កណ្តាល ៖ ក្រុមចោរប្រដាប់ដោយកាំភ្លើងវែងមួយដើម ខ្លីមួយដើមបានធ្វើសកម្មភាពបាញ់ប្លន់អ្នកលក់មាស និងដូរលុយនៅផ្សារព្រែកតាមាក់ ខណៈដែលចេញពីផ្សារមកដល់មុខផ្ទះបណ្តាលអោយមនុស្សប្រុសស្រីចំនួន៣ នាក់បានរងរបួសដោយត្រូវគ្រាប់កាំភ្លើង និងបាត់បង់គ្រឿងអលង្ការមាន មាស ប្លាកទីន ប្រាក់ចំនួនជាង៣០តម្លឹង ព្រមទាំងលុយរៀល លុយដុល្លាជិត១ម៉ឺនដុល្លារ។
ហេតុការណ៍ នេះបានកើតឡើងកាលពីវេលាម៉ោង១៨ និង៣០នាទី ព្រលប់ ថ្ងៃទី២៥ ខែកុម្ភៈ ឆ្នាំ២០១៤ ត្រង់ចំណុចមុខផ្ទះជនរងគ្រោះ ក្នុងភូមិក្នុង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។ ជនរងគ្រោះ៣នាក់ដែលរងរបួសដោយក្រុមចោរបាញ់ដោយកាំភ្លើងAK ខណៈ ធ្វើសកម្មភាពប្លន់យកគ្រឿងអលង្ការនិងលុយកាក់នោះ គឺទី១ ឈ្មោះភឿន ស្រឿន ភេទប្រុស អាយុ៤១ឆ្នាំ មុខរបរលក់គ្រឿងទង មានទីលំនៅ
កន្លែងកើតហេតុ របួសត្រង់ភ្លៅខាងស្តាំ មួយកន្លែង ទី២ ឈ្មោះឡាង ណារិន ភេទប្រុស អាយុ២៧ឆ្នាំ មុខរបរកសិករ មានទីលំនៅកន្លែងកើតហេតុ របួសត្រង់កំភួនជើងឆ្វេងមួយកន្លែង ទី៣ ឈ្មោះប៉ោ សុគន្ធារី ភេទស្រី អាយុ២៧ឆ្នាំ មុខរបរអ៊ុតសក់ មានទីលំនៅកន្លែងកើតហេតុ របួសត្រង់ស្មាខាងស្តាំមួយកន្លែង។ បើតាមសាក្សីឃើញហេតុការណ៍បាននិយាយថា ក្រុមចោរមានគ្នា៤នាក់ ប្រដាប់ដោយ
អាវុធ២ដើម គឺអាវុធAK មួយ ដើម និងអាវុធខ្លីពណ៌ស មួយដើមដែលមិនស្គាល់ម៉ាកបានធ្វើសកម្មភាពបាញ់ប្លន់ជនរងគ្រោះនៅ ត្រង់ចំណុចមុខផ្ទះ ខណៈដែលជនរងគ្រោះបានប្រមូលគ្រឿងអលង្ការនិងលុយកាក់ចេញពីផ្សារព្រែ កតាមាក់ជិះម៉ូតូមកផ្ទះរបស់ខ្លួន។ សាក្សី បានបន្តទៀតថា នៅវេលាម៉ោង១៨ និង២០នាទី ជនរងគ្រោះឈ្មោះភឿន ស្រឿន និងប្រពន្ធឈ្មោះឡាង ម៉ាលីន បានប្រមូលគ្រឿងទង
គ្រឿងប្រាក់ ព្រមទាំងលុយរៀល លុយដុល្លា ពីទូលក់មាសរបស់ខ្លួននៅផ្សារព្រែកតាមាក់ដាក់ចូលក្នុងកាបូប ស្ពាយរបស់ខ្លួន ហើយជិះម៉ូតូឌុបគ្នាត្រឡប់ផ្ទះ ដោយឈ្មោះឡាង ណារិន ជាប្អូនថ្លៃរបស់ឈ្មោះភឿន ស្រឿន ជិះម៉ូតូ C125 ស៊េរីឆ្នាំ២០១១ ពណ៌ខ្មៅ បើកជូនតាមពីក្រោយដូចរាល់ដង។ លុះ វេលាម៉ោង១៨ និង៣០នាទី ពេលមកដល់មុខផ្ទះ ឈ្មោះភឿន ស្រឿន បានឈប់ម៉ូតូ ហើយឈ្មោះឡាង ម៉ាលីន បានចុះពីលើ
ម៉ូតូស្ពាយកាបូបដាក់មាស ដើរទៅបើកទ្វាររបងផ្ទះ ឯឈ្មោះឡាង ណារិន អង្គុយលើម៉ូតូរបស់ខ្លួនពីក្រោយម៉ូតូរបស់ភឿន ស្រឿន ពេលនោះជនសង្ស័យ២នាក់ដែលឈរនៅក្រោមដើមក្រខុប ចំហៀងខាងជើងមុខផ្ទះ ឈ្មោះភឿន ស្រឿន បានស្ទុះរត់ចូលមកដណ្តើមយកកាបូបពីឈ្មោះឡាង ម៉ាលីន ដែលកំពុងឈរបើកទ្វាររបងផ្ទះ ឃើញដូច្នេះឈ្មោះភឿន ស្រឿន និងឡាង ណារិន បានចុះពីម៉ូតូចូលមកជួយឈ្មោះឡាង
ម៉ាលីន ពេលនោះជនសង្ស័យ២នាក់ផ្សេងទៀត ដោយម្នាក់កាន់អាវុធអាការមួយដើម និងម្នាក់ទៀតកាន់អាវុធខ្លីពណ៌ស មួយដើមបានរត់ឆ្លងផ្លូវថ្នល់ចូលមកកន្លែងកើតហេតុ ហើយបានបាញ់ជាច្រើនគ្រាប់បណ្តាលអោយត្រូវភ្លៅឈ្មោះភឿន ស្រឿន មួយគ្រាប់ ត្រូវកំភួនជើងឈ្មោះឡាង ណារិន មួយគ្រាប់ ហើយក្បាលគ្រាប់បានផ្លាតមកត្រូវឈ្មោះប៉ោ សុគន្ធារី ដែលកំពុងនៅក្នុងផ្ទះប្រកបមុខរបរអ៊ុតសក់ ចំស្មាខាងស្តាំ
មួយគ្រាប់ទៀតបន្ទាប់មក ជនសង្ស័យក៏ដណ្តើមយកកាបូបមាសបាន ហើយនាំគ្នារត់ទៅឡើងជិះម៉ូតូបក្សពួកខ្លួន និងយកម៉ូតូរបស់ឈ្មោះឡាង ណារិនមួយគ្រឿងចេញទៅបាត់ដោយសុវត្ថិភាព ហើយបន្សល់ទុកម៉ូតូរបស់ពួកវាមួយគ្រឿងម៉ាកសង់កូរ៉េពណ៌ក្រហម ការ៉ុងចំនួន៣ និងខ្សែជ័រខ្មៅ១ដុំ ព្រមទាំងអាវកញ្ចាស់ដៃវែងមួយ។ បើ តាមប្រភពព័ត៌មានពីក្រុមគ្រួសារជនរងគ្រោះបាននិយាយថា គ្រឿងអលង្ការនិងលុយកាក់
ដែលក្រុមចោរប្លន់យកទៅបាត់នោះមាន មាស២៣តម្លឹង ផ្លាកទីន២៥តម្លឹង គ្រឿងប្រាក់១០តម្លឹង ប្រាក់រៀល១០លានរៀល ប្រាក់ដុល្លា ៦០៥០ដុល្លា។ បើតាមសាក្សីបាននិយាយថា ក្រុមចោរដែលប្រដាប់ដោយអាវុធវែងខ្លីនេះ មានគម្រោងចាំប្លន់ជាស្រេចដោយដឹងពេលវេលាជនរងគ្រោះចេញពីផ្សារមក ផ្ទះ គឺធ្វើសកម្មភាពត្រង់មុខផ្ទះតែម្តង ព្រោះនៅកន្លែងកើតហេតុក្រុមចោរបានបន្សល់ទុកម៉ូតូមួយគ្រឿងគ្មាន ស្លាកលេខ និងការ៉ុងចំនួន៣ ពណ៌ស ពណ៌ខៀវ និងពណ៌បៃតង ព្រមទាំងខ្សែជ័រខ្មៅមួយដុំ សង្ស័យសម្រាប់ច្រករុំកាំភ្លើងមកចាំទុកធ្វើសកម្មភាព។
រីឯនៅ កន្លែងកើតហេតុនេះដែរគេរកឃើញសំបកគ្រាប់កាំភ្លើងអាការចំនួន១១ គ្រាប់។ តែយ៉ាងណាក៏ដោយគេឃើញសមត្ថកិច្ចនគរបាលស្រុកខ្សាច់កណ្តាលសហការជាមួយ នគរបាលខេត្តកំពុងដុតដៃដុតជើងបើកការស៊ើបអង្កេតស្រាវជ្រាវរកមុខសញ្ញា ដើម្បីឈានទៅចាប់ខ្លួនមកផ្តន្ទាទោសតាមផ្លូវច្បាប់៕
