បន្ទាយមានជ័យ៖ កុដិសាមគ្គីធម៌មួយខ្នងដែលមានទទឹង ៩ ម៉ែត្របណ្ដោយ ១៦ ម៉ែត្រកម្ពស់ ១ ជាន់ បានស្ថាបនារួចរាល់ជាស្ថាពរចំណាយអស់ថវិកាចំនួន ៥៦,៤៥៨ ដុល្លារនិងសមិទ្ធផលផ្សេងៗមួយចំនួនទៀត បានធ្វើពិធីបុណ្យសម្ពោធឆ្លងជាផ្លូវការនាព្រឹកថ្ងៃទី ២៧ ខែកុម្ភៈឆ្នាំ ២០២៣ នៅវត្តប្រាសាទសរារាម “ដងត្រាង” ក្នុងឃុំ
ចំណោម ស្រុកមង្គលបូរី ខេត្តបន្ទាយមានជ័យ ក្រោមអធិបតីភាព លោក លី សុវណ្ណារិទ្ធ អភិបាលរងខេត្ត តាមរបាយការណ៍សង្ខេប ព្រះគ្រូសិរីមង្គល ញាណវង្ស ហួត ពិសិដ្ឋ ព្រះគ្រូចៅអធិការវត្ត ដងត្រាង បានមានសង្ឃដីកាបញ្ជាក់ថា វត្តដងត្រាងគឺជាវត្តមួយដែលក្នុងរបប ប៉ុល ពត បំផ្លាញខ្ទេចខ្ទីចោលស្ទើរគ្មានសល់ តែក្រោយថ្ងៃរំដោះ ៧ មករាឆ្នាំ ១៩៧៩ ទើបប្រជាពុទ្ធបរិស័ទជិតឆ្ងាយមានសទ្ធាជ្រះថ្លាសាមគ្គីគ្នា កសាងវត្តដងត្រាងនេះឡើងវិញ ដូចជានាថ្ងៃនេះបានដាក់សម្ពោធកាត់ខ្សែបូរ កុដិសាមគ្គីធម៌នេះ សម្រាប់ព្រះសង្ឃ គង់។ ហើយព្រះតេជគុណក៏មានសង្ឃដីកាបញ្ជាក់បន្ថែមជូនដល់ឯកឧត្តម លោកជំទាវ អស់លោកលោកស្រីថា វត្តដងត្រាងនៅជំពាក់សម្ភារៈ គ្រឿងសំណង់ចំនួន ២ ម៉ឺនដុល្លារទៀត។
លោក លី សុវណ្ណារិទ្ធ អភិបាលរងខេត្តបានមានប្រសាសន៍ សម្ដែងនូវក្ដីមោទនភាពទទួលអំណរសាទរចំពោះលទ្ធផលជាផ្លែផ្កាដ៏សមស្រប ដែលព្រះមន្ត្រីសង្ឃ ព្រះសង្ឃ អាចារ្យ គណៈកម្មការ សប្បុរសជននិងពុទ្ធបរិស័ទជិតឆ្ងាយ បានរួបរួមសាមគ្គីគ្នាកសាងនូវសមិទ្ធផលនៅតាមវត្តអារាមនានាសម្រាប់ជាប្រយោជន៍សាធារណៈ ជាពិសេសនៅក្នុងវត្តប្រាសាទសរារាម បានរៀបចំពិធីសម្ពោធឆ្លងសមិទ្ធផលនានាជាផ្លូវការ ដែលសម្រេចបាននាពេលនេះ មានកុដិថ្មីដែលទើបសាងសង់ហើយនេះ និងសមិទ្ធផលនានា ទាំងអស់នេះគឺជាការបញ្ជាក់ពីការចូលរួម និងការបរិច្ចាគលះបង់របស់ថ្នាក់ដឹកនាំ ព្រះតេជគុណ សប្បុរសជន និងពុទ្ធបរិស័ទគ្រប់មជ្ឈដ្ឋាន។
លោក លី សុវណ្ណារិទ្ធ បន្តថា វត្តអារាមគឺជាកន្លែងអប់រំសីលធម៌ ចរិយាធម៌ គុណធម៌ និងជាទីកន្លែងដែលរក្សាទុកនូវវប្បធម៌ ប្រពៃណីទំនៀមទម្លាប់ ដែលបុព្វបុរសខ្មែរកត់ត្រាទុកពីជំនាន់មួយទៅជំនាន់មួយ សម្រាប់មនុស្សជំនាន់ក្រោយ ពិសេសទៅទៀតទីវត្តអារាម ជាកន្លែងបណ្ដុះនូវធនធានមនុស្ស ដែលពោរពេញដោយចំណេះដឹងទាំងផ្លូវលោក ផ្លូវធម៌និងប្រកបដោយមនសិការជាតិ ចៀសវាងនូវអំពើអកុសល នឹងធ្វើតែអំពើជាកុសល។
ចុងបញ្ចប់គណធិបតី ក៏បានប្រគេនថវិកាចំនួន ២ លានរៀលដល់ព្រះចៅអធិការ សម្រាប់កម្មវិធីបុណ្យឆ្លងនិងបានបំពាក់គ្រឿង ឥស្សរិយស មេដាយដល់សប្បុរសជន និងបណ្ណ័សរសើរដល់លោកតាលោកយាយ៕ដោយ៖ឃិន គន្ធា
