កំពង់ចាម៖ ប្រជាពលរដ្ឋប្រមាណជាងមួយរយនាក់ខ្លះជិះរថយន្ត ខ្លះជិះម៉ូតូ និងខ្លះទៀតជិះគោយន្តឆ្នៃ ទៅជួបប្រជុំគ្នា នៅសាលាស្រុកព្រៃឈរ ខេត្តកំពង់ចាមដើម្បី ស្នើសុំឱ្យមានកិច្ចអន្តរាគមន៍ក្នុងការជ្រើសរើសមេភូមិឡើងវិញនៅថ្ងៃទី២៥ ខែកញ្ញា ឆ្នាំ២០១៤ ។ អាជ្ញាធរស្រុកបានចេញមកទទួលសំណូមពរ និងសន្យាថានឹងចុះទៅស៊ើបអង្កេតជុំវិញបញ្ហានេះនៅសប្តាហ៍ក្រោយ។
អភិបាលស្រុកព្រៃឈរ លោក ទេព រៀមមុន្នី ដែលចុះមកជួបផ្ទាល់ជាមួយពលរដ្ឋទាំងនោះមានប្រសាសន៍ថា លោកមិនបានដឹងច្បាស់ថាតើនិតិវិធីរបស់អាជ្ញាធរឃុំនៅពេលជ្រើសរើសមេភូមិកេះ ថ្មី នោះយ៉ាងណាទេ បានជាធ្វើប្រជាពលរដ្ឋជាច្រើនមិនសប្បាយចិត្ត និងនៅតែប្រកែកមិនព្រមទទួលស្គាល់នោះ។
លោកបន្ថែមថា អ្វីដែលពលរដ្ឋចង់បាន គឺត្រូវជ្រើសរើសមេភូមិណាដែលពលរដ្ឋភាគច្រើនពេញចិត្ត ហើយលោកក៏ឯកភាពចំពោះចំណុចនេះដែរ ពីព្រោះវាជាចំណុចដ៏ល្អមួយ ដោយលោកថានឹងអាចមានការជ្រើសរើសមេភូមិថ្មីតម្រូវតាមចិត្តរបស់ពួកគាត់។
លោកអភិបាលបន្តទៀតថា ត្បិតតែពលរដ្ឋទាំងនោះមិនមានសិទ្ធិបោះឆ្នោតជ្រើសរើសមេភូមិដោយផ្ទាល់ក៏ដោយចុះ ប៉ុន្តែពួកគាត់ក៏អាចមានមតិលើកឡើងពីបេក្ខជនជាមេភូមិណាដែលពួកគាត់ពេញចិត្តនោះបានដែរ ។
ពលរដ្ឋបានស្តាប់នូវការណែនាំពីសំណាក់អភិបាលស្រុករួច ពួកគាត់យល់ព្រមនាំគ្នាត្រឡប់មកផ្ទះវិញ នៅម៉ោងប្រមាណជា៩ព្រឹក ដោយរងចាំការចុះទៅដោះស្រាយរបស់អាជ្ញាធរស្រុកតាមការសន្យា ។
លោក ផា ភារៈ ជាប្រជាពលរដ្ឋភូមិកេះបានបញ្ជាក់ថា ពួកគាត់សម្រេចចិត្តឡើងមកសាលាស្រុកនោះ គឺចង់ឱ្យអាជ្ញាធរស្រុកជួយដោះស្រាយបញ្ហារបស់ពួកគាត់ ដោយសារតែពួកគាត់មិនអាចទទួលយកមេភូមិថ្មីដែលអាជ្ញាធរឃុំបានសម្រេចជ្រើសរើស កាលពីខែសីហា នោះបានឡើយ ។ លោកបន្តថា ពលរដ្ឋអាចទទួលយកការសន្យារបស់អាជ្ញាធរស្រុកបាន ប៉ុន្តែពួកគាត់មិនទាន់ជឿជាក់ទាំងស្រុងនោះទេ ពីព្រោះកន្លងមកការសន្យារបស់អាជ្ញាធរឃុំបានធ្វើឱ្យពួកគាត់ខកចិត្តម្តងរួចមកហើយ ។
ចំណែកអ្នកស្រី សេង ឃីម វិញ យល់ថា ប្រសិនបើរើសមេភូមិមកបម្រើពលរដ្ឋ ដោយ ភាគច្រើននៃពលរដ្ឋទាំងអស់មិនពេញចិត្តហើយ អាចនឹងធ្វើឱ្យមានបញ្ហានៅក្នុងស្រុកភូមិមិនចេះចប់មិនចេះហើយជាក់ជាមិនខាន ៕ phon sokcheat
