កំពង់ស្ពឺ ៖ មុខសញ្ញាជនសង្ស័យប្រើប្រាស់
ចែកចាយគ្រឿងញៀនយ៉ាងសកម្ម ក្នុងស្រុងសំរោងទង និងក្រុងច្បារមន ដែលបានរត់គេចរួច
ពី ការិយាល័យប៉ូលិសកាលពីពេលថ្មីៗកន្លងមកនេះ ត្រូវបានសមត្ថកិច្ចនគរព្រហ្មទណ្ឌករិតធន់ នៃស្នងការដ្ឋាន ខេត្តកំពង់ស្ពឺ សហការជាមួយអធិការដ្ឋាន ស្រុកភ្នំស្រួច ធ្វើការឃាត់ខ្លួនបានកាលពីវេលាម៉ោង ១៧ និង ៥០ នាទីល្ងាច នៅថ្ងៃទី ២៧ ខែកញ្ញា ឆ្នាំ ២០១៤ ត្រង់ចំណុច ភូមិក្បាលថ្នល់ ឃុំមហាសាំង ស្រុកភ្នំស្រួច ខេត្តកំពង់ស្ពឺ ខណៈជនសង្ស័យទៅលេងកូន របស់ដែលរស់នៅខាងប្រពន្ធខ្លួនបានលែងលះជាច្រើនឆ្នាំមកហើយនោះ ។
លោកវរៈសេនីយ៍ត្រី សម សាក់ នាយការិយាល័យ ព្រហ្មទណ្ឌកំរិតធ្ងន់ ខេត្តកំពង់ស្ពឺ បានប្រាប់អ្នកសារព័ត៌មានឱ្យដឹងថា ជនជាមុខសញ្ញាសង្ស័យខាងលើ មានឈ្មោះ សោម សាវ័ន្ត ហៅ តឿ ភេទ ប្រុស អាយុ ៣២ ឆ្នាំ ជនជាតិខ្មែរ មានស្រុកកំណើត នៅភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ ។ ទីលំនៅបច្ចុប្បន្ន នៅភូមិចំបក់ ឃុំវល្លិ៍ស ស្រុកសំរោងទង និងមុខរបរចែកចាយគ្រឿងញៀន លាក់អាវុធខុសច្បាប់ហើយធ្លាប់ពាក់ព័ន្ធករណីផ្សេងៗជាច្រើនទៀតផងដែរ ។ លោកសម សាក់បន្តថា ពេលចុះប្រតិបត្តិការនោះ កំលាំងបានឆែកឆេខ្លួនសង្ស័យពុំឃើញសារធាតុញៀននៅជាប់ខ្លួនទេ ប៉ុន្តែកាំភ្លើង AK កាត់ស្វាយមួយដើម ផលិតឆ្នាំ ១៩៩០ VN និងមានគ្រាប់ចំនួន១៣គ្រាប់នោះ ពិតជារបស់ជនសង្ស័យ និងបក្ខពួកលាក់ទុកមែន ។
ជនសង្ស័យឈ្មោះសោម សាវន្ត័ បានឆ្លើយសារភាពចំពោះមុខសមត្ថកិច្ចថា ៖ ខ្លួនជាអ្នកប្រើប្រាស់ និងចែកចាយសាធាតុញៀនមែន និងលាក់ទុក្ខអាវុធខុសច្បាប់ ដើម្បីប្រើប្រាស់ប្រាកដមែន ។ ហើយ អំឡុងក្នុងឆ្នាំ ២០០២ ជាប់គុកម្តងអំពីបទបង្ករបួសស្នាម ពេលចេញមកវិញ ក្នុងឆ្នាំ២០០៦ ខ្លួនបានជាប់ពន្ធនាគារយៈលើទី២ ។ ជននោះបានបន្តថា ក្រោយពីចេញពីគុកខ្លួនមានបក្ខពួកជាច្រើននាក់ នាំគ្នាធ្វើសកម្មភាពជក់ ប្រើប្រាស់ ថែមទាំងចែកចាយគ្រឿងញៀន និងលាក់ទុកអាវុធខុសច្បាប់ សម្រាប់ធ្វើសកម្មភាពជាច្រើនទៀត ។
សូមបញ្ជាក់ថា កាលពីពេលកន្លងទៅថ្មីៗនេះ ជនសង្ស័យត្រូវបានកំលាំងសមត្ថកិច្ច ឃាត់ខ្លួនពីបទចែកចាយចាយគ្រឿងញៀន ប៉ុន្តែក្នុងដំណាក់សាកសួររបស់ក្រុមមន្ត្រីជំនាញ ស្រាប់តែឈ្មោះសោម សាវ័ន្តនេះបានរត់គេចខ្លួនពីដៃប៉ូលិសបាត់ ។ មូលហេតុដែលបណ្តាលឱ្យជនសង្ស័យរត់រួចនោះ ត្រូវបានមហាជនសង្ស័យថា មានកំរោងគិតទុកជាមុនរបស់អ្នកកាន់សំណុំរឿងជាមួយមុខសញ្ញា ប៉ុន្តែពេលនេះត្រូវប៉ូលិសព្រហ្មទណ្ឌចាប់ខ្លួនម្តង អាចមានវាសនាគេចផុតពីគុតទៀតឬយ៉ាងណា ។
បច្ចុប្បន្នជនសង្ស័យត្រូវកំលាំងនគរបាលយុត្តិធម៌កំពុងសាកសួរ កសាងសំណុំរឿងឱ្យគ្រប់ជ្រុងជ្រោយ រួចបញ្ជូនខ្លួនទៅកាន់សាលាដំបូង ខេត្តកំពង់ស្ពឺ នៅថ្ងៃទី២៩ ខែកញ្ញា ឆ្នាំ២០១៤នេះ ដើម្បីតាមផ្លូវច្បាប់ និងបន្តវែកមុខបក្សពួកវាមួយចំនួនទៀត ៕
