កំពង់ចាម: ឯកឧត្ដម អ៊ុន ចាន់ដា អភិបាលខេត្តកំពង់ចាម បានអះអាងថា យើងត្រូវបន្តធ្វើការអភិវឌ្ឍន៍ជារៀងរាល់ឆ្នាំ ប្រកបដោយនិរន្តភាព ចីរភាពបរិស្ថាន ធនធានធម្មជាតិ អភិវឌ្ឍន៍សេដ្ឋកិច្ច សង្គមកិច្ច ធ្វើយ៉ាងណា ឲ្យជីវភាព រស់នៅ របស់ ប្រជាពលរដ្ឋទាំងអស់កាន់តែប្រសើរឡើង ទាំងប្រាក់ចំណូលគ្រួសារ ទាំងសុខុមាលភាព និងការងារអប់រំសិក្សាធិការជាមូលដ្ឋាន។ 
ការថ្លែងបែបនេះក្នុងកិច្ចប្រជុំណែនាំស្ដីពីការប្រមូលតម្រូវការអាទិភាពរបស់មូលដ្ឋានសម្រាប់ការ
កសាងកម្មវិធីវិនិយោគបីឆ្នាំរំកិល (២០២៤-២០២៦) និងផ្សព្វផ្សាយសៀវភៅកម្មវិធីវិនិយោគបីឆ្នាំរំកិល (២០២៣-២០២៥) របស់រដ្ឋបាលខេត្តកំពង់ចាម នារសៀលថ្ងៃទី២៦ ខែមករា ឆ្នាំ២០២៣ ។
ក្នុងកិច្ចប្រជុំនេះដែរ ឯកឧត្ដម អ៊ុន ចាន់ដា អភិបាលខេត្តកំពង់ចាម បានថ្លែងថា ការវិវត្តនៃកិច្ចដំណើរការ កំណែទម្រង់តាមបែបប្រជាធិបតេយ្យនៅថ្នាក់ក្រោមជាតិ តាមរយៈគោលនយោបាយ វិមជ្ឈការ និងវិសហមជ្ឈការប្រកបដោយការជឿជាក់យ៉ាងខ្លាំង ចំពោះតួនាទីដ៏មានសារៈសំខាន់ របស់រដ្ឋបាលថ្នាក់ក្រោមជាតិ ក្នុងការផ្តល់សេវាសាធារណៈ និងការអភិវឌ្ឍន៍សេដ្ឋកិច្ចនៅតាមមូលដ្ឋាន សំដៅលើកកម្ពស់ជីវភាព របស់ប្រជាពលរដ្ឋ និងចូលរួមចំណែកកាត់បន្ថយភាពក្រីក្រប្រកបដោយប្រសិទ្ធភាព។
ឯកឧត្ដមអភិបាលខេត្ត បានបន្តថា ផ្អែកតាមផែនការអភិវឌ្ឍន៍ របស់ខ្លួន រដ្ឋបាល ឃុំ សង្កាត់បានរៀបចំ និងអនុវត្ត នូវគម្រោងហេដ្ឋារចនាសម្ព័ន្ធខ្នាតតូចដូចជា ការសាងសង់ផ្លូវលំ ផ្លូវបេតុង ស្ពាន អណ្តូងទឹក ប្រឡាយទឹក អគារសាលារៀន និងគម្រោងផ្សេងៗ ទៀតពាក់ព័ន្ធនឹងការផ្តល់សេវាសាធារណៈ ការផ្សព្វផ្សាយព័ត៌មានអំពីបញ្ហាសុខភាព និងអនាម័យតាមជនបទ ការផ្សព្វផ្សាយចំណេះដឹងអំពីបញ្ហាយេនឌ័រ ការទប់ស្កាត់អំពើហឹង្សាក្នុងគ្រួសារ ដោយប្រើប្រាស់មូលនិធិឃុំ សង្កាត់ និងកៀរគរធនធាន ដែលបានពីប្រភពផ្សេងទៀត ដើម្បីឆ្លើយតបទៅនឹងតម្រូវការជាអាទិភាពរបស់ប្រជាជននៅតាមមូលដ្ឋាន ។
ជាមួយគ្នានោះ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានណែនាំដល់មន្ទីរ អង្គភាព រដ្ឋបាល ក្រុង ស្រុក និងឃុំ សង្កាត់ ត្រូវជំរុញការអនុវត្តគម្រោងនីមួយៗ ឲ្យចប់ តាមការកំណត់ និងមានប្រសិទ្ធភាព ព្រោះគម្រោងទាំងអស់ នៅក្នុងសៀវភៅកម្មវិធីវិនិយោគបីឆ្នាំរំកិល(២០២៣-២០២៥) គឺជាផែនការ សម្រាប់អនុវត្តនៅឆ្នាំ២០២៣នេះ ។ លេីសពីនោះត្រូវស្រង់យកសំណើរបស់ប្រជាពលរដ្ឋ ដែលបាន លើកឡើងក្នុងវេទិការសាធារណៈ របស់ក្រុមប្រឹក្សាខេត្ត ដាក់បញ្ចូលក្នុងកម្មវិធី វិនិយោគ តាមដែនសមត្ថកិច្ចរបស់ខ្លួនផងដែរ ៕
