ភ្នំពេញ ៖ បុរសម្នាក់ស្រវឹងជោកជាំជិះម៉ូតូលឿនមិនប្រយ័ត្នឡើងទួលដែលគេចាក់កាត់ទទឹងផ្លូវដើម្បីអោយយានយន្តបន្ថយល្បឿន ហើយទប់ចង្កូតម៉ូតូមិនជាប់បណ្ដាលដួលបោកនិងថ្នល់រងរបួសធ្ងន់ ហេតុការណ៍នេះបានកើតឡើងកាលពីវេលាម៉ោង៦និង៤០នាទីយប់ថ្ងៃទី៣០ខែកញ្ញាឆ្នាំ២០១៤ ត្រង់ចំណុចក្នុងបរិវេណវិមានសុភមង្គល ស្ថិតក្នុងភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេឃើញបុរស២នាក់ជិះម៉ូតូ២គ្រឿងទើបចេញពីហាងផឹកស៊ីមួយកន្លែងស្រវឹងជោកជាំហើយជិះធ្វើដំណើរចូលតាមច្រក វិមានសុភមង្គល ស្រាប់តែមកដល់ចំណុចកើតហេតុបុរសម្នាក់ជិះម៉ូតូគុប ពណ៌ទឹកប៊ិច ពាក់ស្លាកលេខ ភ្នំពេញ 1L-7377 បានជិះឡើងទួលបេតុងដែលគេចាក់កាត់ទទឹងផ្លូវដើម្បីអោយយានយន្តបន្ថយល្បឿន ហើយទប់ចង្កូតម៉ូតូមិនជាប់បណ្ដាលអោយបោកនិងថ្នល់បោកក្បាលបែកចេញឈាមសន្លប់ស្ដូកស្ដឹង មួយសន្ទុះធំ ភ្លាមៗប្រជាការពារភូមិក៏បានចុះមកអន្តរគមន៍និងបានទំនាក់ទំនងហៅរថយន្តសាមុយ តែជនរងគ្រោះក៏ត្រូវបានមិត្តភ័ក្តិដឹកតាមរថយន្តមួយគ្រឿងបញ្ជូនទៅមន្ទីរពេទ្យដើម្បីព្យាបាលរបួស ចំនែកម៉ូតូមិត្តភ័ក្តិម្នាក់ទៀតជិះតាមទៅមន្ទីរពេទ្យជាមួយផងដែរ៕
