កំពង់ចាម៖ នៅព្រឹកថ្ងៃទី១ ខែតុលា ឆ្នាំ២០១៤នេះ នៅសាលាដំណាក់កណ្តាលភូមិកេះឃុំមៀន ស្រុកព្រៃឈរ ខេត្តកំពង់ចាម លោកអភិបាលស្រុកព្រៃឈរចុះមកដោះស្រាយ ជ្រើសរើសមេភូមិកេះ ទៅតាមការស្នើរសុំរបស់ប្រជាពលរដ្ឋ ជាមនុស្សមានបុគ្គលិកលក្ខណៈសម្បត្តិពេញលេញ ប្រកបដោយសមត្ថភាពពិតប្រាកដ ដើម្បីជួយបំរើការងារភូមិឲ្យប្រសើរឡើង ។ គឺធ្វើឡើងទៅតាមនិតិវិធីការជ្រើសរើសមេភូមិ ប្រសូត្រចេញពីការបោះឆ្នោតរបស់ក្រុមប្រឹក្សាឃុំ ពិតប្រាកដ ។
លោក ទេព រាមុន្នី អភិបាលស្រុកប្រៃឈរបានមានប្រសាសន៍ថា ការអញ្ជើញមកថ្ងៃនេះ បន្ទាប់ពីការសន្យានៅថ្ងៃទី២៥ ខែកញ្ញា ឆ្នាំ២០១៤ ដែលបានជួបជុំប្រជាពលរដ្ឋនៅសាលាស្រុកព្រៃឈរ ដែលមានការស្នើសុំឲ្យអាជ្ញាធរស្រុកមានកិច្ចអន្តរាគមន៍ ជួយជ្រើសរើសមេភូមិកេះថ្មី តម្រូវទៅតាមចិត្តរបស់ពួកគាត់ ។
លោក អភិបាលបានបញ្ជាក់ទៀតថា ការជ្រើសរើសមេភូមិកេះថ្មី គឺធ្វើឡើងទៅតាមនិតិវិធី របស់ក្រុមប្រឹក្សាឃុំ ដែលមានសមាសភាព៩រូប មកពីបក្សនយោបាយចំនួន៣ ហើយមេភូមិកេះថ្មីនេះ គឺសមាសភាពសមាជិករបស់គណៈបក្សទាំង៣ បញ្ជូលគ្នារួចធ្វើការបោះឆ្នោត របស់ក្រុមប្រឹក្សាឃុំតែម្តង ។
ហើយលោកបានបញ្ជាក់ទៀតថា មេភូមិកេះថ្មី មិនមែនជាអនុប្រធានភូមិចាស់ ឬក៏ជាសមាជិកភូមិចាស់ ហើយក៏មិនមែនឈ្មោះ ស៊ិន ហឿន នោះដែរ គឺថ្មីផ្តើមចេញមកពីការបោះឆ្នោតរបស់ក្រុមប្រឹក្សាឃុំ សុទ្ធសាធហើយប្រជាពលរដ្ឋអាចទទួលយកបាន ។ ហើយនៅថ្ងៃទី១៨ ខែតុលា ឆ្នាំ២០១៤ ខាងមុខ យើងប្រកាសមេភូមិថ្មីនេះជាផ្លូវការ ៕
