កំពង់ឆ្នាំង៖អំពើហឹង្សាមួយបានបង្កអោយយុវជន៥នាក់រងរបួសធ្ងន់និងស្រាលដោយយុវជនដោយសារក្រុមក្មេងស្ទាវចំនួន២ក្រុមដែលមកពីភូមិ២ផ្សេងគ្នា វាយកាប់ចាក់គ្នាក្នុងទំនាស់ក្នុងពេលចូលរាំធុងបាស់ ុំហេតុការណ៍នេះបានកើតឡើងកាលពីវេលាម៉ោង ៣រសៀល ថ្ងៃទី២៤ ខែកញ្ញា ឆ្នាំ២០១៤ នៅភូមិសូភី ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចមូលដ្ឋានបានអោយដឹងថា៖យុវជនដែលជាជនរងគ្រោះមាន ១.ឈ្មោះ តុប វាសនា ភេទប្រុស អាយុ ២៤ឆ្នាំ រងរបួសធ្ងន់, ២.ឈ្មោះ ភុន បូរីម អាយុ ២២ឆ្នាំ រងរបួសធ្ងន់, ៣.ឈ្មោះ ឱក សារ៉េត ភេទប្រុស អាយុ ២៣ឆ្នាំ រងរបួសធ្ងន់, ៤.ឈ្មោះ ថាន សុថុន ភេទប្រុស អាយុ ២៥
ឆ្នាំ រងរបួសស្រាល និង ៥.ឈ្មោះ វឿង សារ៉ាត់ ភេទប្រុស អាយុ ២៥ឆ្នាំ រងរបួសស្រាល ជនរងគ្រោះទាំង ៥នាក់ ជាក្រុមតែមួយមានទីលំនៅ ក្នុងភូមិអណ្តូងចេក ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង ។
ប្រភពពីជនរងគ្រោះបានអោយដឹងថា៖នៅក្នុងថ្ងៃកើតហេតុ មានពិធីរាំធុងបាស់មួយ នៅក្នុងភូមិសូភី ដែលស្ថិតនៅជាប់ និងភូមិអណ្តូងចេក ពួកខ្លួនក៏បាននាំគ្នាទៅរាំលេងនៅទីនោះដែរ ខណះកំពុងតែរាំលេងសប្បាយក៏ស្រាប់ តែមានមនុស្សមួយក្រុមនៅក្នុងភូមិសូភីនោះ បាននាំគ្នាដើរសំដៅមកក្រុមរបស់ខ្លួនដោយខ្លះមានកាន់ដំបង និងខ្លះមានកាន់ដែកឆាប 
បានធ្វើសកម្មភាពវាយ និងចាក់មកលើពួកខ្លួនទាំង៥នាក់ បណ្តាលអោយរងរបួសគ្រប់ៗគ្នា។ បន្ទាប់ពីធ្វើសកម្មភាពរួចហើយ ក្រុមនោះបាននាំគ្នារត់ខ្ចាត់ខ្ចាយគ្នាអស់ ហើយក្រុមរបស់ខ្លួនក៏ត្រូវបានគេដឹក យកមកសង្គ្រោះនៅមន្ទីរពេទ្យខេត្ត។
សមត្ថកិច្ចប៉ុស្តិនគរបាលមូលដ្ឋានអោយដឹងថា៖ករណីនេះមិនទាន់ដឹងថាក្រុមណាជាអ្នក
បង្កហេតុមុនទេ ប៉ន្តែក្រុមក្មេងស្ទាវដែលបង្ករបួសស្នាម សមត្ថកិច្ចកំពុងតាមរកចាប់ខ្លួន យកមកសួរចម្លើយកសាងសំណុំរឿងតាមផ្លូវច្បាប់ និងបញ្ជូនទៅតុលាការខេត្ត ដើម្បីផ្តន្ទាទោសជនល្មើសតាមបញ្ញត្តិច្បាប់៕ ប៊ុនរិទ្ធី
