ជាង ប៊ីលហ្គេត
ក្នុងឆ្នាំ២០១៤ លោក ប៊ីល ហ្គេត នៅតែជាជនជាតិអាមេរិកដែលមានជាងគេបំផុត គឺ២១ឆ្នាំជាប់ៗគ្នា ដែលទស្សនាវដ្តី Forbes ចាត់ទុកស្ថាបនិករបស់ Microsoft ស្ថិតក្នុងចំណាត់ថ្នាក់ជាអ្នកមានជាងគេបំផុតក្នុងចំណោមជនជាតិអាមេ រិកជាអ្នកមានទ្រព្យច្រើនបំផុត៤០០នាក់ ។ ចំណាត់ថ្នាក់ឆ្នាំ២០១៤នេះ ត្រូវបានទស្សនាវដ្តី Forbes ចេញផ្សាយកាលពីថ្ងៃទី២៩ កញ្ញា ។
ទ្រព្យសម្បត្តិរបស់លោកប៊ីល ហ្គេត កើនដល់៩ពាន់លានដុល្លារក្នុង១ឆ្នាំ ដោយទ្រព្យរបស់លោកពេលនេះឡើងដល់៨១ពាន់លានដុល្លារ ។ អ្នកវិនិយោគលោក Warren Buffet នៅតែជាអ្នកមានធំលំដាប់ទី២ រយៈពេល៣ឆ្នាំជាប់គ្នា ជាមួយទ្រព្យសម្បត្តិ៦៧ពាន់លានដុល្លារ ។ លោកមានទ្រព្យនាំមុខលោក Larry Ellison ស្ថាបនិករបស់ក្រុមហ៊ុន Oracle ដែលមានទ្រព្យ៥០ពាន់លានដុល្លារ ។
សរុបទ្រព្យសម្បត្តិរបស់ មហាសេដ្ឋីទាំង៤០០នាក់នោះ មានការកើនឡើង១៣% ចាប់តាំងពីឆ្នាំ២០១៣មក ។ ការរីកចម្រើនរបស់ Wall Street ជាកម្លាំងចលករសំខាន់សម្រាប់ការកើនឡើងនេះ ។ ទ្រព្យសម្បត្តិគិតជាមធ្យមរបស់អ្នកមានកំពូលទាំងនោះ ឥឡូវមានដល់៥,៧ពាន់លានដុល្លារ ទល់នឹង៥ពាន់លានដុល្លារកាលពីឆ្នាំ២០១៣ ។
ដើម្បីមានឈ្មោះបញ្ចូលក្នុងបញ្ជីកំពូលអ្នកមាន នេះ ក្នុងឆ្នាំនេះទាល់តែអ្នកមានទ្រព្យចាប់ពី១,៥៥ពាន់លានដុល្លារឡើងទៅ ។ នេះជាចំនួនទឹកប្រាក់យ៉ាងខ្ពស់មួយ ពុំធ្លាប់មានចាប់តាំងពីការបង្កើតចំណាត់ថ្នាក់នោះពីឆ្នាំ១៩៨២មក ។ ដូច្នេះអ្នកមានអាមេរិក១១៣នាក់ ពុំអាចមានឈ្មោះក្នុងបញ្ជីទេក្នុងឆ្នាំ២០១៤ ។ ផ្ទុយទៅវិញ ក្នុងបញ្ជីកំពូលអ្នកមានអាមេរិកឆ្នាំនេះមានអ្នកចំណូលថ្មី២៧ រូប ក្នុងនោះមានលោក Jan Koum សហស្ថាបនិករបស់ Whatsapp ដែលស្ថិតក្នុងលំដាប់ថ្នាក់ទី៦២ ក្រោយការប្រកាសពីការទិញយកក្រុមហ៊ុនរបស់លោក ដោយ Facebook ក្នុងទឹកប្រាក់១៩ពាន់លានដុល្លារ ។
អ្នកដែលអាចរកទ្រព្យបានច្រើនឆាប់បំផុតគួរឱ្យ ភ្ញាក់ផ្អើលនោះគឺលោក Mark Zuckerberg ស្ថាបនិករបស់ Facebook ដែលលោកក្លាយជាកំពូលអ្នកមានលំដាប់ទី១១ ។ ទ្រព្យសម្បត្តិរបស់លោកឡើងដល់៣៤ពាន់លានដុល្លារ គឺ១៥ពាន់លានដុល្លារច្រើនជាងកាលពីឆ្នាំ២០១៣ ។គិតជាភាគរយ គឺលោក Nick Woodman ស្ថាបនិករបស់ក្រុមហ៊ុន Gopro ជាក្រុមហ៊ុនផលិតកាមេរ៉ាពិសេស ជាអ្នកប្រមូលទ្រព្យបានច្រើនលឿនបំផុតដល់ទៅ២០០%នៃទ្រព្យរបស់លោក ៕
