CDC បានបញ្ជាក់ កាលពីថ្ងៃទី៣០ កញ្ញា ថា អ្នកឆ្លងវីរុសអេបូឡាម្នាក់ត្រូវបានរកឃើញនៅសហរដ្ឋអាមេរិក ។ អ្នកជំងឺរូបនោះជាបុរសម្នាក់ ដែលបានទៅកាន់ប្រទេសលីបេរីយ៉ា ហើយបន្ទាប់មកវិលមកកាន់រដ្ឋតិចសាស់ជាកន្លែងរូបគេចូលមន្ទីរពេទ្យ មួយនៅក្រុងដាល់ឡាស់ ។ CDC ត្រូវផ្តល់ការបញ្ជាក់ថែមទៀតក្នុងសន្និសីទសារព័ត៌មានមួយ ។ ចំណែកមន្ទីរពេទ្យពុំបានប្រាប់ឈ្មោះអ្នកជំងឺឬអាយុរបស់គេឡើយ ។
កាលពីថ្ងៃទី២៨ កញ្ញា កន្លងមកនេះ គ្រូពេទ្យអាមេរិកម្នាក់ដែលធ្វើការផ្ទាល់ជាមួយវីរុសអេបូឡានៅ ប្រទេសេរ៉ាឡេអូន ត្រូវបានធ្វើមាតុភូមិនិវត្តន៍ ហើយដាក់នៅដាច់ពីគេដើម្បីទទួលការពិនិត្យព្យាបាលក្នុងគ្លីនិកមួយ នៃវិទ្យាស្ថានសុខភាពអាមេរិក NIH ស្ថិតនៅជិតក្រុងវ៉ាស៊ីន តោន ។ អ្នកជំងឺរូបនោះ ដែលមិនប្រាប់ឈ្មោះធ្វើការជាអ្នកស្ម័គ្រចិត្តនៅឯមជ្ឈមណ្ឌលព្យាបាល ជំងឺអេបូឡាមួយនៅប្រទេសសេរ៉ាឡេអូន ។
មុនអ្នកជំងឺទាំង២នេះ គ្រូពេទ្យអាមេរិក២នាក់ និងអ្នកស្ម័គ្រចិត្តជួយព្យាបាលជំងឺនេះម្នាក់ត្រូវបានវិលត្រឡប់ មកកាន់សហរដ្ឋអាមេរិក ក្រោយពីពួកគេឆ្លងវីរុសអេបូឡានៅប្រទេសលីបេរីយ៉ា រួចពួកគេត្រូវបានប្រកាសថា បានជាសះស្បើយវិញហើយ នាពេលថ្មីៗនេះ ។ដើម្បីជួយទប់ទល់ជំងឺអេបូឡា មន្ទីរប៉ង់តាហ្គោនអះអាងកាលពីថ្ងៃទី៣០ កញ្ញា ពីការបញ្ជូនទាហានអាមេរិក១.៤០០នាក់ទៅកាន់ប្រទេសលីបេរីយ៉ា ។
តាមរបាយការចុងក្រោយរបស់អង្គការសុខភាព ពិភពលោក WHO ចេញផ្សាយកាលពីចុងខែកញ្ញាថា វីរុសអេបូឡាបានសម្លាប់មនុស្សដល់លើសពី៣.០០០នាក់ហើយ គឺជិតពាក់កណ្តាលនៃអ្នកឆ្លងវីរុសនេះចំនួនប្រមាណជា៦.៥០០នាក់ ។
យោងតាមតុល្យការនេះគិតត្រឹមថ្ងៃទី២៣ កញ្ញាមក សរុបមនុស្សជាង៣.០៩៣នាក់ស្លាប់ក្នុងចំណោមអ្នកជំងឺអេបូឡា៦.៥៧៤នាក់ ដែលជំរឿនឃើញក្នុងប្រទេសអាហ្វ្រិកខាងលិច៥។ តុល្យការលើកមុនចុះកាលបរិច្ឆេទថ្ងៃទី២១ កញ្ញា រៀបរាប់ពីមនុស្សស្លាប់២.៩១៧នាក់ក្នុងចំណោមអ្នកឆ្លងវីរុសអេបូឡា ៦.២៦៣នាក់ ។ ជំងឺនេះមានអត្រាអ្នកស្លាប់ប្រមាណជា៧០%
