ខេត្តព្រះសីហនុ
លោក នេន ចំរើន ប្រធានរដ្ឋបាលជលផលកំពង់សោម ឲ្យដឹងថា ក្នុងរយះពេល ៩ខែ ដើមឆ្នាំ២០១៤នេះ ការនេសាទសមុទ្រមានការកើនឡើងជាង៩ខែ ដើមឆ្នាំ២០១៣ ។ ក្នុងនោះផលនេសាទសមុទ្រមានចំនួន ៣៦.៨២០តោន និងផលនេសាទត្រីទឹកសាបចំនួន១.២៦០តោន ។
លោកប្រធានរដ្ឋបាលជលផលឲ្យដឹងបន្តថា ទន្ទឹមនឹងផលនេសាទក៌នូវមានផលនេសាទកែច្នៃបានចំនួន ២.២៨០តោនផងដែរ ផលនេសាទធ្វើការនាំចេញបានចំនួន ២.៦៣០តោន ផលចាប់ពីការចិញ្ចឹជាលក្ខណះគ្រួសារ បានចំនួន៦៦៩តោន និងផលិតផល ទឹកត្រីបាន ៨៤០.០០០លីត្រ ។
ក្រៅពីការនេសាទ រដ្ឋបាលជលផលកំពង់សោមក៌បានដាក់ ក្តាមមេពងក្នុងបែបានចំនួន ១. ៩៥៣គីឡូក្រាម ស្មើនឹង ១០.៦៤៥ក្បាល ព្រមទាំងធ្វើការលែងកូនត្រីចំនួន ៣០.០០០ក្បាល និងលែងត្រីមេពូជចំនួន ៣០គីឡូគ្រាម ចូលក្នុងបឹងធម្ម ជាតិឲ្យបានសម្បូរបន្ថែមទៀត ដើម្បីបង្កើនជីវភាពប្រជាពលរដ្ឋក្នុងសហគមន៌នេសាទ ។ មន្ត្រីជលផលក៌បានធ្វើការបង្ក្រាបបទល្មើសនេសាទ ដោយប្រើឧបករណ៌ខុសច្បាប់ហាមឃាត់របស់ក្រសួងកសិកម្មរុក្ខាប្រមាញ់ និងនេសាទបានចំនួន២៨ករណី ។
លោក នេន ចំរើន បានបញ្ជាក់ថា ផលត្រីសម្បូរអាស្រ័យដោយមានការចូលរួមការពារ អភិរក្សរបស់ប្រជានេសាទសហគមន៌ ជាពិសេសការការពារព្រៃកោងកាង ដែលជា ជម្រកមច្ចាជាតិពង កូន ព្រោះព្រៃកោងកាងជាព្រៃដ៌សំខាន់ក្នុងការផ្តល់នូវទិន្នផលត្រីឲ្យសម្បូរឡើង ប្រសិនបើយើងនាំគ្នាកាប់បំផ្លាញព្រៃកោងកាងយកដីជាកម្មសិទ្ធផ្ទាល់ខ្លួន មច្ចាជាតិត្រូវបាត់បង់ជាក់ជាមិនខានផងដែរ ។
រដ្ឋបាលជលផលបានេធ្វើការផ្សព្វផ្សាយដល់ប្រជាពលរដ្ឋក្នុងសហគមន៌នេសាទទាំងអស់ចូលរួមថែរក្សាការពារព្រៃកោងកាង និងចូលរួមដាំកូនកោងកាងដែលជាជម្រកត្រីពង កូន ហើយក៌បានសហការជាមួយអាជ្ញាធរមូលដ្ឋាន និងប្រជាពលរដ្ឋធ្វើការដាំដុះកូនកោងកាងបានចំនួន១១.៥០០ដើម នៅក្នុងស្រុកព្រៃនប់ ខេត្តព្រះសីហនុ ព្រមទាំងបានបណ្តុះកូនកោងកាងបានចំនួន ១៩.០០០ដើមបន្ថែមទៀតសម្រាប់ដាំបន្តនៅពេលខាងមុខ ។
ព្រោះព្រៃកោងកាងវាមានសារសំខាន់ណាស់ បើយើងធ្វើការដាំដុះបានច្រើន ផលត្រីនឹងសម្បូរកាន់តែច្រើនឡើងផងដែរ ព្រោះត្រី និងបង្គារវាពងកូននៅក្រោមដើមកោងកាង ហើយនៅពេលវាធំធាត់ពួកវានឹងចេញទៅរកស៊ីនៅខាងក្រៅ ប្រជានេសាទក្នុងសហគមន៌ពួកគាត់អាចចេញទៅនេសាទបានផលត្រីច្រើន ។ ក្រៅពីផលប្រយោជន៌នៃព្រៃកោងកាង រដ្ឋបាលជលផលបានរៀបចំធ្វើប្រអប់សិប្បនិមិត្តចំនួន ១០ប្រអប់បន្ថែមទៀត ដើម្បីយកទៅទម្លាក់នៅក្នុងតំបន់អភិរក្សក្នុងសហគមន៌នេសាទ ។
លោក នេន ចំរើន បានឲ្យដឹងបន្ថែមទៀតថា ក្រសួងបានចេញលិខិតឲ្យរដ្ឋបាលជលផលកំពង់សោមប្រមូលថ្លៃឈ្នូលពីដែននេសាទកាលពីចុងខែសីហា ហើយរដ្ឋបាលជលផលបានធ្វើការផ្សព្វផ្សាយទៅដល់ប្រជានេសាទក្នុងខេត្តព្រះសីហនុ ចូលរួមបង់ថ្លៃឈ្នូលដែននេសាទឲ្យបានគ្រប់ៗគ្នា រហូតមកដល់ចុងខែកញ្ញានេះ ប្រជានេសាទបានចូលមកបង់ថ្លៃឈ្នួលដែននេសាទបានចំនួន ៨.៤៣៧.៥០០រៀល ។
លោកក៌សូមអំពាវនាវដល់ប្រជានេសាទទាំងអស់ អញ្ជើញរួសរាន់មកបង់ថ្លៃឈ្នួលដែននេសាទឲ្យបានរួសរាន់ ព្រោះប្រសិនមិនបានមកបង់ថ្លៃដែននេសាទនោះទេ រដ្ឋបាលជលផលនឹងធ្វើការផាកពិន័យទៅតាមផ្លូវច្បាប់ ។នៅខេត្តព្រះសីហនុ មានទូកនេសាទចំនួន ១.៥៤០គ្រឿង ក្នុងនោះទូកដែលមានកម្លាំងម៉ាស៊ីនក្រោម ៣៣សេះ ចំនួន១.២៥១គ្រឿង និងទួកដែលមានកម្លាំងម៉ាស៊ីនលើសពី ៣៣សេះមានចំនួន២៨៩គ្រឿង ៕
