ភ្នំពេញ ៖ កម្លាំងកងរាជអាវុធហត្ថខណ្ឌចំការមនបានដេញតាមបង្ក្រាបករណីប្រើប្រាស់និងចែកចាយគ្រឿងញៀន រួមទាំងឃាត់ខ្លួនបានមនុស្សចំនួន៥នាក់ ដកហូតបានថ្នាំញៀនក្រាមពណ៌ស ចំនួន១១កញ្ចប់តូច ដាវសាម៉ូរ៉ៃ២ ម៉ូតូកង់បី១គ្រឿង និងម៉ូតូម៉ាកស៊ុយស៊ូគីនិក១គ្រឿង កាលពីវេលាម៉ោង២២និង០០នាទីយប់ថ្ងៃទី២៦ខែកុម្ភៈឆ្នាំ២០១៤ ត្រង់ចំណុចច្រកឌឿងហែមក្រោយក្រុមហ៊ុន qb ស្ថិតក្នុងភូមិ១២ សង្កាត់ផ្សារដើមថ្កូវ ខណ្ឌចំការមន។
ការចុះបង្ក្រាបខាងលើនេះដោយមានការចង្អុលបង្ហាញពីលោកឧត្តមសេនីយ៍ទោ រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ អោយបង្ក្រាបរាល់បទល្មើសផ្សេង ដូចជាគ្រឿងញៀន និងឆក់ប្លន់ ទើបមន្ត្រីកងរាជអាវុធហត្ថបានបើកប្រត្តិបត្តិការនេះឃាត់បានជនសង្ស័យទី១ឈ្មោះ ឡុច សារីម ភេទប្រុសអាយុ២៧ឆ្នាំ មុខរបររត់រ៉ឺម៉ក់កង់៣ មានទីលំនៅមិនពិតប្រាកដ ទី២ឈ្មោះ សុខ សួន ភេទប្រុសអាយុ៣២ឆ្នាំ
មុខរបរមិនពិតប្រាកដ ស្នាក់នៅផ្ទះលេខ15E1 ភូមិម៉ាកខ្លឿ សង្កាត់ច្បារអំពៅ១ ខណ្ឌមានជ័យ ទី៣ឈ្មោះ ណាល់ រតនា ភេទប្រុសអាយុ២៩ឆ្នាំមុខរបរមិនពិតប្រាកដ ស្នាក់នៅផ្លូវលេខ៤៣០ សង្កាត់ផ្សារដើមថ្កូវ ខណ្ឌចំការមន ទី៤ឈ្មោះ ម៉ៅ វីរៈ ភេទប្រុសអាយុ២៥ឆ្នាំមុខរបរមិនពិតប្រាកដ ស្នាក់ផ្ទះលេខ245 ផ្លូវ៣៦៧ ភូមិម៉ាកខ្លឿ សង្កាត់ច្បារអំពៅ១ ខណ្ឌមានជ័យ និងទី៥ឈ្មោះ សុង សុបូ ភេទប្រុសអាយុ២៦ឆ្នាំមុខរបរបើករថយន្ត ស្នាក់នៅផ្ទះលេខ243 ផ្លូវ៩៣ ក្រុម៤ សង្កាត់ផ្សារដើមថ្កូវ ខណ្ឌចំការមន។ លោកមេបញ្ជាការកងរាជអាវុធហត្ថខណ្ឌចំការមន
លោកបានឱ្យដឹងថា រាល់បទល្មើសដែលកើតមានឡើងនៅក្នុងខណ្ឌចំការមនដោយឡែកចំពោះការលក់ដូរចែកចាយ ឧក្រិដ្ឋជនគឺបានផ្លាស់ប្តូរគ្រប់រូបភាពទាំងការលាក់ទុក ការជួញដូរដោយផ្ទាល់ដោយប្រយោល ក៏ប៉ុន្តែទោះបីជាយ៉ាងណាលោកនៅតែមានជំនឿជឿជាក់ថាគ្រឿងញៀនពិនិត្យជាទិដ្ឋភាពរួមគឺមានការថយចុះច្រើនណាស់ គឺយើងបានបន្ថយការព្រួយបារម្ភរបស់មាតាបិតាបន្ថយការព្រួយបារម្ភររបស់ប្រជាពលរដ្ឋ
បានច្រើន ដែលពីមុនយើងត្រូវតែទទួលស្គាល់ការពិត មហាជនខ្លះលោកបាននិយាយថាភ្នំពេញគ្រឿងញៀន លក់ដូច ស្ករគ្រាប់កន្លែងណាក៏មានដែរឥឡូវនេះយើងទទួលស្គាល់ការពិតមួយទៀតថាវាមិនទាន់អស់ទេ តែពាក្យនេះគឺមិនមានទៀតទេ ។ បច្ចុប្បន្នចំពោះជនសង្ស័យទាំង៥នាក់ខាងនេះរួមទាំងវត្ថុតាងត្រូវបានបញ្ជូនទៅមន្ទីរស្រាវជ្រាវនិងយុត្តិធម៌អាវុធហត្ថរាជធានីភ្នំពេញដើម្បីកសាងសំណុំរឿងបញ្ចូនទៅតុលាការផ្ដន្ទាទោសតាមនីតិវិធីច្បាប់៕
