាំងពិពណ៍ និងអុចកាំជ្រួច ដែលរៀបចំឡើងដោយអាជ្ញាធរខេត្តកំពង់ចាម កាលពីថ្ងៃទី១០ ខែតុលា ឆ្នាំ២០២២ ដោយមានការអញ្ញើញចូលរួមពីឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកជំទាវ ព្រមទាំងថ្នាក់ដឹកនាំក្រសួងស្ថាប័ននានាជាច្រើនរូបផងដែរ ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ដើម្បីថែរក្សាប្រពៃណី លើកស្ទួយវិស័យកីឡាអុំទូក និងបង្កបរិយាកាសសប្បាយរីករាយរបស់បងប្អូនប្រជាពលរដ្ឋក្រោមម្លប់សុខសន្តិភាពនោះ រដ្ឋបាលខេត្តបានរៀបចំពិធីប្រណាំងទូកនេះឡើង ដោយមានទូក ង ចំនួន៤៥ទូក មកពីបណ្តាវត្ត ក្នុងក្រុង-ស្រុករបស់ខេត្តបានចូលរួមប្រកួតប្រជែង ក្នុងនោះនៅពេលរាត្រី ក៏មានការរៀបចំបណ្ដែតប្រទីប និងអុចកាំជ្រួច ការតាំងពិព័រណ៍ជាង១០០ស្តង់ ដេីម្បីបង្ហាញសមិទ្ធផលរបស់រដ្ឋបាលក្រុង-ស្រុក មន្ទីរ-អង្គភាពជុំវិញខេត្ត និងពិព័រណ៍ភូមិមួយផលិតផលមួយ ព្រមទាំងមានការប្រគុំតន្ត្រីមានរយៈពេល៣ថ្ងៃ ចាប់ពីថ្ងៃទី០៩-១០-១១ ខែតុលា ឆ្នាំ២០២២ ។
បន្ទាប់ពីពិធីប្រណាំងទូកត្រវបានបញ្ចប់ គណៈអធិបតីបានប្រគល់ពានរង្វាន់ជ័យលាភីដល់កីឡាករប្រណាំងទូក «ង» ក្នុងនោះប្រភេទទូកវែង លេខ១ បានទៅលើទូកឈ្មោះ កៀនជ្រៃស្រីស្រស់ លេខ២ បានទៅលើទូកឈ្មោះ ដីដុះសែនជ័យបារមីព្រះអង្គខ្មៅ និងលេខ៣ ទៅលើទូកឈ្មោះ រកាខ្នុរសែនជ័យសិរីឧត្តម ។ ប្រភេទទូកខ្នាតអន្តរជាតិផែនលេខ ១ បានទៅលើទូកឈ្មោះ រំចេកសែនជ័យ និងទូកផែនលេខ ២ បានទៅលើទូកឈ្មោះ រាជសីសែនជ័យ និងទូកផែនលេខ ៣ បានទៅលើទូកឈ្មោះ អាស្រមទួលចារ ខេមរាសែនជ័យបារមីកីឡាករ ។ ចំពោះជ័យលាភីលេខ ១ ទទួលបាននូវពាន ១ ថវិកា ២ លានរៀល , ជ័យលាភីលេខ ២ បានពាន ១ ថវិកា ១ លានប្រាំសែនរៀល , និងជ័យលាភីលេខ ៣ ទទួលបានពាន ១ ថវិកា ១ លានរៀល និងទទួលបានសម្ភារៈគ្រឿងឧបភោគបរិភោគមួយចំនួនផងដែរ ៕
