ខេត្តកំពត៖ បុរសម្នាក់បានរងរបួសធ្ងន់ខណៈពេលជិះកង់បត់មិនមើលក្រោយ ហើយត្រូវម៉ូតូបើកបុកពីក្រោយដ៏ពេញទំហឹង ប៉ុន្តែហេតុការណ៍ខាងលើមិនបណ្តាលឲ្យភាគីអ្នកបើកម៉ូតូរងរបួសអ្វីឡើយ គ្រាន់តែខូតខាតយានយន្តប៉ុណ្ណោះ។ គ្រោះថ្នាក់នេះបានកើតឡើងនៅចំណុចមុខផ្លូវចូលផ្ទះសំណាក់កាំង កាំង ស្ថិតក្នុងភូមិកំពង់ត្រាចទី១ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត នៅវេលាម៉ោង៧និង១០នាទីព្រឹក ថ្ងៃទី២០ខែកញ្ញា ឆ្នាំ២០១៤។ តាមប្រភពព័ត៌មាននៅកន្លែងកើតហេតុបាននិយាយថា មុនពេលប៉ះទង្គិចគ្នា គេឃើញ បុរសអ្នកជិះកង់ធ្វើដំណើរពីកើតទៅលិច លុះមកដល់ចំណុចកើតហេតុក៏បត់ឆ្វេង គាប់ជួនមានម៉ូតូម៉ាកC125បោះពួយមកពីក្រោយហើយក៏វ៉ាក់អើុគ្នា ហើយគេចមិនផុតបុកគ្នា
ប្រាវតែម្តង បណ្តាលឲ្យអ្នកជិះកង់រងរបួសធ្ងន់ដេកស្តូកនៅលើទ្រូងផ្លូវ។ភ្លាមៗនោះក៏មានវត្តមានកំលាំងសមត្ថកិច្ចមកជួយអន្តរាគមន៍នៅកន្លែងកើតដើម្បីដឹកអ្នករបួសទៅសង្គ្រោះនៅឯមន្ទីរពេទ្យ។ សមត្ថកិច្ចដែលកំពុងវាស់វែងនៅកន្លែងកើតហេតុបានឲ្យដឹងថា ជនរងគ្រោះដែលជិះកង់មានឈ្មោះ ឆាយ ទិតសុភា ភេទប្រុស អាយុ២៣ឆ្នាំ មានទីលំនៅក្នុងស្រុកកំពង់ត្រាច។ដោយឡែកភាគីម៉ូតូC125សេរីឆ្នាំ២០១២ ពាក់ស្លាកលេខកំពត1E-7837មានឈ្មោះ កែវ ហ៊ួត ភេទ
ប្រុស អាយុ១៨ឆ្នាំ មានទីលំនៅ ភូមិកោះស្នូក ឃុំឫស្សីស្រុកខាងកើត ស្រុកកំពង់ត្រាច ខេត្តកំពត។ ក្រោយវាស់វែងមធ្យោបាយទាំង២គ្រឿងត្រូវបានសមត្ថកិច្ចអូសទៅរក្សាទុកដោយរង់ចាំភាគីទាំងសងខាងចូលមកដោះស្រាយតាមច្បាប់៕ ណារិទ្ធ
