ភ្នំពេញ ៖ បុរសម្នាក់ត្រូវក្មួយថ្លៃកាប់មួយកាំបិតតាំងតោចំសៀតផ្កាហូរឈាមស្រោចខ្លួនរងរបួសធ្ងន់ បន្ទាប់ពីមានជម្លោះពាក្យសម្តីគ្នាមួយប្រាវ ។ ហេតុការណ៍នេះកើតឡើងកាលពីវេលាម៉ោង១១ និង៥០នាទីយប់ ថ្ងៃទី ២៩ កញ្ញា ២០១៤ នៅក្នុងហាលក់ចាប់ហួយ និងការហ្វេ ស្ថិតនៅផ្ទះលេខ៤៩Eo ផ្លូវលេខ៨៦ ក្នុងសង្កាត់ស្រះចក ខណ្ឌដូនពេញ ។
ជនសង្ស័យជាក្មួយថ្លៃ ឈ្មោះ ធឿន ភេទប្រុស អាយុ៤៤ឆ្នាំ មុខរបរលក់ដូរ ចំណែកជនរងគ្រោះជាមាថ្លៃឈ្មោះស សុខុន អាយុ៥៣ឆ្នាំ មុខរបររត់រ៉ុម៉កម៉ូតូ ។ ទាំងពីរនាក់រស់នៅកន្លែងកើតហេតុ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុបុរសរងគ្រោះស្រវឹងស្រាបានមកដល់ក្នុងហាងលក់ចាប់ហួយនិងការហ្វេ របស់បុរសជាក្មួយថ្លៃ (ជនសង្ស័យ) ហើយបាននិយាយឌៀមដាម ដាក់ក្មួយថ្លៃ ធ្វើឱ្យក្មួយថ្លៃទ្រាំមិនបានក៏និយាយឌៀមដាមដាក់ទៅវិញ រហូតបង្កទៅជាជម្លោះពាក្យសម្តីកាន់តែខ្លាំងហើយបុរសជាក្មួយថ្លៃ បានទាញកាំបិតតាំងតោកាប់ប្រហារទៅលើមាថ្លៃ មួយកាំបិតចំសៀតផ្កាខាងស្ដាំ ហូរឈាមស្រោចខ្លួនរបួសធ្ងន់ ។ បន្ទាប់ពីកាប់ប្រហារទៅលើមាថ្លៃហើយនោះ បុរសសង្ស័យក៏បានរត់គេចខ្លួនបាត់ស្រមោល ធ្វើឱ្យបុរសជាមាថ្លៃ ដែលរងរបួសហូរឈាមស្រោចខ្លួនខឹងក្តៅក្រហាយ ក៏ចាប់ទាញសម្ភាររបស់ក្មួយថ្លៃ ដែលមាននៅក្នុងហាងខាងលើកបោកកំទេចចោលតែម្តង ។ តាមប្រភពព័ត៌មានបានបន្តឱ្យដឹងថា រវាងក្មួយថ្លៃនិងមាថ្លៃមួយគូនេះគឺមានទំនាស់គ្នារយៈពេលមួយឆ្នាំជាងមកហើយ ដោយក្មួយថ្លៃខឹងនិងមាថ្លៃថាឱ្យតែស្រវឹងមករករឿង ក្នុងហាងរបស់ខ្លួន ហើយយកបារីជក់មិនដែលសងលុយ។
ក្រោយពេលកើតហេតុជនរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យកាលម៉ែត៕
